?Olsem wanem sipos yu faenemaot se yu gat wan strong sik? Hemia i save mekem bodi mo tingting blong yu i kam taed, mo yu nidim mane blong pem ol tritmen blong yu. ?Wanem i save givhan long yu? ?Olsem wanem yu save givhan long wan fren o famle we i sik? Nating se Baebol i no wan buk blong ol meresin, be i gat sam advaes we i save givhan long yu blong winim hadtaem ya.

•   Kasem tritmen

   Baebol i talem wanem: “Ol man we oli no sik, oli no nidim dokta, be olgeta we oli sik, yes, oli nidim.”—Matiu 9:12.

   Olsem wanem blong folem: Go luk dokta, taem yu luk se i nidim.

   Traem hemia: I gud yu lukaot wan gudfala dokta we i stap long ples blong yu. Samtaem, maet i gud blong go luk tu o tri dokta, be i no wan nomo. (Ol Proveb 14:15) I gud yu toktok klia long dokta, talemaot klia ol saen blong sik blong yu, mo meksua se yu kasem klia ol tok we dokta i talem. (Ol Proveb 15:22) Yu lanem moa long saed blong sik blong yu, mo ol defdefren tritmen we dokta i save givim. Sipos yu save samting we bambae i hapen, hemia bambae i mekem se filing blong yu i no olbaot mo bambae yu mekem ol gudfala desisen we i givhan long yu.

•   Lukaotgud long helt blong yu

   Baebol i talem wanem: “Eksasaes i gud long bodi blong yu.”—1 Timoti 4:8, Contemporary English Version.

   Olsem wanem blong folem: I gud yu mekem ol samting we i givhan long helt blong yu olsem eksasaes oltaem.

   Traem hemia: I gud yu folem program blong eksasaes oltaem, kakae ol helti kakae, mo spel gud. Nating se problem blong helt i jenisim ol program blong yu, be ol man blong stadi oli agri se sipos yu spenem taem mo paoa blong lukaot long helt blong yu, hemia bambae i givhan long yu. Sipos yu plan blong mekem wan samting, i gud we oltaem yu tingbaot helt blong yu, mo yu no mas go agensem tritmen blong yu.

•   Askem help long narafala

   Baebol i talem wanem: “Wan tru fren i soemaot lav oltaem, mo hem i wan brata we i kamtru long yu long taem blong trabol.”—Ol Proveb 17:17.

   Olsem wanem blong folem: Ol fren blong yu oli save givhan long yu, taem yu gotru long hadtaem ya.

   Traem hemia: Yu toktok long wan fren we yu trastem mo we yu save talemaot ol filing blong yu long hem. Hemia bambae i givhan long yu blong tekemaot sam wari mo ol nogud filing we yu gat. Ating ol fren mo famle oli wantem givhan long yu, be oli no save wanem blong mekem. Taswe i gud yu talemaot klia, samting we oli save mekem. Be yu no mas askem tumas samting long olgeta, mo yu mas talem tangkiu oltaem from help we oli givim. Be yu mas tingbaot se nating we oli wantem givhan, samtaem oli save go tumas. Taswe maet i gud yu makemaot wetaem oli save kam visit, mo hamas taem oli save stap.

•   Gat positif tingting

   Baebol i talem wanem: “Hat we i glad, i wan gudfala meresin, be tingting we i foldaon, i mekem se man i no moa gat paoa.”—Ol Proveb 17:22.

   Olsem wanem blong folem: Taem yu gat positif tingting mo yu gat hop, hemia bambae i givhan long yu blong tingting blong yu i kwaet mo yu naf blong fesem sik we yu kasem.

   Traem hemia: Naoia we yu stap lan long niufala situesen ya, i gud yu fokas long ol samting we yu save mekem, be i no long ol samting we yu no naf blong mekem. Yu no mas skelem yu wetem ol narafala, o wetem laef we yu gat bifo we yu sik. (Galesia 6:4) Sipos yu putum ol mak we yu save kasem, hemia bambae i givhan long yu blong gat positif tingting long saed blong fiuja. (Ol Proveb 24:10) Sipos yu naf, yu save mekem sam samting blong givhan long ol narafala. Hemia bambae i mekem yu yu glad, nao bambae yu no fokas long ol problem blong yu.—Ol Wok 20:35.

 Baebol i soemaot se Jehova God a i save givhan long yumi, taem yumi kasem wan helt problem. Yumi no save ekspektem se God bambae i mekem merikel blong hilim ol man we oli wosipim hem, be hem i save givhan long olgeta tru long ol rod ya:

 Pis. Jehova i save givim “pis ya . . . we i bigwan tumas i bitim olgeta save blong yumi.” (Filipae 4:6, 7) Pis ya i save givhan long man blong i no wari bitim mak. Mo God i givim pis ya long ol man we oli prea long hem mo oli talemaot ol wari blong olgeta.—1 Pita 5:7.

 Waes. Jehova i save givim waes blong yumi mekem ol gudfala desisen. (Jemes 1:5) Man i kasem waes ya, taem hem i lanem mo folem ol advaes blong Baebol.

 Wan hop long saed blong fiuja. Jehova i promes se long fiuja “bambae i no gat wan man long ples ya i talem se: ‘Mi mi sik.’” (Aesea 33:24) Hop ya i givhan long plante man blong oli gat positif tingting, nating se oli gat wan strong sik.—Jeremaea 29:11, 12.