Jisas i talem long ol disaepol blong hem se: “Bambae . . . yufala i witnes blong mi long . . . olgeta ples long wol.” (Ol Wok 1:8) Tede, ol Witnes blong Jehova oli wok strong blong mekem tok ya i kamtru. Be, long sam ples long wol, olsem ol bigfala eria we plante man oli stap long hem, oli no kasem gudfala witnes. Mo long sam kantri, namba blong ol Witnes i smol nomo. (Matiu 9:37, 38) ?Yumi stap mekem wanem blong kasem plante moa man?

 Blong obei long ol tok blong Jisas, Sevis Komiti blong Hed Kampani blong ol Witnes blong Jehova i sanem ol misinari oli go prij long ol ples we i gat nid. Naoia, i gat 3,090 misinari we oli stap prij olbaot long wol. a Bighaf blong olgeta oli kasem trening long wan Baebol skul, olsem Skul Blong Kingdom Ivanjelis. Ol misinari oli rere blong lego ples blong olgeta mo muv i go long narafala kantri. From we oli bigman long spirit, oli kasem trening, mo oli gat ekspiriens, ol misinari oli givhan blong talemaot gud nius long olgeta ples blong wol, mo oli givim wan gudfala eksampol long ol niufala disaepol.

 Long wanwan branj ofis, Fil Ministri Desk long Sevis Dipatmen i wok wetem Branj Komiti blong lukaot long nid blong ol misinari, hemia ol samting olsem haos, helt, mo smol mane blong pem samting we oli nidim. Long sevis yia 2020, ol Witnes blong Jehova oli spenem klosap 2,917,050,000 vatu blong lukaot long ol misinari. From we ol misinari oli kasem gudfala kea olsem, oli save putum ful tingting mo paoa blong olgeta long wok blong prij, mo tu oli save mekem kongregesen blong olgeta i strong.

 ?Olsem wanem ol misinari oli givhan long wok blong prij? Frank Madsen, we i stap long Branj Komiti long Malawi, i talem se: “Ol misinari oli gat strong tingting mo gudhan long wok blong prij, taswe oli givhan long ol kongregesen we teritori blong olgeta i had. Long ol teritori ya, maet i gat ol komuniti we ol narafala man oli no save go insaed, mo ol eria we ol man blong narafala lanwis oli stap long hem. Ol misinari oli wok had blong lanem lanwis mo kalja blong ples we oli go long hem, mo hemia i givim gudfala eksampol long ol narafala. Mo tu, oli halpem plante yangfala blong oli tingbaot blong joen long wok blong Jehova fultaem. Mifala i talem tangkiu long Jehova from ol misinari ya.”

 Wan memba blong Branj Komiti blong defren kantri, i talem se: “Ol misinari oli soemaot se ol man blong Jehova oli joen gud long fulwol. Ol man we oli no Witnes tu, oli luksave se yumi no seraot from defdefren kalja, be ol tijing blong Baebol oli halpem yumi blong joen gud olsem wan famle.”

 ?Olsem wanem ol misinari oli givhan long ol pablisa we oli manples? Polo, blong Is Timo, i glad tumas se i gat wan misinari kapol long kongregesen blong hem. Hem i se: “Ples blong mifala i hot we i hot. Be nating se tufala i kam long ples we i kolkol, tufala i no letem weta i blokem tufala long wok blong prij. Evri moning, tufala i stap long miting blong prij. Plante taem mi luk tufala i stap mekem ol visit long medel dei, taem ples i hot we i hot, mo tu long sapa. Tufala i givhan long plante man blong oli save trutok, mo long mi tu. Wetem strong tingting mo glad, tufala i yusum ful laef blong tufala blong mekem wok blong Jehova, mo hemia i pulum evriwan long kongregesen blong traehad moa long wok blong hem.”

 Keti, wan fultaem paenia long Malawi, i talemaot olsem wanem wan misinari kapol i givhan long famle blong hem, i se: “Taem misinari kapol ya i kam long kongregesen, mi nomo mi Witnes long famle. Kapol ya i givhan bigwan long mi, mo tufala i fren gud wetem famle blong mi. Gudfala eksampol blong tufala i halpem ol pikinini blong mi blong luksave se taem yu mekem wok blong Jehova, yu glad mo laef blong yu i gat mining. From gudfala wok blong tufala misinari ya, trifala gel blong mi i kam fultaem paenia, mo hasban blong mi i stat blong joen long ol miting.”

 ?Mane i kam wea blong pem ol samting we ol misinari oli nidim? Hemia ol presen mane blong sapotem wok long fulwol, we yumi givim long ol defren rod we websaet ya donate.jw.org i tokbaot. Tangkiu tumas long presen mane we yu givim wetem gladhat.