Baebol i bin talemaot se “bambae ol nesen oli faet agensem ol narafala nesen,” mo bambae i gat ol disasta long “lashaf blong sistem blong wol ya.” (Matiu 24:3, 7) Yumi bin luk profet tok ya i kamtru long sevis yia blong 2023. a Nating se i gat ol faet mo ol disasta long klosap 100 kantri, be ol Witnes blong Jehova oli folem fasin blong Jehova blong soemaot lav long ol narafala. ?Oli mekem olsem wanem?

 Long sevis yia blong 2023, i gat bitim 200 disasta mo faet we oli spolem ol brata mo sista blong yumi. From samting ya, oganaesesen blong ol Witnes blong Jehova i spenem samwe long 1.2 bilian vatu b blong mekem wok blong disasta rilif. Hemia ol presen mane we ol man oli givim blong sapotem wok blong Kingdom long fulwol. Antap long hemia, ol brata mo sista oli glad nomo blong yusum ol samting we oli gat blong givhan long ol narafala, taem i gat disasta long ples blong olgeta. Traem luk olsem wanem oli bin yusum presen mane blong yu blong givhan long ol brata mo sista long tu disasta we i hapen.

 Long sam ples long Naejeria, oltaem long manis blong ren i gat bigfala wota we i ron. Be bigfala wota we i ron long Oktoba 2022, i spolem ol ples moa i bitim long ol 10 yia we i pas. Bigfala wota ya i spolem bitim 676,000 hekta blong ol garen (hemia i olsem 946,000 futbol fil), mo bitim tu milian man oli mas aot long ples blong olgeta. Branj ofis blong Naejeria i kwik blong putumap ol Disasta Rilif Komiti blong oli oganaesem ol wok blong disasta rilif mo blong givhan long ol brata mo sista blong oli gohed blong wosipim Jehova.

•   I gat 7,505 pablisa we oli mas aot long ples blong olgeta

•   I gat 860 haos we oli damej o nogud evriwan

•   I gat 90 Haos Kingdom mo wan Haos Asembli we bigfala wota i spolem

 Oli spenem samwe 30 milian vatu long wok blong disasta rilif, blong pem ol samting ya:

•   Ol kakae olsem raes, ol bin, mo makaroni

•   Ol samting blong haos olsem ol matres mo ol moskito net

•   Ol samting blong fiksimap o bildim bak ol haos we oli nogud

 ?Ol brata oli mekem wanem blong yusum gud ol presen mane? Wan rod hemia taem oli jekem gud ol haos fastaem, blong luk sipos oli save fiksimap. Be sipos oli mas bildim wan niufala haos, oli folem wan plan we i stret long ol haos we ol man oli gat long ples ya.

 Ol brata mo sista oli glad tumas long ol samting we ol Disasta Rilif Komiti oli mekem. Wan sista i talem se: “Bigfala wota we i ron i spolem ol garen blong mifala mo haos blong mifala. Be stret long dei ya, ol brata mo sista oli kam givhan long mifala mo givim ples blong slip long mifala, mo hemia i mekem mifala i glad tumas. Mo tu, mifala i glad taem mifala i kasem ol kakae we branj ofis i sanem. Mifala i sapraes tumas blong luk we ol tok blong Jon 13:34, 35 i kamtru long laef blong mifala. . . . Yes, hemia nao trufala lav. Mi mo famle blong mi, mifala i wantem talem bigfala tangkiu long ol brata mo sista we oli kam givhan long mifala long stret taem we mifala i nidim.”

 Ol narafala man long komuniti tu oli luk ol wok we ol Disasta Rilif Komiti oli mekem. Wan jif long komuniti blong Sabagreia long Bayelsa Stet, i talem se: “I gat plante oganaesesen o jos long wol, be ol Witnes blong Jehova nomo oli stap mekem ol wok olsem. . . . Oganaesesen [blong yufala] i wan long ol beswan oganaesesen long wol.”

 Long Februari 2023, i gat bitim 400 faea we oli spolem gud ol ples long Jili. Ol faea ya oli spolem bitim 430,000 hekta blong graon (hemia i olsem 602,000 futbol fil) wetem plante long ol impoten samting long ol taon blong Jili. Samwe 8,000 man oli mas aot long ples blong olgeta. Stret afta long disasta ya, branj ofis i stat blong oganaesem wok blong disasta rilif.

•   I gat 222 pablisa we oli mas aot long ples blong olgeta

•   I gat 20 haos we faea i bonem fulwan

 Oli spenem samwe 24 milian vatu long wok blong disasta rilif, blong pem ol samting olsem:

•   Kakae mo wota

•   Fuel, ol samting we oli yusum blong klinim ples, mo meresin

•   Ol samting blong bildim bak ol haos

 Wan famle i harem nogud tumas taem oli luk we faea i spolem evri samting we oli gat, olsem haos blong olgeta mo bisnes blong olgeta. Hemia i mekem se famle ya i no moa gat rod blong winim mane. Fastaem famle ya i harem nogud tumas blong luk se ples we haos blong olgeta i bin stap long hem bifo, i emti nomo i stap. Be taem oli luk se ol brata mo sista oli stap bildim bak haos blong olgeta, oli stat blong harem gud bakegen. Lav we ol brata mo sista oli soemaot i leftemap tingting blong famle ya. Ekspiriens ya i tajem hat blong olgeta, nao oli joenem ol brata mo sista blong bildim bak haos blong wan narafala brata.

 Wok blong disasta rilif i tajem hat blong plante brata mo sista. Wan brata i talem se: “Plan ya we Jehova i stanemap blong gat ol Disasta Rilif Komiti i nambawan tumas. Long dei afta long disasta, oli kwik blong kam mo givim ol samting we mifala i nidim. Yumi glad blong ridim ol stori blong wok blong disasta rilif long ol narafala ples long wol. Be taem yu luk wok we oli mekem wetem prapa ae blong yu, hemia i defren. I mekem se yu tinghae moa long oganaesesen blong Jehova, from yu luksave se ol brata ya oli soemaot ol gudfala fasin blong Jehova, mo oli meksua se yumi gat ol samting we yumi nidim long saed blong bodi mo wosip, mo blong yumi harem gud bakegen. Yes, mifala i luk lav blong Jehova long prapa ae blong mifala.”

 Taem en blong sistem blong wol ya i stap kam klosap, bambae i gat plante moa disasta. (Luk 21:10, 11) Nating se i olsem, King blong yumi Jisas Kraes i gohed blong yusum Kristin kongregesen blong soemaot se hem i stap wetem yumi “oltaem, gogo kasem lashaf blong sistem blong wol.” (Matiu 28:20) Ol presen mane we yu glad blong givim tru long donate.jw.org mo ol narafala rod, mo taem mo paoa blong yu we yu yusum long wok blong Jehova, i soemaot se yu stap sapotem Kingdom mo King blong hem Jisas Kraes. Tangkiu tumas from ol presen mane we yu stap givim long gladhat.