Yumi evriwan i save jusum rod blong yumi. Yumi wosipim Jehova, no yumi wosipim Setan wetem ol rabis enjel blong hem. Be yumi no save wosipim Jehova mo Setan wantaem. !Yu yu waes sipos yu wosipim Jehova nomo!

Olsem yumi luk finis, ol rabis spirit oli harem gud taem oli spolem ol man mo oli giaman long olgeta. Jehova i no olsem. Hem i laekem tumas ol man, olsem we wan papa i laekem tumas ol pikinini blong hem. Hem i givim “evri samting we oli gud mo evri presen we oli nambawan.” (Jemes 1:17) Hem i glad blong givim ol gudfala samting long ol man, hem i no save blokem olgeta, nating we hem i mas pem bigfala praes from.—Efesas 2:4-7.

Tingbaot ol samting we Pikinini blong God, Jisas i mekem, taem hem i stap long wol. Hem i mekem man we i no save toktok, i toktok bakegen. Hem i mekem man we i blaen, i save lukluk bakegen. Hem i mekem man we i gat sik ya leprosi, i kamgud bakegen. Mo hem i mekem leg blong man we i no save wokbaot, i kamgud bakegen. Hem i ronemaot ol rabis spirit long sam man. Mo hem i mekem ol defren kaen sik i finis. Long paoa blong God, Jisas i mekem we sam man oli laef bakegen.—Matiu 9:32-35; 15:30, 31; Luk 7:11-15.

God i no save giaman long yumi blong lidim yumi go krangke. Oltaem hem i tok tru. Hem i no save giaman long eni man.—Namba 23:19.

Bed blong spaeda i save holem wan flae i fas, nao flae ya i no moa fri. Long sem fasin, plante milian man oli fas long ol giaman tijim mo kastom. Oli fraet long ol dedman. Oli fraet long ol rabis spirit. Oli wari se wan man bambae i mekem wan samting long olgeta. Oli traem blong lukaot mining blong ol smosmol samting we i hapen. Mo oli holem sam samting we oli ting se i save givim laki long olgeta no we i save protektem olgeta. Ol bilif mo ol kastom ya, oli stanap long ol giaman toktok blong Setan. Be ol man blong Jehova, oli no fas long ol giaman tijing ya.

Jehova i gat moa paoa, bitim Setan. Sipos yu wosipim Jehova, bambae hem i protektem yu, nao ol rabis spirit oli no save gat paoa long yu. (Jemes 4:7) Sipos wan man i mekem wan samting long yu blong spolem yu, samting ya i no save gat paoa long yu. Eksampol, long Naejeria, tri kleva oli wantem mekem wan samting blong kilim ded wan Witnes blong Jehova we i no wantem aot long taon. Be ol samting we oli mekem i no wok. Nao wan long ol trifala kleva ya i fraet, mo i go luk Witnes ya, i askem hem blong i fogivim hem.

Sipos ol rabis spirit oli mekem trabol long yu, yu save singaot long Jehova. Yu mas yusum nem blong hem, mo hem bambae i protektem yu. (Ol Proveb 18:10) Be sipos yu wantem se God i protektem yu, yu mas lego olgeta samting we oli joen wetem wok blong ol rabis spirit mo wosip blong olgeta. Long Efesas bifo, ol man we oli wosipim God oli mekem olsem. Oli hivimap ol buk blong olgeta we oli tokbaot majik, nao oli bonem olgeta long faea. (Ol Wok 19:19, 20) Tede ol man blong God oli mas mekem sem mak. Yu mas bonem ol samting we yu holem blong givim laki, ol samting we yu werem blong lukaot long yu, ol string blong “protektem” yu, ol samting we yu holem from we yu ting se i gat paoa long laef blong yu, ol buk blong majik, mo ol narafala samting we oli joen wetem wok blong ol rabis spirit.

Sipos yu wantem mekem God i glad, i no naf we yu lego ol giaman wosip mo yu no moa mekem ol rabis samting. Yu mas mekem sam moa samting. Yu mas wosipim God long fasin we i tru. Baebol i talem samting we yumi mas mekem:

Setan wetem ol rabis enjel blong hem, oli yusum sam man long wol blong tijim mo mekem ol rabis wok. Be Jehova tu i gat ol man blong hem we oli stap long wol, hemia ol Witnes blong Jehova. (Aesea 43:10) I gat klosap eit milian Witnes long wol. Olgeta evriwan oli traehad blong mekem ol gudfala samting mo blong tijim ol man long trutok. Klosap long evri kantri, yu save faenem ol Witnes blong Jehova long Haos Kingdom blong olgeta. Bambae oli welkamem gud yu long ol miting blong olgeta.

Wok blong olgeta i blong givhan long ol narafala blong wosipim God. Bambae olgeta oli glad blong stadi Baebol wetem yu long haos blong yu. Olgeta oli wantem givhan long yu blong save olsem wanem blong wosipim Jehova long fasin we i stret. Yu no pem olgeta from. Ol Witnes blong Jehova oli glad blong tijim trutok long ol man, from we oli lavem Jehova tumas, mo ol man.