Taem Jisas i stap wetem ol aposol blong hem long wan rum antap, hem i talem se: ‘Tunaet, bae yufala evriwan i lego mi.’ Be Pita i se: ‘!Nogat! Maet ol narawan oli save lego yu, be bae mi mi neva lego yu.’ Nao Jisas i talem long Pita se: ‘Bifo we wan man faol i singaot, bae yu yu talem tri taem se yu no save mi.’

Taem ol soldia oli tekem Jisas i go long haos blong Kaeafas, plante long ol aposol oli ronwe. Be i gat tu nomo we tufala i folem ol man we oli holem Jisas. Pita nao i wan long tufala. Hem i go long yad blong haos blong Kaeafas mo i go klosap long faea blong stap wom. Nao wan haosgel i luksave hem, mo i talem se: ‘!Mi save yu! !Yu yu stap folem Jisas!’

Be Pita i talem se: ‘!Nogat! !Mi mi no save samting we yu stap talem!’ Nao hem i wokbaot i go long get. Be wan narafala haosgel bakegen i luksave hem, mo i talem long ol man se: ‘!Man ya i wan man blong Jisas!’ Be Pita i se: ‘!Mi mi no save man ya Jisas!’ Wan narafala man i talem se: ‘!Yu yu wan long olgeta ya! Fasin blong yu blong toktok i olsem wan man Galili, olsem Jisas.’ Be Pita i talem strong se: ‘!Mi mi no save man ya!’

Stret long taem ya, wan man faol i singaot. Nao Jisas i tanem hem mo i lukluk Pita. Pita i tingbaot ol tok blong Jisas, ale hem i go afsaed mo i krae we i krae.

Kaonsel blong Sanhedrin i mekem plan blong tekem Jisas i go long haos blong Kaeafas blong i pas long kot. Oli plan finis blong kilim Jisas i ded, mo naoia oli stap traem blong faenem poen long hem, be oli no faenem wan poen nating. Nao Kaeafas i askem stret long Jisas se: ‘?Yu yu pikinini blong God?’ Jisas i se: ‘Yes.’ Nao Kaeafas i se: ‘Yumi no nidim wan pruf bakegen. !Hem i tok nogud finis long God!’ Nao oli jajem hem se: ‘Hem i mas ded.’ Oli slavem hem, oli spet long hem, oli blokem  ae blong hem mo oli faetem hem, nao oli se: ‘!Ei profet! ?Yu traem talem se hu i stap faetem yu?’

Long moning, oli tekem Jisas i go long haos we Sanhedrin i stap mit long hem, nao oli askem long hem bakegen se: ‘?I tru se yu yu pikinini blong God?’ Hem i ansa se: ‘Yufala i talem finis.’ Ale, oli jajem hem se i mas ded from we hem i tok nogud long God, nao oli tekem hem i go long haos blong Ponjes Paelat, we i hed gavman blong Rom. ?Oli mekem wanem long hem? Bambae yumi luk.