Afta long lafet blong Pasova, Jisas mo ol disaepol blong hem oli gobak long Galili, be oli pastru long Sameria. Oli kam kasem wel blong Jekob we i klosap long taon ya Saeka. Jisas i sidaon long ples ya blong spel, mo ol disaepol oli go long taon blong pem kakae.

Nao wan woman i kam blong kasem wota long wel ya. Jisas i talem long hem se: “Yu givim smol wota long mi.” Woman ya i talem se: ‘?Olsem wanem yu toktok long mi? Mi mi wan woman Sameria. Ol man Jiu oli no toktok long ol man Sameria.’ Jisas i talem se: ‘Sipos yu save mi, bae yu askem wota long mi, nao mi bae mi givim wota blong laef long yu.’ Woman ya i askem se: ‘?Yu minim wanem? Yu no gat wan baket blong kasem wota.’ Jisas i talem se: ‘Man we i dring wota we mi mi givim, bae i no save tosta bakegen.’ Woman ya i talem se: “Masta, yu givim wota ya long mi.”

Biaen, Jisas i talem se: ‘Yu singaot man blong yu i kam.’ Woman ya i se: ‘Mi mi no gat man.’ Jisas i se: ‘Yu talem tru. Yu mared faef taem finis, mo naoia yu stap wetem wan man we i no man blong yu.’ Woman ya i talem se: ‘Mi luk se yu yu wan profet ya. Ol manples blong mi oli bilif se mifala i mas wosipim God long bigfala hil ya. Be ol man Jiu oli talem se Jerusalem nomo i stret ples blong wosipim God. Mi ting se taem Mesaea i kam, bae hem i tijim yumi long stret rod blong mekem wosip.’ Nao Jisas i talem wan samting we hem i neva talemaot bifo, i se: ‘Mi nao mi Mesaea.’

 Woman ya i resis i gobak long taon mo i talemaot se: ‘Mi ting se mi luk Mesaea. Hem i save olgeta samting we mi mi mekem. !Yufala i kam luk!’ Ale, oli folem hem i gobak long wel, mo oli lesin long ol tok blong Jisas.

Nao oli askem long Jisas blong i stap long taon blong olgeta. Ale, hem i stap tu dei blong tijim olgeta, mo plante man oli bilif. Oli talem long woman Sameria ya, se: ‘Mifala i bilif se man ya bae i sevem ol man long wol.’