?Samtaem yu stap tingting bak long ol gudfala taem we yu gat wetem ol man blong Jehova? Maet yu tingbaot wan miting we i leftemap tingting blong yu bigwan, no wan bigfala asembli, no wan gudfala samting we i hapen long wok blong prij, no maet wan gudfala storian wetem narafala brata no sista nomo. Yu yu no fogetem Jehova yet, mo hem i no fogetem yu. Hem i tingbaot yet ol gudfala wok we yu yu mekem finis. Mo hem i wantem givhan long yu blong yu kambak long hem.

Jehova i talem se: “Mi bambae mi go lukaot ol sipsip blong mi gogo mi faenem olgeta, mo bambae mi stap lukaot gud long olgeta. Olgeta oli bin ronwe long taem blong trabol, oli go stap wanwan olbaot long ol narafala ples, be mi bambae mi tekem olgeta oli kambak bakegen.”—Esikel 34:11, 12.