HAF 13
?Wanem Bambae i Hapen Long Ol Skul?
1. ?Olgeta skul oli gud?
I gat sam man long olgeta skul we oli wantem mekem God i glad. God i luk ol man ya mo hem i stap tingbaot olgeta. Hemia wan gud nius. Be sore tumas, plante man we oli strong long skul blong olgeta, oli mekem ol nogud fasin. (2 Korin 4:3, 4; 11:13-15) Ol niuspepa oli tokbaot sam skul we oli mekem wok blong teroris, no oli traem kilimaot wan laen blong man we oli no laekem olgeta, no oli joen long faet, no oli mekem i nogud long ol pikinini. !Samting ya i mekem ol man we oli bilif strong long God, oli harem nogud!—Ridim Matiu 24:3-5, 11, 12.
Skul we i tru i leftemap nem blong God, be skul we i giaman i mekem God i harem nogud. Ol giaman skul oli tijim ol man long ol samting we i no stap long Baebol. Oli mekem olsem taem oli tokbaot God mo ded. Be Jehova i wantem se ol man oli save trutok.—Ridim Prija 9:5, 10; 1 Timoti 2:3-5.
2. ?Wanem bambae i hapen long ol giaman skul?
Plante skul oli talem se oli lavem God, be ol samting we oli mekem i soemaot se oli laekem moa ol fasin blong wol ya blong Setan. Be oli no save giaman long Jehova. ( Jemes 4:4) Afta we Bigfala Wota i ron long taem blong Noa, giaman skul i stat long taon ya Babilon. Baebol i kolem ol giaman skul se ‘Bigfala Babilon.’ I no longtaem, bambae ol man oli sek se God i spolem ol skul we oli stap giaman long ol man mo oli mekem i strong long olgeta.—Ridim Revelesen 17:1, 2, 5, 16, 17; 18:8.
Be Jehova i no fogetem ol man we oli wantem mekem hem i glad, we oli stap long ol giaman skul olbaot long wol. Hem i stap tijim ol man ya long trutok, nao oli kamaot long ol giaman skul.—Ridim Maeka 4:2, 5.
3. ?Man we i wantem mekem God i glad, i mas mekem wanem?
Skul we i tru i mekem ol man oli joen gud
Jehova i stap tingbaot ol man we oli wantem save trutok, mo we oli wantem mekem samting we i stret. Hem i talem long olgeta se oli mas aot long ol giaman skul. Ol man we oli lavem God oli glad blong jenisim ol fasin we God i no laekem.—Ridim Revelesen 18:4.
Long taem blong ol aposol, i gat sam man we oli wantem mekem God i glad. Taem oli harem ol tok blong Baebol we ol aposol oli talemaot, oli glad tumas. Jehova i tijim olgeta long wan niufala fasin blong laef, we i mekem olgeta oli glad, nao oli putum tingting blong olgeta i stap strong long God, mo oli yusum laef blong olgeta olsem God i wantem. Oli soemaot gudfala eksampol long yumi from we taem oli harem ol tok blong Baebol, oli putum ol samting we Jehova i wantem oli stap long fasples long laef blong olgeta.—Ridim 1 Tesalonaeka 1:8, 9; 2:13.
Jehova i glad tumas blong tekem ol man we oli kamaot long ol giaman skul, oli kam joen wetem ol man we oli wosipim hem. Sipos yu lesin long Jehova, bambae yu kam fren blong hem. Bambae yu joen long wan niufala famle blong ol man blong hem we oli lavem yu, mo bambae yu kasem laef we i no save finis.—Ridim Mak 10:29, 30; 2 Korin 6:17, 18.
4. ?Bambae God i mekem wanem blong olgeta man oli glad?
Nius ya se God bambae i jajem ol giaman skul, hemia wan gud nius. Bambae i no moa gat man we i mekem i strong tumas long narafala man. Bambae i no moa gat ol giaman skul we oli lidim ol man oli gorong, mo we oli mekem ol man oli seraot. Bambae olgeta man oli joen gud blong wosipim tru God nomo.—Ridim Revelesen 18:20, 21; 21:3, 4.
