1. ?Hu i save talem stret rod blong wosipim God?

KLOSAP olgeta skul oli talem se oli tijim trutok. Be i no olsem, from we ol skul oli tijim ol defdefren samting long saed blong God mo rod blong wosipim hem. ?Hu i save talem stret rod blong wosipim God? Jehova nomo i save talem.

2. ?Olsem wanem blong lanem stret rod blong wosipim God?

² Jehova i givim Baebol, blong yumi save lanem stret rod blong wosipim hem. Taswe yu mas gohed blong stadi Baebol, nao Jehova bambae i givhan long yu blong yu folem ol tijing blong hem, from we hem i stap tingbaot yu.—Aesea 48:17.

3. ?I impoten tumas we yumi mekem wanem?

³ Samfala oli talem se God i glad long olgeta skul. Be Jisas i tijim samting we i defren, i se: “I no evri man we oli stap singaot mi se ‘Masta, Masta,’ we bambae oli go insaed long Kingdom blong heven. Olgeta nomo we oli stap mekem samting we Papa blong mi long heven i wantem, bambae oli go.” Taswe, i impoten tumas we yumi kasem save long samting we God i wantem, mo yumi obei. Jisas i talem se man we i no obei long God, hem i “man blong brekem loa.”—Matiu 7:21-23.

4. Folem tok blong Jisas, ?i isi blong mekem samting we God i wantem? Eksplenem.

⁴ Jisas i talem se samtaem i no isi blong mekem samting we God i wantem, i se: “Yufala i mas pas long get ya we i smol, from we get we i bigwan mo rod we i isi,  i lidim man i go long ded, mo plante man oli stap folem rod ya. Be get ya we i smol mo rod we i strong, i lidim man i go long laef, mo smol man nomo oli faenem.” (Matiu 7:13, 14) Stret rod blong wosipim God we i smol, i lidim man blong kasem laef blong olwe. Rod we i no stret mo i bigwan, i lidim man i go long ded. Jehova i wantem se olgeta man oli kasem laef, i no wantem we wan man i ded. Taswe hem i givim janis long evriwan blong oli kasem save long hem.—2 Pita 3:9.

5. ?Olsem wanem blong luksave skul we i tru?

⁵ Blong luksave skul we i tru, yumi mas skelem ol tijing mo wok blong ol skul. Jisas i talem se: “Bambae yufala i luksave olgeta long frut blong laef blong olgeta.” Mo hem i gohed se: “Ol gudfala tri oli karem ol gudfala frut nomo.” (Matiu 7:16, 17) Hemia i no min se ol man we oli wosipim tru God oli stret gud, nogat. Be oli traehad oltaem blong mekem samting we i stret. Naoia bambae yumi tokbaot ol tijing mo wok blong skul we i tru.

6, 7. ?From wanem wosip i mas stanap long Baebol? ?Jisas i soemaot wanem eksampol?

⁶ Wosip i mas stanap long Baebol. Tok blong God i talem se: “Olgeta tok blong Baebol oli kamaot long God. . . . Ol tok ya i stret gud blong tijim ol man, mo blong soemaot ol samting we i no stret, mo blong stretem olgeta samting, mo blong stretem tingting blong man blong i folem ol stret rul blong God, blong mekem se ol man blong God oli naf blong mekem wok, mo oli gat evri samting we oli nidim blong mekem evri gudfala wok.” (2 Timoti 3:16, 17) Aposol Pol i raetem leta i go long ol Kristin se: “Taem mifala i talemaot tok blong God long yufala, yufala i akseptem. Yufala i no tekem olsem we i  tok blong man nomo, be yufala i kasemgud se hem i tok blong God.” (1 Tesalonaeka 2:13) Wosip we i tru i stanap long Baebol, be i no long ol tingting mo kastom blong man, no long wan narafala samting.

⁷ Ol tijing blong Jisas oli stanap long Tok blong God. (Ridim Jon 17:17.) Plante taem hem i yusum ol tok we i kamaot stret long Baebol. (Matiu 4:4, 7, 10) Ol man blong God oli folem eksampol blong Jisas. Evri samting we oli tijim i kamaot long Baebol.

8. ?Jisas i tijim wanem long saed blong wosip?

⁸ Wosip i mas go long Jehova nomo. Ol Sam 83:18 i talem se: “Yu, we nem blong yu Jehova, yu nomo yu Hae God blong olgeta ples long wol.” Jisas i wantem se ol man oli save God ya we i tru, taswe hem i tijim ol man long nem blong God. (Ridim Jon 17:6.) Jisas i talem se: “Yu mas mekem wosip long Jehova nomo we i God blong yu, mo yu mas mekem tabu wok blong hem nomo.” (Matiu 4:10) Taswe, ol man blong God oli folem eksampol blong Jisas. Oli wosipim Jehova nomo, mo oli yusum nem blong hem oltaem. Mo tu, oli tijim ol narafala long nem blong God, mo long samting we hem bambae i mekem long ol man.

9, 10. ?Yumi soemaot olsem wanem se yumi lavlavem yumi?

⁹ Yumi mas lavlavem yumi we yumi no giaman. Jisas i tijim ol disaepol blong hem se oli mas lavlavem olgeta. (Ridim Jon 13:35.) Nomata wanem ples mo kalja yumi kamaot long hem, nomata sipos yumi rij no yumi pua, be lav i joenem yumi evriwan olsem ol brata mo sista. (Kolosi 3:14) Taswe, yumi no joen long ol bigfala faet mo kilim ol narafala oli ded. Baebol i talem se: “Samting we i soemaot klia se hu i pikinini blong God, mo hu i pikinini blong Setan, i olsem: Man we i no stap  mekem samting we i stret, hem i no kamaot long God, mo hemia i sem mak long man we i no lavem brata blong hem.” Mo i gohed se: “Yumi mas lavlavem yumi, yumi no mas kam olsem Ken we i pikinini blong Man ya we i rabis, mo i kilim brata blong hem i ded.”—1 Jon 3:10-12; 4:20, 21.

¹⁰ Yumi yusum taem, paoa, mo olting blong yumi, blong givhan long ol narafala mo leftemap tingting blong olgeta. (Hibrus 10:24, 25) Yumi “mekem i gud long olgeta man.”—Galesia 6:10.

11. ?From wanem yumi mas obei long Jisas?

¹¹ Yumi mas obei long Jisas from we hem nomo i rod blong kam long God. Baebol i talem se: ‘I no gat wan narafala man nating we i save sevem yumi, from we God i no givim nem blong wan narafala man we hem i stap yusum blong sevem yumi.’ (Ol Wok 4:12) Long Japta 5 blong buk ya, yumi lanem se Jehova i sanem Jisas i kam long wol, blong i ded olsem wan ransom sakrefaes blong pemaot ol man we oli obei long God. (Matiu 20:28) Jehova i jusum Jisas blong i rul olsem King antap long wol. Taswe, Baebol i talem se, sipos yumi wantem laef olwe, yumi mas obei long Jisas.—Ridim Jon 3:36.

12. ?From wanem yumi no mas joen long politik?

¹² Yumi no mas joen long politik. Jisas i no joen long politik. Hem i talem long Paelat, rula blong ol man Rom, se: “Kingdom blong mi i no blong wol ya.” (Ridim Jon 18:36.) Olsem Jisas, yumi stanap strong long saed blong Kingdom blong God long heven. Taswe, nomata wanem kantri yumi stap long hem, yumi no joen long politik. Be Baebol i talem se yumi mas obei long “ol haeman we oli stap rul,” hemia ol gavman. (Rom 13:1) Taswe, yumi obei long ol loa we gavman i putumap. Be  sipos wan loa i agensem loa blong God, yumi mekem olsem ol aposol we oli talem se: “Mifala i mas obei long God we i rula blong mifala, i bitim we mifala i obei long ol man.”—Ol Wok 5:29; Mak 12:17.

13. Taem yumi prij, ?yumi talemaot wanem?

¹³ Yumi bilif se Kingdom blong God nomo i save stretem ol trabol long wol. Jisas i talem se, bambae ol man oli talemaot ‘gud nius blong Kingdom’ long olgeta ples long wol. (Ridim Matiu 24:14.) I no gat wan gavman blong man we i naf blong mekem samting we Kingdom blong God bambae i mekem. (Ol Sam 146:3) Jisas i tijim yumi blong prea from Kingdom ya, i se: “Yu mekem Kingdom blong yu i kam. Yu mekem samting we yu wantem i kamtru long wol ya olsem long heven.” (Matiu 6:10) Baebol i talem se Kingdom blong God bambae i finisim ol gavman blong man, mo kingdom ya bambae “i rul oltaem gogo i no save finis.”—Daniel 2:44.

14. ?Yu ting se hu nao i stap folem stret rod blong wosipim God?

¹⁴ Naoia we yumi stadi finis long ol tijing mo wok blong skul we i tru, yu traem tingbaot: ‘?Wanem skul we ol tijing blong hem oli stanap long Baebol? ?Hu olgeta we oli tokbaot nem blong God long ol narafala? ?Hu olgeta we oli lavlavem olgeta, mo oli bilif se God i sanem Jisas blong sevem yumi? ?Wanem skul we i no joen long politik? ?Hu olgeta we oli stap talemaot se Kingdom blong God nomo i save stretem ol problem?’ !Hemia ol Witnes blong Jehova nomo!—Aesea 43:10-12.

15. ?Yumi mas mekem wanem, blong God i glad long wosip blong yumi?

¹⁵ I no naf blong bilif se God i stap. Ol rabis enjel tu oli bilif olsem, be oli no obei long God. (Jemes 2:19)  Sipos yumi wantem se God i glad long wosip blong yumi, yumi mas bilif se hem i stap, mo tu, yumi mas mekem ol samting we hem i talem.

16. ?From wanem yumi mas kamaot long ol giaman skul?

¹⁶ Yumi mas kamaot long ol giaman skul, nao God i save glad long wosip blong yumi. Profet Aesea i raetem se: “Yufala i mas aot. . . . Yufala i mas mekem we yufala i klin.” (Aesea 52:11; 2 Korin 6:17) Taswe, yumi mas stap longwe long eni samting we i joen wetem giaman wosip.

17, 18. ?Wanem ya “Bigfala Babilon,” mo from wanem yu mas hareap blong kamaot long hem?

¹⁷ ?Giaman skul i minim wanem? Giaman skul, hemia enikaen skul we ol tijing blong hem oli no laenap wetem Baebol. Baebol i kolem ol giaman skul se “Bigfala Babilon.” (Revelesen 17:5) ?From wanem? From we, plante giaman tijing oli stat long taon ya Babilon, afta we bigfala wota i ron long taem blong Noa. Nao ol giaman tijing ya oli kasem ol man long olgeta ples blong wol. Ol man Babilon bifo oli wosipim tri god we oli joen wanples. Tede tu, plante skul oli tijim se i gat tri god we oli joen wanples, hemia Triniti. Be Baebol i tijim se i gat wan tru God nomo, hemia Jehova, mo se, Jisas i Pikinini blong hem. (Jon 17:3) Narafala tijing we ol man Babilon bifo oli bilif long hem, hemia se taem man i ded, wan samting i kamaot long bodi nao i gohed blong laef samples, no maet i go bon long helfaea. Be tijing ya tu i giaman.—Yu luk Ol Not 14, 17, mo 18.

¹⁸ God i talem se i no longtaem, ol giaman skul bambae oli lus. (Revelesen 18:8) ?Yu kasem save from wanem yu mas hareap blong kamaot long ol giaman skul? Jehova i wantem se yu kamaot bifo we i let tumas.—Revelesen 18:4.

19. Taem yu wosipim Jehova, ?olsem wanem hem i lukaot gud long yu?

 ¹⁹ Taem yu kamaot long ol giaman skul mo yu wosipim Jehova, maet sam famle mo fren blong yu oli no kasem save, nao oli agensem yu. Be Jehova i no save lego yu. Bambae yu joen long wan famle blong plante milian man long fulwol, we oli lavlavem olgeta long fasin we i no giaman. Mo tu, bambae yu gat hop blong kasem laef we i no save finis long niufala wol. (Mak 10:28-30) Biaen, maet sam fren mo famle we oli agensem yu, bambae oli wantem stadi Baebol.

20. ?From wanem i impoten blong folem stret rod blong wosipim God?

²⁰ I no longtaem, bambae God i spolem ol rabis fasin, nao Kingdom blong hem bambae i rulum wol. (2 Pita 3:9, 13) !Bambae i nambawan tumas! Evriwan bambae oli wosipim Jehova long fasin we hem i wantem. Taswe, i impoten we yu tekem aksen naoia mo folem stret rod blong wosipim God.