1. ?Olsem wanem blong save samting we bambae i hapen?

TAEM yu wajem nius long TV no yu lesin long radio, maet yu talem se: ‘!Man, ol samting ya oli nogud tumas! ?Wanem bambae i hapen?’ I gat plante bigfala trabol long wol, fulap man oli stap ded, mo ol man oli no moa gat sore long narafala. Taswe sam man oli ting se en blong wol ya i klosap. ?Olsem wanem? ?Tingting ya i stret? ?I gat rod blong save samting we bambae i hapen long fiuja? Yes. Ol man oli no save wanem bambae i hapen, be Jehova God i save. Hem i talem long Baebol wanem bambae i hapen long wol mo ol man.—Aesea 46:10; Jemes 4:14.

2, 3. ?Ol disaepol blong Jisas oli askem wanem? ?Jisas i ansa olsem wanem?

² Long Baebol, tok ya ‘en blong wol’ i no minim en blong graon we yumi wokbaot long hem, be i minim en blong ol nogud samting we oli stap hapen. Jisas i tijim se Kingdom blong God bambae i rulum wol. (Luk 4:43) Ol disaepol blong Jisas oli wantem save wetaem Kingdom ya bambae i kam, ale, oli askem se: “?Ol samting ya bambae oli hapen wetaem? ?Mo wanem saen bambae i soemaot se yu yu stap, mo se hem i en blong wol?” (Matiu 24:3) Jisas i no talem wan stret taem, be hem i tokbaot ol samting we bambae oli hapen jes bifo long en blong wol. Ol samting we Jisas i tokbaot oli stap hapen tede.

³ Long japta ya, bambae yumi tokbaot ol samting we  oli soemaot se yumi stap klosap nomo long en blong wol. Fastaem, bambae yumi tokbaot wan faet we i kamaot long heven, nao bambae yumi kasem save from wanem ol nogud samting oli stap hapen.

4, 5. (1) ?Wanem i hapen long heven taem Jisas i kam King? (2) Folem Revelesen 12:12, ?wanem bambae i hapen long wol?

⁴ Long Japta 8, yumi lanem se Jisas i kam King long heven long yia 1914. (Daniel 7:13, 14) Buk blong Revelesen i tokbaot samting we i hapen, i se: “Wan bigfala faet i stat long heven: Maekel [hemia Jisas] wetem ol enjel blong hem oli stap faet agens long bigfala algita ya [hemia Setan]. Nao bigfala algita ya wetem ol enjel blong hem oli faet.” * Setan mo ol rabis enjel blong hem oli lus long faet ya, mo Jisas i sakemaot olgeta oli kamdaon long wol. !Traem tingbaot olsem wanem ol gudfala enjel long heven oli glad! ?Be olsem wanem long ol man long wol? Baebol i talem se bambae i gat trabol long wol. ?From wanem? From we Setan i kros tumas, mo “hem i save se i gat smol taem nomo blong hem i stap.”—Revelesen 12:7, 9, 12.

⁵ Setan i stap yusum ful paoa blong hem blong mekem plante trabol long wol. Hem i kros we i kros from we hem i save se i gat smoltaem nomo i stap, nao God bambae i finisim ol wok blong hem. Naoia, yumi save tokbaot ol samting we Jisas i talem se bambae oli hapen long ol las dei.—Yu luk Ol Not 24.

6, 7. ?Olsem wanem ol tok blong Jisas long faet mo hanggri oli stap kamtru tede?

⁶ Faet. Jisas i talem se: “Bambae ol kantri oli faet  agensem ol narafala kantri, mo ol kingdom oli faet agensem ol narafala kingdom.” (Matiu 24:7) Stat long 1914, plante moa man oli ded long faet i bitim olgeta yia bifo. Wan grup we i stadi long ol samting we i hapen, i talem se, long ol yia bifo long 1914 (yia 1-1914), klosap 30 milian man oli ded long ol faet. Be long ol yia afta long 1914 (yia 1914-2000), namba ya i go antap bigwan, i kasem moa long 100 milian man. !Traem tingbaot olsem wanem plante milian man oli safa mo harem nogud from ol faet ya!

⁷ Hanggri. Jisas i talem se: “Bambae kakae i sot.” (Matiu 24:7) Naoia, i gat plante kakae i bitim ol narafala taem bifo, be plante man oli hanggri yet. ?From wanem? From we oli no gat mane blong pem kakae mo pem graon blong wokem garen. Bitim wan bilian man long wol oli gat 100 vatu nomo evri dei blong pem ol samting. Wol Helt Ogenaesesen i talem se moa long faef milian pikinini oli ded evri yia, from we oli no kasem naf kakae blong mekem bodi i strong.

8, 9. ?Olsem wanem profet tok blong Jisas long etkwek mo sik i stap kamtru?

 ⁸ Etkwek. Jisas i talem se: “Bambae graon i seksek bigwan.” (Luk 21:11) Evri yia ol man oli save se bambae i gat plante moa bigfala etkwek. Stat long yia 1900, bitim tu milian man oli ded long ol etkwek. Naoia i gat ol masin blong soemaot se etkwek i stap kam. Nating se i olsem, plante man oli stap ded yet long ol etkwek.

⁹ Sik. Jisas i talem se bambae i gat “ol strong sik.” Ol sik ya oli pas i go kwiktaem long ol man, mo plante man oli ded from. (Luk 21:11) Nating se ol dokta oli gat save long ol sik ya, be oli no save winim evriwan. Wan ripot i talem se evri yia, plante milian man oli ded from ol sik olsem tibi, malaria, mo kolera. Antap long hemia, oli faenemaot 30 niufala sik, mo sam long olgeta, i no gat meresin blong olgeta.

10. ?Wanem ol tok long 2 Timoti 3:1-5 we i stap kamtru tede?

¹⁰ Seken Timoti 3:1-5 i talem se: “Long ol las dei, laef bambae  i strong tumas mo bambae i had blong winim ol trabol.” Aposol Pol i tokbaot fasin blong ol man long ol las dei ya. Hem i talem se bambae

• oli tingbaot olgeta nomo

• oli laekem mane tumas

• oli no obei long papa mo mama blong olgeta

• oli no stap tru long narafala

• oli no gat sore long ol famle

• oli no bos long tingting blong olgeta

• oli faet mo kilim narafala

• oli laekem moa ol samting we oli save harem gud long hem i bitim we oli lavem God

• oli mekem olsem se oli lavem God be oli no wantem obei long hem

11. Folem Ol Sam 92:7, ?wanem bambae i hapen long ol man nogud?

¹¹ Long ples blong yu, ?ol man oli gat ol fasin ya? Long olgeta ples long wol, plante man oli gat ol fasin olsem. Be i no longtaem, God bambae i spolem ol man nogud. Baebol i talem se: “Ol man nogud oli save gru kwik olsem rabis gras, olgeta evriwan we oli stap mekem ol  fasin nogud oli save win long plante samting, be bambae [God i] spolemgud olgeta.”—Ol Sam 92:7.

12, 13. ?Long ol las dei, Jehova i tijim ol man blong hem long wanem?

¹² Baebol i talem se long ol las dei, ol man bambae oli harem nogud mo oli safa. Be Baebol i tokbaot plante gudfala samting tu we bambae oli hapen long ol las dei.

¹³ Kasem save long Baebol. Profet Daniel i tokbaot ol las dei, i se: “Tru save bambae i kam fulap.” (Daniel 12: 4, NW) Long ol las dei, afta long yia 1914, God i givhan long ol man blong hem blong oli kasem plante moa save long Baebol. Hem i tijim olgeta long nem blong hem, from wanem nem ya i impoten, ol samting we hem i wantem se oli kamtru long wol, ransom sakrefaes blong Jisas, dedman i go wea, mo laef bakegen. Oli kasem save se Kingdom blong God nomo i naf blong stretem ol problem long wol. Mo tu, hem i tijim olgeta olsem wanem blong kasem glad, mo olsem wanem blong mekem ol fasin we hem i glad long olgeta. ?Ol man blong God oli mekem wanem long ol samting we oli lanem? Wan narafala profet tok i ansa long kwestin ya.—Yu luk Ol Not 21 mo 25.

14. ?Wok blong talemaot gud nius i stap gohed olsem wanem, mo hu i stap mekem wok ya?

¹⁴ Prij long olgeta ples long wol. Taem Jisas i tokbaot ol las dei, hem i talem se: “Ol man bambae oli talemaot gud nius ya blong Kingdom long olgeta ples long wol.” (Matiu 24:3, 14) Tede, wok blong talemaot gud nius i stap gohed long moa long 230 kantri mo bitim 700 lanwis. Long olgeta ples long wol, ol Witnes blong Jehova we oli kamaot long “olgeta kantri, mo long olgeta laen,” oli stap givhan long ol man blong oli kasem save long Kingdom,  mo ol samting we Kingdom bambae i mekem. (Revelesen 7:9) Ol Witnes oli no kasem pei from wok ya. Plante man oli no laekem olgeta mo oli mekem i nogud long olgeta. Be i no gat wan samting we i save blokem wok ya blong prij, olsem Jisas i talem.—Luk 21:17.

15. (1) ?Yu yu bilif se yumi stap finis long ol las dei? ?From wanem? (2) ?Wanem bambae i hapen long ol man we oli no wantem obei long Jehova mo ol man we oli obei?

¹⁵ ?Olsem wanem? ?Yu yu bilif se yumi stap finis long ol las dei? Plante profet tok blong Baebol we oli tokbaot ol las dei, oli stap kamtru. I no longtaem, Jehova bambae i stopem wok ya blong talemaot gud nius, nao “en” bambae i kam. (Matiu 24:14) ?“En” ya, hem i wanem? Hemia Amagedon. Long Amagedon, Jehova bambae i finisim ol nogud samting long wol. Bambae hem i yusum Jisas mo ol strong enjel blong hem, blong spolem ol man we oli no wantem obei. (2 Tesalonaeka 1:6-9) Nao Setan mo ol rabis enjel blong hem, bambae oli no moa lidim ol man oli go krangke. Afta, ol man we oli obei long God mo Kingdom blong hem, bambae oli luk ol promes blong hem oli kamtru.—Revelesen 20:1-3; 21:3-5.

16. ?From we en i klosap, yu mas mekem wanem?

¹⁶ I no longtaem, wol ya we Setan i rula blong hem, bambae i finis. Taswe i impoten tumas we yumi wanwan i askem se: ‘?Mi mi mas mekem wanem?’ Jehova i wantem we yu lanem plante samting long Baebol. Taswe yu mas tinghevi long stadi blong yu. (Jon 17:3) Evri wik, ol Witnes blong Jehova oli mekem ol miting blong givhan long ol man, blong oli kasem save moa long Baebol. I gud yu go long ol miting ya. (Ridim Hibrus 10:24, 25.) Mo taem yu luksave se yu mas jenisim sam samting long laef  blong yu, yu no mas fraet. Sipos yu mekem ol jenis ya, bambae yu fren gud wetem Jehova.—Jemes 4:8.

17. ?From wanem ol man bambae oli sek taem en i kam?

¹⁷ Aposol Pol i talem se en blong ol rabis man bambae i kam long wan taem we ol man oli no tingbaot, “olsem man blong stil i kam long naet.” (1 Tesalonaeka 5:2) Plante man oli no wantem save long ol pruf we i soemaot se yumi stap long ol las dei. Jisas i talem se: “Long taem ya we Pikinini blong man i stap [ol las dei], bambae i olsem taem blong Noa. Taem Bigfala Wota i no ron yet, ol man oli stap kakae, oli stap dring, mo oli stap mared, gogo kasem dei we Noa i go insaed long bigfala sip, mo oli no save wan samting gogo kasem we Bigfala Wota i ron, nao i tekemaot olgeta. Long taem ya we Pikinini blong man i stap, bambae i sem mak nomo.”—Matiu 24:37-39.

18. ?Jisas i givim wanem woning?

¹⁸ Jisas i givim woning se yumi no mas “kakae bitim mak, dring bitim mak, mo wari from ol samting blong laef,” nao yumi no moa tingbaot impoten taem ya we yumi stap long hem. Hem i talem se en bambae i kam wantaem nomo, olsem we man i “fas long wan trap,” mo “bambae i kasem olgeta man long wol.” Jisas i gohed se: “Yufala i mas stap wekap, mo oltaem yufala i mas prea [wetem fulhat] blong yufala i save ronwe long olgeta samting ya we oli mas kamtru, mo blong yufala i save stanap long fes blong Pikinini blong man.” (Luk 21:34-36) ?From wanem i impoten blong lesin long woning blong Jisas? From we smoltaem nomo i stap bifo we rabis wol ya blong Setan i lus. Ol man we Jehova mo Jisas i glad long olgeta, olgeta nomo bambae oli pastru long en ya, mo bambae oli laef olwe long niufala wol.—Jon 3:16; 2 Pita 3:13.