1-3. (a) ?Wanem presen we Jeova i givim long yumi? ?Olsem wanem yumi save yusum presen ya long fasin we i nogud? (b) ?Blong stap oltaem we God i lavem yumi, yumi mas yusum presen ya olsem wanem?

TINGBAOT sipos yu givim wan presen long wan famle blong yu, maet wan niufala trak. Be biaen, yu harem nius se hem i bin spid krangke, i aksiden, mo sam man oli kasem kil. ?Bambae yu harem olsem wanem? Ating bambae yu harem nogud mo yu kros long man ya.

² Jeova God i givim “evri samting we oli gud mo evri presen we oli nambawan” long yumi. Wan long ol presen ya, hemia se yumi save toktok blong talemaot ol tingting blong yumi. (Jemes 1:17) Presen ya i wan samting we man nomo i kasem, ol anamol oli no kasem. From presen ya, yumi save talemaot ol tingting mo ol filing blong yumi tu. Be yumi save yusum presen ya long fasin we i nogud, olsem man ya we i save yusum trak long nogud fasin. !Jeova i mas harem nogud tumas taem yumi no lukaotgud long ol tok blong yumi, nao yumi talem ol tok we i spolem narafala!

³ Blong stap oltaem we God i lavem yumi, yumi mas yusum presen ya long fasin we God i wantem. Jeova i talemaot klia wanem kaen tok we hem i glad long hem. Baebol i talem se: “Yufala i no mas talem ol rabis tok we i save spolem man. Yufala i mas talem ol gudfala tok we i save mekem ol man we oli slak oli kam strong moa. Tok olsem i save givhan moa long ol man we oli harem.” (Efesas 4:29) Bambae yumi save tingbaot ol kwestin ya: ?From wanem yumi mas lukaotgud long ol toktok blong yumi? ?Wanem kaen toktok we yumi mas blokem? ?Wanem ol tok we i save ‘mekem man i kam strong’?

4, 5. ?Buk blong Ol Proveb i talem wanem blong soemaot se tok blong yumi i gat paoa?

⁴ Wan impoten risen blong lukaotgud long ol tok blong yumi, hemia from we ol tok oli gat paoa. Ol Proveb 15:4 i talem se: “Ol gudfala toktok i stap leftemap laef blong man, be ol toktok we i strong tumas i stap mekem man i harem nogud.” * Ol gudfala toktok blong wan man i save mekem narafala i harem gud. Be ol nogud toktok blong wan man we i no bos long tang blong hem i save mekem narafala i harem nogud. !Tru ya, ol tok blong yumi oli gat paoa blong spolem man mo oli gat paoa blong mekem man i harem gud!—Ol Proveb 18:21.

⁵ Wan narafala proveb i yusum wan klia pijatok blong soemaot paoa we ol tok blong yumi i gat, i se: “Ol tok nogud we man i sakem we i no tingbaot i save mekem narafala man i harem nogud, olsem we naef blong faet i stikim hem.” (Ol Proveb 12:18) Ol tok nogud we man i sakem we i no tingbaot i save spolem gud filing blong narafala, mo i save mekem se tufala i kam badfren. ?Olsem wanem? Ating wan man i sakem finis nogud tok long yu samtaem, we i stikim yu olsem wan naef blong faet? Vas ya i gohed blong tokbaot ol gudfala tok i se: “Tok we i waes i save mekem man i harem gud bakegen.” Wan man we i gat waes we i kamaot  long God i tingting gud fastaem long ol tok we hem i talem. Ol tok we hem i talem i save mekem man i harem gud bakegen mo mekem hem i fren bakegen wetem narafala. ?Yu save tingbaot wan taem we narafala i toktok kaen long yu, blong mekem yu yu harem gud bakegen? (Ol Proveb 16:24) From we ol tok blong yumi i gat paoa, yumi wantem toktok long fasin we i mekem narafala i haremgud, i no blong spolem hem.

6. ?From wanem i hadwok blong bos long tang blong yumi?

⁶ Nomata se yumi traehad olsem wanem, yumi no save bos fulwan long tang blong yumi. Hemia nao namba tu risen from wanem yumi mas lukaotgud long ol tok blong yumi: Sin i pulum yumi blong yusum tang blong yumi long fasin we i nogud. Ol tok blong yumi oli kamaot long hat blong yumi. Mo “hat blong [man] i wantem mekem ol nogud samting.” (Jenesis 8:21, NW; Luk 6:45, NW) Taswe, i hadwok blong yumi bos long tang blong yumi. (Jemes 3:2-4) Nating we yumi no save bos fulwan long tang blong yumi, be yumi save traehad oltaem blong kamgud moa long ol tok blong yumi. Wan man we i stap swim agensem taed, i mas wokhad blong winim taed ya. Long sem fasin, yumi mas gohed nomo blong traem winim fasin ya we sin i pulum yumi blong mekem, hemia toktok we i nogud.

7, 8. ?Olsem wanem yumi save kasem jajmen blong Jeova from ol tok blong yumi?

⁷ Namba tri risen blong lukaotgud long ol tok blong yumi, hemia se yumi save kasem jajmen blong Jeova from ol tok blong yumi. Ol tok blong yumi oli save mekem se yumi kam badfren wetem narafala man, be i no hemia nomo. Oli save mekem se yumi kam badfren wetem Jeova tu. Jemes 1:26 i talem se: “Sipos man i ting se hem i man blong God mo i stap ona gud long hem, be hem i no lukaot gud long ol toktok blong hem, man ya i stap giaman nomo. Fasin blong hem blong ona long God i blong nating nomo.” * Olsem yumi luk long laswan japta, ol tok blong yumi i wan haf blong wosip blong yumi. Sipos yumi no bos long tang blong yumi, nao yumi stap sakem ol tok we i spolem narafala no  ol tok we i olsem posen, maet ol Kristin wok blong yumi oli blong nating nomo long lukluk blong Jeova. Samting ya i mas mekem we yumi tinghevi long ol tok blong yumi.—Jemes 3:8-10.

⁸ I klia se yumi gat sam gudfala risen blong lukaotgud long ol tok blong yumi. Bifo we yumi tokbaot ol gudfala toktok we i save mekem man i kam strong, bambae yumi tokbaot ol nogud toktok we i no mas stap long laef blong ol trufala Kristin.

9, 10. (a) ?Wanem kaen tok we yumi harem evri dei long wol ya? (b) ?From wanem yumi mas blokem ol doti tok? (Lukluk futnot tu.)

⁹ Ol doti tok. Long wol blong yumi, evri dei yumi harem ol tok swea, ol tok we i no soem respek, mo ol narafala doti tok. Plante man oli tok swea taem oli kros mo oli yusum ol doti tok long saed blong seks blong mekem man i laf. Be ol doti tok i no wan samting blong laf from. Klosap 2,000 yia bifo, tabu spirit i pulum aposol Pol blong givim advaes long kongregesen blong Kolosi, se oli mas sakemaot “ol doti tok” i gowe long laef blong olgeta. (Kolosi 3:8) Pol i talem long kongregesen blong Efesas tu se, “ol tok plei we i nogud” i wan long ol samting we ol trufala Kristin oli ‘no mas tokbaot.’—Efesas 5:3, 4.

¹⁰ Jeova i no laekem nating ol doti tok. Mo ol man we oli lavem hem, olgeta tu oli no laekem nating ol tok ya. Tru ya, from we yumi lavem Jeova, samting ya i mas pulum yumi blong blokem ol doti tok. Sam long ‘ol rabis samting we tingting blong yumi i wantem’ we Pol i tokbaot, hemia “ol samting blong sem” we i save minim ol doti tok tu. (Galesia 5:19-21) Taswe yumi mas save se hemia wan bigfala samting. Kongregesen i save putumaot wan man we i kasem advaes bakegen mo bakegen, be hem i gohed nomo blong yusum ol doti tok long saed blong seks, ol nogud tok, mo ol tok we i save spolem gudfala fasin blong narafala, mo hem i no tanem tingting blong hem from ol fasin ya. *

11, 12. (a) ?Tokbaot man, hemia i wanem kaen toktok? ?Olsem wanem tok ya i save kam tok we i spolem narafala? (b) ?From wanem ol man blong wosipim Jeova oli no mas spolem nem blong man?

 ¹¹ Tokbaot man blong spolem hem, sakem doti long gudnem blong man. Yumi ol man, yumi laekem blong tokbaot ol narafala mo laef blong olgeta. ?Olsem wanem? ?I rong blong tokbaot man? I no rong blong storian long ol gudfala nius long saed blong man mo ol samting we i givim gudfala save long narafala. Maet yumi tokbaot hu i jes tekem baptaes mo hu i nidim sam gudfala toktok blong leftemap tingting blong hem. Ol Kristin long faswan handred yia oli intres gud long olgeta wanwan, mo oli serem ol gudfala nius long saed blong ol Kristin brata sista blong olgeta. (Efesas 6:21, 22; Kolosi 4:8, 9) Be taem yumi tokbaot man, yumi save spolem hem sipos yumi talem sam tok we i no tru olgeta, no sipos yumi tokbaot sam samting we i bisnes blong hem nomo, i no blong talemaot. Samting we i nogud moa, taem yumi tokbaot man, yumi save go tumas nao yumi sakem doti long gudnem blong man, we olkaen tok olsem oli spolem man nomo. Giaman long baksaed blong man, hemia “ol giaman toktok . . . we i spolem mo sakem doti long gudnem blong narafala.” Ol Farisi oli bin talem ol giaman tok olsem blong traem spolem Jisas. (Matiu 9:32-34; 12:22-24) Ol giaman tok we i spolem nem blong narafala, plante taem oli mekem rao i kamaot.—Ol Proveb 26:20.

¹² Jeova i no glad nating long olgeta we oli yusum presen we hem i givim, hemia fasin blong toktok, blong spolem ol narafala mo blong mekem we oli kam badfren. Hem i no laekem nating ol man we oli “mekem ol fren oli harem nogud, oli seraot.” (Ol Proveb 6:16-19) Grik tok we i minim “man blong spolem nem blong narafala” hemia di·aʹbo·los (“Devel”) we hem i wan nem blong Setan tu. Setan i “Devel,” rabis man blong giaman we i stap spolem nem blong God. (Revelesen 12:9, 10, NW) Tru ya, yumi mas blokem olkaen toktok we oli save mekem yumi kam olsem Devel Setan. Long kongregesen, i no gat ples blong ol toktok olsem giaman blong spolem nem blong man. Tok olsem i save pulum ol man blong “rao” mo “seraot,” mo blong mekem ol narafala rabis fasin we tingting blong olgeta nomo i wantem. (Galesia 5:19-21) Taswe, bifo we yumi talemaot sam nius we yumi harem long saed  blong wan man, i gud blong tingbaot se: ‘?Nius ya i tru? ?Sipos mi talemaot nius ya long narafala, mi mi stap soem kaen fasin? ?Mi rili mas talemaot nius ya, mo i waes blong talemaot?’—1 Tesalonaeka 4:11.

13, 14. (a) ?Ol tok nogud i save mekem wanem long narafala? (b) ?Wanem ol tok we i spolem nem blong narafala? ?From wanem man we i talem ol tok olsem i save kasem bigfala trabol?

¹³ Tok nogud. Olsem yumi tokbaot antap, ol tok blong yumi oli gat paoa blong spolem narafala. I tru, yumi ol sinman sam samtaem yumi talem ol tok we biaen yumi sore from. Be Baebol i givim woning long saed blong ol tok we i no mas stap nating long ol Kristin famle mo kongregesen. Pol i talem long ol Kristin se: “Yufala i mas lego olgeta fasin blong kros, yufala i no mas holem kros, mo yufala i no mas kros kwik. Mo taem yufala i kros, yufala i no mas sakem tok blong yufala i go antap, mo yufala i no mas tok nogud long yufala.” (Efesas 4:31) Sam narafala Baebol oli tanem “tok nogud” i kam “rabis tok,” “tok we i spolem narafala,” “tok we i mekem narafala i harem nogud.” Yes, fasin ya blong tok nogud​—we maet i min se man i singaot narafala long ol nem we i blong daonem hem mo i sakem ol strong tok oltaem blong jik—​i save mekem narafala i harem se hem i nating nomo, mo se hem i no save mekem wan gudfala samting nating. I nogud taem man i sakem ol nogud tok ya long pikinini, from we i isi nomo blong spolem filing blong pikinini we i trastem bigman mo we hat blong hem i sofsof.—Kolosi 3:21.

¹⁴ Baebol i givim strong woning agensem ol tok we i spolem nem blong narafala, hemia olkaen tok we i blong daonem gud man. Maet hemia ol tok we man i sakem agensem narafala, ol tok we i mekem man i harem se hem i nating nomo, mo ol tok nogud. Wan man we i gohed nomo blong talem olkaen toktok olsem, hem i save kasem bigfala trabol, from we kongregesen i save putumaot hem sipos hem i no lesin long ol advaes we i blong halpem hem blong jenisim fasin blong hem. Mo tu, sipos hem i no sakemaot ol tok olsem, hem i save lusum janis blong hem blong kasem ol blesing blong Kingdom. (1 Korin 5:11-13; 6:9, 10) I klia nomo se yumi no save stap long laef ya we God i lavem yumi sipos yumi gohed blong tok nogud, tok giaman, mo tok long fasin we i spolem narafala. Ol tok olsem oli daonem man nomo.

15. ?Wanem ‘ol gudfala tok we i save mekem ol man oli kam strong moa’?

¹⁵ ?Olsem wanem yumi save yusum presen ya, hemia fasin blong toktok, olsem we God i wantem yumi blong yusum? Tingbaot we Tok blong God i talem se yumi mas talem ‘ol gudfala tok we i save mekem ol man oli kam strong moa.’ (Efesas 4:29) Jeova i glad taem yumi talem ol tok we oli mekem ol narafala oli kam strong, oli leftemap tingting blong olgeta, mo oli givim paoa long olgeta. Blong talem ol tok olsem, yumi mas tingting gud fastaem long ol tok blong yumi. Baebol i no putum ol rul long saed ya, mo i no gat wan lis blong ol tok we oli “stret” blong talem. (Taetas 2:8) Blong talem ol tok we i ‘mekem ol man oli strong moa,’ yumi mas tingbaot tri impoten samting: Tok blong yumi i mas gud, i mas tru, mo i mas kaen. Bambae yumi luk sam eksampol blong ol tok we i folem trifala fasin ya mo i mekem man i kam strong.—Lukluk bokis long  pej 140, “?Ol Tok Blong Mi i Mekem Man i Kam Strong?”

16, 17. (a) ?From wanem yumi mas talem ol gudfala tok long ol narafala taem yumi glad long olgeta? (b) ?Wanem ol janis we yumi gat blong talem ol gudfala tok ya long olgeta long kongregesen mo long famle?

¹⁶ Talem long narafala se yu glad long hem. Jeova mo Jisas tufala i luksave se oli mas talem long ol man se oli glad long olgeta. (Matiu 3:17; 25:19-23; Jon 1:47) Ol Kristin tu oli mas tok olsem long ol narafala. ?From wanem? Ol Proveb 15:23 (NW) i talem se: “!Tok we man i talem long stret taem blong hem, hem i gud we i gud tumas!” Traem tingbaot: ‘?Mi mi harem olsem wanem taem narafala i talem se hem i glad long mi? ?Tok olsem i mekem mi mi harem gud mo i leftemap tingting blong mi?’ Tru ya, ol gudfala tok ya i mekem yu yu save se narafala i stap lukluk gudfala wok blong yu, i tingbaot yu, mo se samting we yu hadwok blong mekem i no blong nating nomo. Ol gudfala tok olsem i mekem tingting blong yu i kam strong moa, i mekem se yu wantem wok had moa. I klia we yumi glad blong kasem ol tok we i soem se narafala i glad long yumi. ?Olsem wanem nao? ?Yu ting se yumi mas traehad blong givim ol tok olsem tu long ol narafala?—Matiu 7:12.

¹⁷ Yu mas trenem yu wan blong luksave ol gudfala fasin blong ol narafala, mo biaen yu mas talemaot gudfala toktok long olgeta  long saed ya. Long kongregesen, maet yu harem wan gudfala tok long miting, no maet yu luk wan yangfala we i stap traehad blong kasem ol gudfala mak long wok blong God, no maet yu luk wan olfala we i stap oltaem long miting, nating se bodi blong hem i no moa strong. Ol gudfala tok blong soem se yu glad long olgeta i save tajem hat blong olgeta mo mekem olgeta oli kam strong moa long wok blong Jeova. Long famle, hasban i nidim we waef blong hem i talem se hem i glad long hem mo i gat tangkiu long hem. Sem mak long waef, hem tu i nidim sam gudfala tok olsem. (Ol Proveb 31:10, 28) Antap moa, ol pikinini oli harem gud taem oli save se papa mama tufala i luk mo tufala i laekem ol gudfala samting we oli mekem. Ol gudfala tok we oli soemaot se papa mama i glad long pikinini oli save givhan long hem mo mekem hem i harem gud, olsem we ren mo san i givhan long wan flaoa mo mekem hem i gru gud. Ol papa mama, yufala i mas lukaot ol janis blong talem ol gudfala tok long ol pikinini blong yufala from ol gudfala fasin mo wok blong olgeta. Ol gudfala tok ya i save mekem tingting blong ol pikinini ya i kam strong moa, i halpem olgeta blong oli no fraet, mo i pulum olgeta blong traehad moa blong mekem samting we i stret.

18, 19. ?From wanem yumi mas mekem bes blong yumi blong leftemap tingting blong ol Kristin brata sista blong yumi? ?Olsem wanem yumi save mekem olsem?

¹⁸ Leftemap tingting mo mekem man i harem gud bakegen. Jeova i intres bigwan long olgeta we oli olsem “nating nomo,” mo olgeta we “oli harem nogud long hat blong olgeta.” (Aesea 57:15, NW) Tok blong God i talem se yumi mas ‘stap toktok gud long yumi blong mekem tingting blong yumi i strong,’ mo yumi mas “leftemap tingting” blong olgeta we oli harem nogud. (1 Tesalonaeka 5:11, 14) Yumi save gud se God i stap lukluk mo hem i glad taem yumi toktok gud mo leftemap tingting blong ol Kristin brata sista blong yumi, we tingting blong olgeta i hevi mo oli harem nogud.

¹⁹ ?Yu save talem wanem blong leftemap tingting blong wan Kristin we i harem nogud, mo tingting blong hem i foldaon? Yu no mas ting se yu nao yu mas stretem trabol blong hem. Plante taem, samting we i givhan moa long hem, hemia ol  smosmol tok nomo. Yu save mekem hem i luksave se yu kea mo yu wari long hem. Yu save askem long hem sipos hem i glad we yu prea wetem hem. Nao long prea ya, yu save askem long Jeova blong givhan long man ya, blong hem i save se ol narafala mo Jeova tu i lavem hem. (Jemes 5:14, 15) Talem bakegen long hem se yumi nidim hem long kongregesen mo i impoten we hem i stap oltaem wetem yumi. (1 Korin 12:12-26) Ridim wan vas blong Baebol we i leftemap tingting blong hem mo i mekem hem i save se Jeova i rili kea long hem. (Ol Sam 34:18; Matiu 10:29-31) Yu mas tekem taem blong talem “gudfala tok” long wan man we tingting blong hem i foldaon. Sipos ol tok blong yu oli kamaot long hat blong yu, bambae yu save givhan long hem blong harem se i gat man we i lavem hem mo i glad long hem.—Ol Proveb 12:25.

20, 21. ?Wanem trifala samting oli save mekem se man i glad blong harem advaes?

²⁰ Gudfala advaes. From we yumi evriwan i sinman, sam samtaem yumi nidim advaes. Baebol i talem se: “Sipos yu stap lesin long ol gudfala tok we ol man oli givim blong givhan long yu, mo yu glad blong lan, bambae yu yu kam wan waes man.” (Ol Proveb 19:20) I no ol elda nomo we oli givim advaes long narafala. Ol papa mama oli mas givim advaes long ol pikinini blong olgeta. (Efesas 6:4) Ol olfala sista oli save givim advaes long ol yangfala woman. (Taetas 2:3-5) Sipos yumi lavem ol narafala, bambae yumi wantem givim advaes we i isi long olgeta blong harem, oli no filim se yumi stap daonem olgeta. ?Wanem i save givhan long yumi blong givim advaes olsem? Tingbaot tri  samting we bambae i mekem se man i glad blong harem advaes: (1) ?Blong wanem yumi wantem givim advaes? (2) stampa we advaes ya i stanap long hem, mo (3) fasin blong yumi blong givim advaes ya.

²¹ Blong givim advaes we narafala i glad blong harem, man blong givim advaes i mas ting se: ‘?Wanem i save mekem se mi mi glad blong harem advaes we narafala i givim long mi?’ I moa isi blong harem advaes taem yu save se hemia we i givim advaes ya i kea long yu, i no stap tok long yu from we hem i kros, mo i no gat wan narafala tingting we i pusum hem blong givim advaes ya. Taswe i sem mak taem yu givim advaes long narafala. Yu mas gat gudfala tingting we i pusum yu. Mo tu, gudfala advaes i stanap long Tok blong God. (2 Timoti 3:16) Nating sipos yumi ridimaot sam vas long Baebol no nogat, be ol advaes we yumi givim oli mas stanap long Baebol. Taswe, ol elda oli lukaotgud blong no givim advaes we i kamaot long prapa tingting blong olgeta. Mo tu, oli no twistim mining blong ol vas, nao i luk olsem we oli sapotem prapa tingting blong olgeta. Man i glad moa blong lesin long advaes taem yumi givim long fasin we i stret. Olsem we yumi putum sol long kakae blong mekem i tesgud, yumi mas toktok long kaen fasin, nao bambae i isi long narafala blong harem advaes blong yumi, mo tu, hem i no harem se yumi daonem hem olsem we hem i nating nomo.—Kolosi 4:6.

22. ?Tingting blong yu i strong blong mekem wanem wetem presen ya we God i givim, hemia fasin blong toktok?

²² I tru tumas se fasin blong toktok i wan gudfala presen we God i givim long yumi. From we yumi lavem Jeova, yumi mas wantem blong yusum gud presen ya, yumi no mas yusum long rod we i nogud. Yumi no mas fogetem se ol tok blong yumi oli gat paoa: oli save mekem man i kam strong, mo oli save daonem hem tu. Taswe, i gud yumi traehad oltaem blong yusum presen ya long rod we God i wantem, hemia blong ‘mekem ol man oli kam strong moa.’ Sipos yumi mekem olsem, ol tok blong yumi bambae oli givhan bigwan long ol man we yumi joen wetem olgeta, mo bambae oli givhan long yumi tu blong yumi stap long laef ya we oltaem God i lavem yumi.