Taem pikinini i bon, papa mo mama i glad tumas, be tufala i gat bigfala wok tu. Sipos yutufala i gat pikinini, bambae yutufala i luk se yutufala i yusum bighaf blong taem mo paoa blong yutufala blong lukaot long pikinini ya. Bambae yutufala i no slip gud long naet, mo from we yutufala i stap lan long jenis ya, samtaem yutufala i save kros long yutufala. Yutufala i mas jenisim sam samting blong lukaot long pikinini blong yutufala, mo blong mekem mared blong yutufala i stap gud. ?Ol advaes blong Baebol oli save givhan long yutufala olsem wanem?

?BAEBOL I TALEM WANEM? ‘Man we i stap lavem man, tingting blong hem i longfala, mo hem i gat sore long man. Hem i no save tingbaot hem nomo, mo i no save kros kwik.’ (1 Korin 13:4, 5) Taem yu kam wan mama, yu putum tingting blong yu fulwan long bebi. Nao man blong yu i save harem se yu fogetem hem. Taswe, nating se yu bisi wetem bebi blong yutufala, yu mas tingbaot man blong yu. Hem tu i nidim we yu spenem taem wetem hem. Yu mas gat longfala tingting mo yu kaen long hem. Yu save talem sam samting we hem i save mekem, blong i givhan long yu blong lukaot long bebi blong yutufala.

‘Yufala ol man we i mared, yufala i mas tingbaotgud ol woman blong yufala.’ (1 Pita 3:7) Yu mas tingbaot se woman blong yu i stap yusum plante paoa blong hem, blong lukaot long bebi blong yutufala. Niufala wok ya i save mekem se hem i wari, i taed, mo i harem nogud. Samtaem maet hem i kros long yu, be yu no mas kros. Man we i gat ‘longfala tingting, hem i gud moa, i winim wan strong man blong faet.’ (Ol Proveb 16:32) Yu se hem i wok had, ale yu traem luksave samting we yu yu save mekem blong givhan long hem.—Ol Proveb 14:29.

?YU SAVE MEKEM WANEM?

• Papa: Long dei mo long naet, yu mas givhan long woman blong yu, blong lukaot long bebi blong yutufala. Yu lego sam samting we yu stap mekem oltaem, blong yu save spenem moa taem wetem woman blong yu mo bebi blong yutufala

• Mama: Taem man blong yu i wantem mekem samting blong givhan long yu, yu letem hem. Sipos hem i no mekem i stret gud, yu no daonem hem. Be long kaen fasin, yu soemaot long hem olsem wanem blong mekem

?BAEBOL I TALEM WANEM? “Tufala bambae i kam olsem wan bodi nomo.” (Jenesis 2:24) Nating se yutufala i gat pikinini, yutufala i mas tingbaot se yutufala i “wan bodi” yet. Yutufala i mas traehad blong mekem se yutufala i fren gud oltaem.

Ol woman, yufala i mas talem tangkiu long man blong yufala taem oli givhan long yufala. Ol gudfala toktok we yufala i talem long olgeta oli save mekem olgeta oli “harem gud.” (Ol Proveb 12:18) Ol man, yufala i mas talem long woman blong yufala se yufala i lavem olgeta mo yufala i tinghae long olgeta. Mo yufala i mas talem ol gudfala toktok long olgeta, from wok we oli mekem blong lukaot gud long famle.—Ol Proveb 31:10, 28.

“I nogud man i stap lukaot rod we i save givhan long hem nomo. Yumi mas lukaot rod we i save givhan long ol narafala man tu.” (1 Korin 10:24) Yutufala i mas mekem i gud long yutufala oltaem. Yutufala i mas tekem taem blong toktok tugeta, mo leftemap tingting blong yutufala, mo lesingud taem narawan i toktok. Long fasin ya blong slip wanples, yutufala i mas tingbaot nid blong narawan. I nogud wan i stap tingbaot hem nomo. Baebol i talem se: “Sipos man mo woman blong hem, tufala i agri fastaem blong livim fasin ya blong slip wanples, tufala i save livim blong smoltaem.” (1 Korin 7:3-5) Taswe, yutufala i mas talemaot klia ol tingting blong yutufala. Sipos yutufala i gat longfala tingting mo yutufala i kasem save long nid blong yutufala, bambae yutufala i lavlavem yutufala moa.

?YU SAVE MEKEM WANEM?

• Yutufala i mas makemaot taem blong yutufala nomo i stap wanples

• Yutufala i mekem ol smosmol samting blong soemaot se yutufala i lavlavem yutufala, olsem sanem mesej no givim wan smol presen

?BAEBOL I TALEM WANEM? ‘Taem yu pikinini yet, be yu yu savegud ol tok blong Baebol.’ (2 Timoti 3:15) Blong tijim gud pikinini blong yutufala, yutufala i mas plan fastaem. Hem i save lanem plante samting taem hem i bebi nomo. Taem hem i stap yet long bel blong mama, hem i lanem samting finis. Hem i haremsave voes blong yutufala, mo taem yutufala i glad, hem i haremsave, ale hem i muvmuv. Taem hem i smol bebi nomo, yutufala i save rid long hem. Nating se hem i no kasem save, be fasin ya i save givhan long hem blong hem i laekem blong rid taem hem i kam bigman.

Mo tu, taem hem i smol yet, yutufala i save tokbaot God long hem. I gud tu we hem i harem yutufala i prea long Jehova. (Dutronome 11:19) Taem yutufala i pleplei wetem hem, yutufala i save tokbaot ol samting we Jehova i mekem. (Ol Sam 78:3, 4) Taem hem i stap gruap, bambae hem i luksave se yutufala i lavem Jehova, ale hem tu bambae i mekem sem mak.

?YU SAVE MEKEM WANEM?

• Yu prea blong askem waes we yutufala i nidim blong tijim pikinini

• Yu talem wan wod bakegen mo bakegen wetem sam sotfala toktok, blong pikinini i stat blong lanem samting