Rut 2:1-23
2 Naomi i gat wan famle we i rij we i rij, nem blong hem Boas.+ Hem i kamaot long laen blong Elimelek.
2 Woman Moab ya Rut, i talem long Naomi se: “Plis, yu letem mi mi folem ol man we oli stap hivimap ol hed blong bale long garen, blong mi pikimap hemia we oli mestem.+ Bambae mi biaen long ol man we oli glad blong letem mi mi mekem olsem.” Ale Naomi i talem long hem se: “Dota blong mi, yu save go.”
3 Nao hem i go mo i stat blong pikimap bale biaen long ol man blong havest. Hem i pikimap gogo i gotru long garen blong Boas+ we i famle blong Elimelek.+
4 Stret long taem ya, Boas i kamtru long garen. Hem i aot long Betlehem i kam. Nao hem i talem long ol man blong havest se: “Jehova i stap wetem yufala.” Mo olgeta oli talem se: “Jehova i blesem yu.”
5 Nao Boas i askem long yang man we i bos blong ol man blong havest se: “?Yangfala woman ya i famle blong hu?”
6 Yang man we i bos blong ol man blong havest i ansa se: “Yangfala woman ya i blong Moab,+ hem mo Naomi i aot long Moab i kam.+
7 Hem i kam askem long mi se: ‘?Plis, mi save pikimap ol hed blong bale* we ol man blong havest oli katemaot olgeta be oli lego i stap?’+ Mo hem i pikimap stat taem hem i kamtru long moning kam kasem naoia, mo hem i jes go spel long selta blong smoltaem.”
8 Nao Boas i talem long Rut se: “Dota blong mi, yu lesin. Yu no go pikimap bale long ol narafala garen, mo yu no go long narafala ples. Yu stap klosap long ol yangfala woman we oli wok blong mi.+
9 Yu putum ae blong yu i stap oltaem long garen we oli stap havest long hem, mo yu folem olgeta. Mi mi talem long ol yangfala man blong oli no tajem* yu. Sipos yu tosta, yu go dring long ol botel wota ya we ol yangfala man oli fulumap.”
10 Nao hem i foldaon we fes blong hem i kasem graon, mo i talem se: “?Wanem i mekem se yu glad long mi? ?Mo from wanem yu mekem olsem long mi, we mi mi wan woman blong narafala kantri nomo?”+
11 Nao Boas i ansa long hem se: “Mi mi harem nius blong olgeta samting we yu mekem long Naomi we i mama blong hasban blong yu, afta we hasban blong yu i ded. Yu lego papa mo mama blong yu, mo ples blong ol famle blong yu, blong go stap wetem ol man we yu no save olgeta nating.+
12 I gud Jehova i blesem yu from samting we yu mekem,+ mo i gud yu kasem stret* pei blong yu long Jehova God blong Isrel, we yu kam haed aninit long wing blong hem.”+
13 Nao Rut i talem se: “Masta, i gud mi gohed blong mekem yu yu glad long mi, from we yu toktok gud long mi blong mekem mi harem gud,* nating se mi mi no man blong wok blong yu.”
14 Long taem blong kakae, Boas i talem long hem se: “Yu kam, yu tekem sam bred, yu draonem long vinega mo yu kakae.” Ale hem i sidaon klosap long ol man blong havest. Nao Boas i givim sam bale we oli rusum, blong hem i kakae. Hem i kakae gogo i fulap, be i no finisim.
15 Taem hem i girap blong go pikimap bale bakegen,+ Boas i talem long ol yangfala wokman blong hem se: “Yufala i letem hem i pikimap tu ol hed blong ol bale* we yufala i katem finis, mo yufala i no spolem hem.+
16 Mo tu, yufala i mas pulumaot sam hed blong bale long ol bandel we yufala i fasem finis, blong hem i pikimap, mo yufala i no mas talem wan samting blong stopem hem.”
17 Nao Rut i stap pikimap bale kasem long sapa.+ Taem hem i kilkilim olgeta, ol sid we hem i hivimap i kasem samwe long wan efa.*
18 Nao hem i tekem mo i go long taon, mo Naomi i luk ol sid we hem i karem. Mo hem i givim long hem, haf kakae we hem i no finisim+ long taem blong kakae.
19 Naomi i askem long hem se: “?Tede yu yu pikimap bale long weples? ?Yu yu wok wea? Prea blong mi se God bambae i blesem man we i mekem i gud long yu.”+ Nao hem i tokbaot man ya we hem i wok wetem hem, i se: “Nem blong man we mi wok wetem hem tede, hemia Boas.”
20 Nao Naomi i talem se: “Prea blong mi se Jehova bambae i blesem hem. Oltaem God ya i stap lavem ol man we oli laef, wetem olgeta we oli ded.”+ Naomi i gohed se: “Man ya i famle blong yumi.+ Hem i wan long olgeta we i gat raet blong pemaot yumi.”*+
21 Nao Rut i talem se: “Hem i talem tu se, ‘Yu stap klosap long ol yangfala blong mi, go kasem taem we oli finisim wok ya blong havest.’”+
22 Naomi i talem long Rut se: “Dota blong mi, i gud yu folem ol yangfala woman ya, i bitim we yu wok long wan narafala garen nao ol man oli mekem i nogud long yu.”
23 Nao hem i stap folem ol yangfala woman we oli wok blong Boas, go kasem we taem blong havestem bale+ mo taem blong havestem wit i finis. Mo oltaem hem i stap wetem Naomi.+
Ol futnot
^ MNT: “bandel.”
^ NT: “hambag long.”
^ NT: “bigfala.”
^ PT: “toktok blong yu i tajem hat blong mi.”
^ MNT: “bandel.”
^ NT: “pembak yumi blong tekemaot yumi long trabol.”
