Job 42:1-17
42 Nao Job i ansa long Jehova i se:
2 “Naoia mi save se yu yu naf blong mekem olgeta samtingMo i no gat wan samting we yu stap tingting blong mekem we i strong tumas blong yu mekem.+
3 Yu yu talem se: ‘?Hu ya i stap blokem ol advaes blong mi, be i no gat save?’+
Taswe nating se mi toktok, be mi no kasemsaveLong saed blong ol samting we oli gud tumas long lukluk blong mi, we mi no save nating.+
4 Yu yu talem se: ‘Plis yu lesin, mo bambae mi toktok.
Bambae mi kwestinim yu, mo yu tokbaot long mi.’+
5 Sora blong mi i bin harem nius blong yu,Be naoia, mi mi luk yu long ae blong mi.
6 From samting ya, mi tekembak ol samting we mi talem,*+Mo mi tanem tingting blong mi, mi sidaon long das mo asis.”+
7 Afta we Jehova i talem ol tok ya long Job, Jehova i talem long Elifas we i man Teman, se:
“Mi mi kros tumas long yu mo tufala fren blong yu,+ from we yufala i no tok tru long saed blong mi,+ olsem man blong wok blong mi Job i mekem.
8 Naoia yufala i tekem seven bul mo seven man sipsip mo yufala i go luk man blong wok blong mi Job, mo yufala i bonem wan sakrefaes we i bon fulwan blong yufala. Mo man blong wok blong mi Job, bambae i prea from yufala.+ Mo i sua se bambae mi akseptem samting we hem i askem,* blong mi no panisim yufala from krangke fasin blong yufala, we yufala i no tok tru long saed blong mi, olsem man blong wok blong mi Job i mekem.”
9 Ale Elifas we i man Teman, Bildad we i man Suaha mo Jofara we i man Nahama, oli go mekem samting we Jehova i talem. Mo Jehova i akseptem prea blong Job.
10 Afta we Job i prea from ol fren blong hem,+ Jehova i tekemaot ol trabol blong Job+ mo i givimbak gudfala laef we hem i gat fastaem.* Jehova i givim olgeta samting we hem i gat bifo, be i dabolem evriwan.+
11 Olgeta brata mo sista blong hem, mo ol fren blong hem blong bifo,+ oli kam luk hem mo kakae wetem hem long haos blong hem. Oli harem nogud wetem hem, mo oli mekem hem i harem gud bakegen, from trabol we Jehova i letem i kasem hem. Mo olgeta wanwan oli givim mane mo gol ring long hem.
12 Nao long las haf blong laef blong Job, Jehova i blesem hem moa i bitim long stat,+ nao Job i gat 14,000 sipsip, mo 6,000 kamel, mo 2,000 buluk we tu i wok wanples, mo 1,000 woman dongki.+
13 Mo tu, hem i gat seven moa boe, wetem tri moa dota.+
14 Hem i putum nem blong fasbon dota blong hem se Jemima, mo sekenbon Kejia, mo namba 3 Kerenapuk.
15 I no gat wan woman long ples ya we i naes olsem ol dota blong Job. Mo papa blong olgeta i givim olting long olgeta tu, stret olsem we hem i givim long ol brata blong olgeta.
16 Afta long samting ya, Job i laef 140 yia, mo hem i luk ol pikinini blong hem mo ol smol bubu blong hem, hemia fo jeneresen.
17 Biaen Job i ded, be hem i laef longtaem mo i gat wan gudfala laef.*
Ol futnot
^ NT: “mi tekembak ol tok ya we mi talem be mi no minim.”
^ PT: “bambae mi leftemap fes blong hem.”
^ PT: “Jehova i tekemaot samting we i mekem Job i stap kalabus.”
^ PT: “Job i olfala mo i laef plante dei.”
