Job 29:1-25
29 Job i gohed long tok* blong hem i se:
2 “Sipos mi stap long ol manis we i pas finis, bambae i moa gud,Long ol dei ya we God i stap lukaot gud long mi,
3 Taem hem i mekem laet blong hem i saen antap long hed blong mi,Taem mi wokbaot long tudak from laet blong hem,+
4 Taem mi* stap long ol beswan yia blong mi,Taem fasin blong fren gud wetem God i stap long tent blong mi,+
5 Taem God Ya We i Gat Olgeta Paoa i stap yet wetem mi,Taem ol pikinini* blong mi oli stap raonabaot long mi,
6 Taem we ol rod blong mi i fulap nomo long bata,Mo ol ston oli givim oel long mi we oli kafsaedem olsem wota we i ron.+
7 Taem ya we oltaem mi stap go long get blong taon+Mo mi go sidaon long open ples long taon,+
8 Ol yang man oli muvaot long rod* taem oli luk mi,Mo ol olfala man tu, oli girap, oli stanap i stap.+
9 Ol prins oli stop blong toktok,Oli putum han blong olgeta blokem maot blong olgeta.
10 Voes blong ol haeman i kam kwaet.Tang blong olgeta i fas long ruf blong maot blong olgeta.
11 Eni man we i bin harem mi i save talem ol gudfala toktok long saed blong mi,Mo olgeta we oli bin luk mi, oli save pruvum se mi mi tru.
12 From mi save sevem puaman we i stap krae from help,+Mo pikinini we i no gat papa, mo eni man we i no gat man blong halpem hem.+
13 Man we klosap i lus, i save blesem mi,+Mo mi mi mekem hat blong wido i glad.+
14 Mi werem stret fasin olsem klos blong mi.Mo jastis blong mi i olsem wan longfala klos* mo wan kaliko blong fasem long hed.
15 Mi kam ae blong blaenmanMo mi leg blong man we i no save wokbaot.
16 Mi papa blong ol puaman.+Mi stap lukluk gud long kot kes blong olgeta we mi no save olgeta.+
17 Mi stap brekem jo blong man we i mekem nogud fasin,+Mo mi pulumaot kakae we i stap long tut blong hem.
18 Mi talem oltaem se: ‘Bambae mi ded long prapa haos* blong mi,+Mo ol dei blong mi, bambae oli plante we plante olsem sanbij.
19 Ol rus blong mi bambae oli spred i go insaed long ol wota,Mo wota blong naet bambae i stap fulnaet long ol branj blong mi.
20 Glori blong mi i stap kam niu evri dei,Mo bonara we i stap long han blong mi bambae i gohed blong sut.’
21 Ol man oli stap lesin gud,Oli stap kwaet, oli wet blong harem advaes blong mi.+
22 Taem mi toktok finis, oli no moa gat wan tok blong talem.Ol tok blong mi i go gud nomo* long sora blong olgeta.
23 Oli wet long mi olsem we oli stap wet long ren.Oli openem maot bigwan olsem se oli stap wet long ren, long taem we ol samting oli gru.+
24 Taem mi smael long olgeta, oli no save bilivim,Laet long fes blong mi nomo i save leftemap tingting blong olgeta.*
25 Mi olsem hed blong olgeta, mi stap soem rod long olgeta,Mo mi laef olsem wan king long medel blong ol soldia blong hem,+Olsem wan man we i stap toktok gud long ol man we oli harem nogud.+
Ol futnot
^ PT: “proveb.”
^ PT: “Long ol dei ya we mi.”
^ NT: “ol man blong wok.”
^ PT: “oli go haed.”
^ NT: “wan longfala kot we i no gat han blong hem.”
^ PT: “long nes.”
^ PT: “Ol tok blong mi i drop sloslo.”
^ MNT: “Oli no mekem laet long fes blong mi i kam tudak.”
