Esra 1:1-11
1 Long faswan yia blong rul blong King Saeras+ blong Pesia, Jehova i pulum tingting blong King Saeras blong Pesia blong i talemaot wan tok long olgeta man long kingdom blong hem, blong mekem se tok blong Jehova we Jeremaea i talemaot+ i kamtru. Tok ya, king i raetemdaon+ se:
2 “Hemia samting we King Saeras blong Pesia i talem: ‘Jehova we i God blong heven i givim olgeta kingdom blong wol ya long mi,+ mo hem i putumap mi blong mi wokem wan haos blong hem long Jerusalem+ we i stap long Juda.
3 Eni man we i stap long medel blong yufala ol man blong God, i gud God blong hem i stap wetem hem, mo i letem hem i go antap long Jerusalem we i stap long Juda, mo i bildim bakegen haos blong Jehova we i God blong Isrel. Hem i trufala God ya we haos blong hem i bin stap long Jerusalem.*
4 Eni man we i stap long ples ya olsem man blong narafala kantri,+ nomata wanem ples we hem i stap long hem, i gud ol neba blong hem* oli givhan long hem, taem oli givim silva, gol, olting, mo ol animol, antap long ofring we olgeta nomo oli glad blong givim i go long haos blong tru God,+ we i stap long Jerusalem.’”
5 Nao olgeta long Juda mo Benjamin we oli hed long haos blong papa blong olgeta, mo ol pris, wetem ol Livaet, hemia olgeta we God i pulum tingting blong olgeta, oli mekemrere blong go antap mo bildim bakegen haos blong Jehova we i stap long Jerusalem.
6 Mo olgeta man raonabaot long olgeta, oli sapotem olgeta taem oli givim* ol samting we oli wokem long silva mo gol, wetem olting, ol animol, mo ol sas samting. Olgeta oli givim ol samting ya antap long olgeta ofring we olgeta nomo oli glad blong givim.
7 Mo tu, King Saeras i tekemaot ol samting we oli stap yusum long haos blong Jehova, we Nebukadnesa i bin tekemaot long Jerusalem mo i go putum long haos blong god blong hem.+
8 King Saeras blong Pesia i mekem Mitredat, we i wan tresera, i tekem ol samting ya oli kam mo i mekem wan lis blong olgeta, blong i givim long Sesbajara*+ we jif blong Juda.
9 Hemia ol samting we oli stap long lis ya: I gat 30 basket we oli wokem long gol, 1,000 basket we oli wokem long silva, 29 narafala dis,
10 30 smol bol we oli wokem long gol, 410 smol bol we oli wokem long silva, mo 1,000 narafala samting.
11 Evri samting ya we oli wokem long gol mo silva, i kasem 5,400. Sesbajara i tekem olgeta samting ya i go antap, long taem ya we ol man we oli kalabus+ oli aot long Babilon blong go long Jerusalem.
Ol futnot
^ MNT: “we i stap long Jerusalem.”
^ PT: “ol man ples blong hem.”
^ PT: “mekem han blong olgeta i kam strong wetem.”
