Esikel 1:1-28
1 Long namba 30 yia, long namba 5 dei blong namba 4 manis, taem mi stap klosap long Kebara Reva+ wetem ol man we oli bin holemtaet olgeta mo tekem olgeta i kam stap long ples ya,+ heven i open nao mi stat blong luk ol vison we oli kamaot long God.
2 Long namba 5 dei blong manis ya, hemia long namba 5 yia afta we oli holemtaet King Jehoeakin mo tekem hem i kam long ples ya,+
3 tok blong Jehova i kamtru long Esikel* we i boe blong pris ya Busi, taem hem i stap klosap long Kebara Reva long kantri blong ol man Koldia.+ Long ples ya, han blong Jehova i kam long hem.+
4 Taem mi stap lukluk i go, mi luk wan strong win blong hariken+ i aot long not mo i stap kam, mo i gat wan bigfala klaod wetem faea* we i stap saen,+ mo raonabaot long olgeta i gat wan bigfala laet. Long medel blong faea ya, i gat wan samting we i luk olsem elektram.*+
5 Insaed long hem, mi luk olsem fo laef samting i stap,+ mo sep blong olgeta wanwan i olsem blong man.
6 Olgeta wanwan oli gat fo fes mo fo wing.+
7 Leg blong olgeta i stret mo aninit long leg blong olgeta i olsem leg blong wan smol buluk, mo oli saen olsem kopa we man i saenemgud.+
8 Olgeta oli gat ol han blong man aninit long ol wing blong olgeta long fofala saed. Ol fofala laef samting ya oli gat ol fes mo ol wing.
9 Ol fo wing blong olgeta oli tajem olgeta. Taem ol laef samting ya oli go, oli no tanem olgeta, be olgeta wanwan oli go stret long fored.+
10 Ol fes blong olgeta i luk olsem: Olgeta evriwan i gat fes blong man, mo fes blong laeon+ i stap long raetsaed, fes blong bul+ long lefsaed, mo olgeta evriwan i gat fes blong igel.+
11 Fes blong olgeta i olsem nao. Olgeta oli stretem ol wing blong olgeta i go antap. Olgeta wanwan oli gat tu wing we en blong wan i tajem en blong narawan, mo tu narafala wing i kavremap bodi blong olgeta.+
12 Olgeta wanwan oli go stret long fored, oli go long eni ples we spirit i pulum olgeta i go long hem.+ Mo taem oli go, oli no tanem olgeta.
13 Mo ol laef samting ya, oli luk olsem ol sakol faea we oli stap laet, mo wan samting we i luk olsem ol stik faea we oli laet strong, oli stap muv i go i kam bitwin ol laef samting ya, mo laetning i stap kamaot long ol faea ya.+
14 Mo taem ol laef samting ya oli go mo oli kam, oli muv kwik olsem laet blong laetning.
15 Taem mi stap lukluk ol laef samting ya, mi luk we klosap long evri laef samting ya we oli gat fo fes, i gat wan wil we i stap long wol.+
16 Ol wil ya mo sep blong olgeta oli saen olsem krisolaet, mo ol fofala wil ya oli sem mak nomo. Sep blong olgeta i luk olsem we wan wil i stap insaed long wan narafala wil.*
17 Taem oli muv, oli save muv i go long eniwan long ol fo saed we oli no nid blong tanem olgeta.
18 Ol rim blong olgeta oli hae we oli hae i go antap, mo oli mekem mi mi sapraes we mi sapraes, mo raon long ol rim blong ol fofala wil ya, i gat fulap ae long olgeta.+
19 Enitaem we ol laef samting ya oli muv, ol wil ya tu oli muv wetem olgeta, mo taem ol laef samting ya oli aot long wol mo oli muv i go antap, ol wil ya tu oli muv i go antap.+
20 Ol laef samting ya oli go long eni ples we spirit i pulum olgeta blong go, hemia long eni ples we spirit i go long hem. Mo taem oli muv i go antap, ol wil ya tu oli muv i go antap wetem olgeta, from we spirit we i stap wok long ol laef samting ya,* hem i stap tu long ol wil ya.
21 Taem ol laef samting ya oli muv, ol wil ya tu oli muv. Mo taem oli stop, ol wil ya oli stop. Mo taem oli aot long wol mo oli muv i go antap, ol wil ya tu oli muv i go antap wetem olgeta, from we spirit we i stap wok long ol laef samting ya, hem i stap tu long ol wil ya.
22 Antap long hed blong ol laef samting ya, i gat wan samting we i olsem wan platfom we i saen olsem aes we i naes tumas. Platfom ya i bigwan we i bigwan mo i stap antap long hed blong ol laef samting ya.+
23 Aninit long platfom ya, ol wing blong ol laef samting ya oli stret i go antap,* we wan i fas long narawan. Mo evri laef samting ya oli gat tu wing blong kavremap wansaed bodi blong olgeta, mo tu wing blong kavremap narasaed.
24 Taem mi harem noes blong ol wing blong olgeta, i olsem noes blong ol wota we oli stap ron spid, olsem noes blong God Ya We i Gat Olgeta Paoa.+ Taem oli muv, noes blong olgeta i olsem noes blong ol ami. Mo taem oli stop, oli letem ol wing blong olgeta i godaon.
25 I gat wan voes i kamaot antap long platfom we i stap antap long hed blong ol laef samting ya. (Taem oli stop, oli letem ol wing blong olgeta i godaon.)
26 Antap long platfom we i stap antap long hed blong ol laef samting ya, i gat wan samting we i luk olsem ston ya safaea,+ mo sep blong hem i olsem wan tron.*+ Mo mi luk wan samting we sep blong hem i olsem wan man mo hem i stap sidaon long tron ya, we i stap antap.+
27 Long ples we i luk olsem stat blong weist blong hem i go antap, mi luk wan samting i saen olsem wan elektram+ mo i olsem wan faea we i stap saen bigwan. Mo stat long weist blong hem i godaon, mi luk wan samting we i olsem faea.+ Wan bigfala laet i saenaot raonabaot long hem,
28 olsem laet blong wan renbo+ we i kamaot long klaod long taem blong ren. Bigfala laet ya we i saenaot raonabaot long hem i luk olsemia nao. Hem i luk olsem glori blong Jehova.+ Taem mi luk samting ya, mi foldaon we fes blong mi i go long graon, mo mi stat blong harem voes blong wan man we i stap toktok.
Ol futnot
^ Hemia i minim “God i Mekem Man i Kam Strong.”
^ Hemia wan aean we i saen, mo we oli miksim gol mo silva blong wokem.
^ NT: “mo laetning.”
^ Maet wan wil i krosem narafala wil.
^ PT: “spirit blong laef samting ya.”
^ MNT: “open.”
^ NT: “jea blong king.”
