Aesea 60:1-22
60 “O woman,+ yu girap, yu saenaot from we laet blong yu i kam finis.
Glori blong Jehova i stap saen long yu.+
2 !Yu luk! Tudak bambae i kavremap wol,Mo dak klaod bambae i kavremap ol nesen.
Be Jehova bambae i saen i kam long yu,Mo ol man bambae oli luk glori blong hem long yu.
3 Ol nesen bambae oli go long laet blong yu+Mo ol king+ bambae oli go long laet blong yu we i stap saen, we i naes tumas.*+
4 !Yu leftemap ae blong yu, mo yu lukluk raon long yu!Olgeta evriwan oli kam wanples finis, oli stap kam long yu.
Ol boe blong yu oli aot longwe oli stap kam yet,+Mo ol gel blong yu, ol man oli karem olgeta long hips blong olgeta olsem ol pikinini.+
5 Long taem ya, bambae yu luk mo yu glad tumas,+Mo hat blong yu bambae i jamjam mo i fulap gud long glad,From we ol sas samting blong solwota bambae oli kam long yu,Mo ol gudgudfala samting blong ol nesen bambae oli kam long yu.+
6 Ol grup blong kamel bambae oli fulap gud long graon blong yu,*Hemia ol yang man kamel blong Midian mo Efaha.+
Olgeta long Seba, bambae oli kam,Bambae oli karem gol mo frangkinsens i kam wetem olgeta.
Bambae oli talemaot ol gudgudfala samting blong Jehova.+
7 Bambae oli karem olgeta sipsip blong Kedara+ i kam long yu.
Ol man sipsip blong Nebaeot+ bambae oli wok blong yu.
Bambae oli kam long olta blong mi from mi glad long olgeta,+Mo bambae mi mekem haos blong mi we i stap saen,* i kam naes moa.+
8 ?Hu olgeta we oli stap flae i go olsem ol klaod,Olsem ol sotleg we oli stap flae i go long haos blong ol sotleg?*
9 Ol aelan bambae oli putum hop long mi,+Ol sip blong Tasis oli lidim olgeta i go,*Blong tekem ol boe blong yu we oli stap longwe,+Wetem ol silva mo ol gol blong olgeta,I kam long nem blong Jehova God blong yu, mo long Tabu Man Blong Isrel,From we hem bambae i leftemap* yu.+
10 Ol man blong narafala kantri bambae oli bildim ol stonwol blong yu,Mo ol king blong olgeta bambae oli wok blong yu,+Mi mi wipim yu from we mi kros,Be bambae mi sore long yu from mi glad long yu.*+
11 Ol get blong yu bambae oli open i stap oltaem,+Bambae oli no sat long dei no long naet,Blong ol man oli karem ol gudgudfala samting blong ol nesen i kam long yu,Mo ol king blong olgeta bambae oli lidim wok ya.+
12 Eni nesen mo eni kingdom we bambae i no wok blong yu, bambae i lus,Mo ol nesen bambae oli kam nogud olgeta.+
13 Bambae glori blong Lebanon i kam long yu,+Hemia tri ya junipa mo tri ya asis mo tri ya saepres,+Blong flasem ples blong tabu ples blong mi.
Bambae mi leftemap ples blong putum leg blong mi.+
14 Ol boe blong ol man we oli stap mekem i strong long yu, bambae oli kam mo oli bodaon long fored blong yu,Olgeta evriwan we oli no stap respektem yu, oli mas bodaon klosap long leg blong yu,Mo bambae oli mas singaot yu se taon blong Jehova,Saeon blong Tabu Man Blong Isrel.+
15 Nating se mi lego yu finis, mo ol man oli no laekem yu nating, mo i no gat man i kam pastru long yu,+Be bambae mi mekem yu yu kam wan ples blong harem gud olwe,Yes, bambae yu kam olsem wan samting we olgeta jeneresen bambae oli glad from.+
16 Mo bambae yu dring melek blong ol nesen,+Bambae yu titi long titi blong ol king,+Mo bambae yu save se mi, Jehova, mi mi Sevia blong yu,Mo God blong Jekob we i gat Bigfala paoa, i Man ya we i pembak yu.+
17 Fastaem hem i kopa, be bambae mi karem gol i kam,Mo fastaem hem i aean, be bambae mi karem silva i kam,Fastaem hem i wud, be naoia kopa,Mo fastaem hem i ston, be naoia aean,Mo bambae mi putumap pis olsem ol ovasia blong yu,Mo stret fasin olsem ol man blong givim wok long yu.+
18 Bambae i no moa gat nius blong faet long kantri blong yuMo bambae i no gat eni samting i save brebrekemdaon mo spolem ol samting insaed long ol boda blong yu.+
Mo bambae yu singaotem ol stonwol blong yu se Sevem+ mo ol get blong yu se Presem.
19 San bambae i no moa givim laet long yu long dei,Mo mun bambae i no saen blong givim laet long yu,From we Jehova bambae i kam olsem wan laet blong yu olwe,+Mo God blong yu bambae i flasem gud yu.+
20 San blong yu bambae i no moa draon,Mo mun blong yu bambae i no moa godaon,From we Jehova bambae i kam olsem wan laet blong yu olwe,+Mo long taem ya, ol dei ya blong yu blong harem nogud, bambae oli finis finis.+
21 Mo olgeta man blong yu bambae oli kam ol stret man,Bambae oli holem graon ya blong olwe.
Olgeta nao oli ol niufala sut ya we mi planem,Yes, oli ol wok blong han blong mi,+ blong mekem se mi kam naes moa.+
22 Smolwan bambae i kam wan taosenMo hemia we i smol olgeta bambae i kam wan strong nesen.
Mi Jehova, mi nao bambae mi mekem i spid long prapa taem blong hem.”
Ol futnot
^ NT: “laet blong yu long eli moning we i saen gud.”
^ PT: “fulap gud long yu.”
^ NT: “mekem naesfala haos.”
^ NT: “go long ol hol long haos blong pijin.”
^ NT: “flasem gud.”
^ NT: “olgeta olsem fastaem.”
^ NT: “mi mekem i gud long yu.”
