Seken Samuel 8:1-18
8 Sam taem biaen, Deved i faet agensem ol man Filistia+ mo i winim olgeta,+ mo i tekemaot Metegama long han blong ol man Filistia.
2 Hem i winim ol man Moab+ mo i mekem olgeta oli ledaon long graon mo i seraotem olgeta i go long tri grup.* Tu grup, hem i kilim olgeta oli ded, mo wan grup, hem i letem olgeta oli laef.+ Nao ol man Moab oli kam ol man blong wok blong Deved mo oli stap givim takis* long hem.+
3 Deved i faet agensem king blong Joba, Hadadesa we i boe blong Rehob, mo i winim hem.+ Long taem ya Hadadesa i stap go blong mekem ol man long Yufretes Reva oli kam aninit long paoa blong hem bakegen.+
4 Nao Deved i holemtaet 1,700 soldia blong Hadadesa we oli ron long hos, wetem 20,000 soldia we oli wokbaot. Biaen Deved i katem string blong leg blong olgeta hos we oli pulum jariot, be i lego 100 nomo i stap.+
5 Taem ol man Siria we oli stap long Damaskes+ oli kam blong givhan long King Hadadesa blong Joba, Deved i kilim i ded 22,000 long olgeta.+
6 Biaen Deved i putumap ol grup blong ol soldia blong hem long Siria long Damaskes, mo ol man Siria oli kam ol man blong wok blong hem mo oli stap givim takis* long hem. Mo long evri ples we Deved i go long hem, Jehova i stap mekem hem i win.*+
7 Ol man blong wok blong Hadadesa oli gat ol raon sil we oli wokem long gol, be Deved i tekemaot long olgeta mo i karem i go long Jerusalem.+
8 Mo tu, King Deved i tekemaot plante plante kopa long tufala taon blong Hadadesa, hemia Beta mo Berotae.
9 Nao King Tohae blong Hamat+ i harem se Deved i winim ful ami blong Hadadesa.+
10 Ale Tohae i sanem boe blong hem Joram blong i go luk King Deved, mo askem long hem se hem i oraet no olsem wanem, mo blong talem se hem i glad long hem from we hem i faet agensem Hadadesa mo i winim hem. Hemia from we plante taem Hadadesa i faet agensem Toe. Mo taem Joram i go luk Deved, hem i tekem sam samting we oli wokem long silva, gol, mo kopa.
11 Nao King Deved i mekem ol samting ya oli kam tabu, oli blong Jehova, wetem ol silva mo gol we hem i tekemaot long olgeta nesen taem hem i winim olgeta:+
12 Hemia Siria, Moab,+ mo ol man Amon, ol man Filistia,+ ol laen blong Amalek,+ mo Hadadesa+ we i boe blong Rehob mo i king blong Joba.
13 Mo tu, nem blong Deved i stap kam antap moa, afta we hem i kilim i ded 18,000 man Edom long Vali Blong Sol.+
14 Deved i putumap ol grup blong ol soldia blong hem long Edom. Hem i putumap ol grup ya long olgeta ples long Edom, mo olgeta man Edom oli kam ol man blong wok blong Deved.+ Mo long evri ples we Deved i go long hem, Jehova i stap mekem hem i win.*+
15 Nao Deved i gohed blong rul long olgeta ples long Isrel,+ mo Deved i rulum olgeta man blong hem+ long jastis mo long stret fasin.+
16 Joab+ we i boe blong Jeruia, hem i lidim ol ami, mo Jehosafat+ we i boe blong Ahilud, hem i man blong raetemdaon samting.
17 Jadok+ we i boe blong Ahitub mo Ahimelek we i boe blong Abiata, tufala i pris, mo Seraea i sekretari.
18 Mo Benaea+ we i boe blong Jehoeada, hem i lidim ol man Keret mo ol Peletaet.*+ Mo ol boe blong Deved oli kam ol jif minista.*
Ol futnot
^ Blong mekem samting ya, hem i yusum wan rop blong makem se hamas man bambae oli ded mo hamas man bambae oli laef.
^ NT: “presen.”
^ NT: “presen.”
^ NT: “sevem hem.”
^ NT: “sevem hem.”
^ Hemia ol bodigad blong Deved.
^ NT: “jif ofisa.” PT: “ol pris.”
