Seken Buk Blong Kronikel 5:1-14
5 Nao Solomon i finisim olgeta wok we hem i mas mekem long haos blong Jehova.+ Biaen hem i go tekem ol samting we papa blong hem Deved i mekem i tabu,+ mo i putum ol samting ya long haos ya, mo hem i putum ol silva, ol gol, mo olgeta narafala samting long ples blong putumgud ol sas samting long haos blong tru God.+
2 Long taem ya, Solomon i singaot evri elda blong Isrel oli kam wanples, hemia olgeta we oli hed blong ol traeb, mo olgeta long Isrel we oli jif long haos blong papa blong olgeta. Olgeta oli kam long Jerusalem, blong tekemaot bokis blong kontrak blong Jehova long Taon Blong Deved,+ hemia Saeon,+ mo karem i go antap.
3 Nao olgeta man Isrel oli kam wanples long fored blong king, long taem blong lafet* we oli stap mekem long namba 7 manis.+
4 Nao olgeta elda blong Isrel oli kam, mo ol Livaet oli leftemap Bokis ya.+
5 Oli karem Bokis ya, wetem tent blong miting,*+ mo olgeta tabu samting we oli stap yusum long tent ya. Ol pris mo ol Livaet* nao oli karem ol samting ya i go antap.
6 Nao King Solomon wetem ful asembli blong Isrel we hem i bin singaot olgeta blong oli kam luk hem, oli kam wanples long fored blong Bokis ya. Mo i gat plante plante sipsip mo buluk we oli kilim blong mekem sakrefaes,+ we man i no save kaontem olgeta evriwan.
7 Nao ol pris oli karem bokis blong kontrak blong Jehova i go long ples blong hem, long rum we i insaed olgeta, hemia long Rum We i Tabu We i Tabu, aninit long wing blong tufala jerubim ya.+
8 Long rod ya, ol wing blong tufala jerubim ya i longfala i gokros long ples we bokis i stap long hem, nao tufala jerubim ya i stap antap mo oli kavremap gud Bokis ya mo ol stik blong hem.+
9 Tufala stik ya i longfala, taswe man we i stap long Rum We i Tabu, hemia long fored blong rum ya we i insaed olgeta, hem i save luk en blong tufala stik ya, be man we i stap aotsaed i no save luk. Oli stap long ples ya kam kasem tede.
10 Insaed long Bokis ya i gat tu flat ston nomo, be i no gat narafala samting. Tufala flat ston ya, Moses i bin putum insaed taem hem i stap long Horeb,+ long taem ya we Jehova i mekem wan kontrak+ wetem ol man Isrel taem oli kamaot long Ijip.+
11 Taem ol pris oli kamaot long holi ples (olgeta pris we oli stap long ples ya, oli mekem olgeta oli tabu finis,+ nomata se oli blong wanem grup),+
12 olgeta evriwan long laen blong Livae we oli man blong singsing,+ oli werem ol klos we oli wokem long gudfala kaliko mo oli holem ol simbol, ol instramen we oli gat string, mo ol hap, mo oli stanap long is blong olta. Asaf,+ Heman,+ Jedutun+ mo ol boe blong trifala wetem ol brata blong olgeta, olgeta nao oli lidim olgeta ya, mo i gat 120 pris we oli stap wetem olgeta mo oli stap blo long ol trampet.+
13 Nao stret long taem we ol man oli blo long trampet mo ol man blong singsing oli stap talem tangkiu mo oli presem Jehova tugeta, mo saon blong ol trampet, ol simbol, mo ol narafala instramen blong miusik oli kam antap taem oli stap presem Jehova, “from we hem i gud mo fasin blong hem blong lavem man oltaem i stap olwe,”+ wan klaod i kam fulumap haos ya, hemia haos blong Jehova.+
14 Nao ol pris oli no moa save stap blong mekem minista wok blong olgeta from klaod ya, from we glori blong Jehova i fulumap haos blong tru God.+
