Fas Buk Blong Kronikel 15:1-29
15 Nao Deved i gohed blong wokem ol haos blong hem long Taon Blong Deved, mo hem i mekemrere wan ples blong putum Bokis blong tru God long hem mo i stanemap wan tent blong Bokis ya.+
2 Long taem ya nao Deved i talem se: “Ol Livaet nomo oli gat raet blong karem Bokis blong tru God, be ol narafala nogat, from we Jehova i jusumaot olgeta nao blong oli karem Bokis blong Jehova mo blong oli mekem minista wok blong hem oltaem.”+
3 Biaen Deved i singaot olgeta man Isrel oli kam wanples long Jerusalem, blong oli tekem Bokis blong Jehova i go antap long ples ya we hem i rerem finis i stap.+
4 Deved i mekem olgeta ya we oli kamaot biaen long Eron+ mo ol Livaet+ oli kam wanples:
5 Long laen blong Kohat, i gat Uriel we i lida, wetem 120 brata blong hem,
6 long laen blong Merari, i gat Asaea+ we i lida, wetem 220 brata blong hem,
7 long laen blong Gesom, i gat Joel+ we i lida, wetem 130 brata blong hem,
8 long olgeta we oli kamaot biaen long Elijafan,+ i gat Semaea we i lida, wetem 200 brata blong hem,
9 long olgeta we oli kamaot biaen long Hebron, i gat Eliel we i lida, wetem 80 brata blong hem,
10 long olgeta we oli kamaot biaen long Usiel,+ i gat Aminadab we i lida, wetem 112 brata blong hem.
11 Mo tu Deved i singaot tufala pris ya Jadok+ mo Abiata,+ mo ol Livaet ya: I gat Uriel, Asaea, Joel, Semaea, Eliel, mo Aminadab,
12 mo hem i talem long olgeta se: “Yufala ya yufala i hed blong ol famle blong ol Livaet. Yufala i mas mekem yufala i kam tabu, yufala wetem ol brata blong yufala, mo yufala i go tekem Bokis blong Jehova we i God blong Isrel i kam, mo yufala i go putum antap long ples ya we mi rerem finis i stap.
13 Faswan taem, i no yufala we i karem Bokis ya,+ taswe kros blong Jehova we i God blong yumi i kasem yumi,+ from we yumi no bin traem faenemaot stret rod blong karem Bokis ya.”+
14 Nao ol pris mo ol Livaet oli mekem olgeta oli kam tabu, blong oli save tekem Bokis blong Jehova we i God blong Isrel, i go antap.
15 Biaen ol Livaet oli karem Bokis blong tru God long ol stik blong hem mo oli putum long solda blong olgeta,+ stret olsem we Jehova i bin talemaot long Moses.
16 Biaen, Deved i talem long ol lida blong ol Livaet blong oli putumap ol brata blong olgeta we oli man blong singsing, blong oli singsing wetem glad, wetem ol instramen ya blong miusik: Ol instramen we oli gat string, ol hap,+ mo ol simbol.+
17 Ale ol Livaet oli putumap Heman+ we i boe blong Joel, mo long ol brata blong hem, oli putumap Asaf+ we i boe blong Berekia, mo long laen blong Merari we oli ol brata blong olgeta, oli putumap Etan+ we i boe blong Kusaea.
18 Mo ol brata blong olgeta we oli stap long seken grup,+ olgeta tu oli joen wetem olgeta. I gat Sekaraea, Ben, Jasiel, Semiramot, Jehiel, Uni, Eliab, Benaea, Mahasea, Matitia, Elifelehu, mo Miknea, mo i gat Obededom wetem Jeiel we tufala i man blong gad long get.
19 Mo ol man ya blong singsing, hemia Heman,+ Asaf,+ mo Etan, oli plei long ol simbol we oli wokem long kopa,+
20 mo Sekaraea, Asiel, Semiramot, Jehiel, Uni, Eliab, Mahasea, mo Benaea, oli plei long ol instramen we oli gat string folem tiun blong Alamot,*+
21 mo Matitia,+ Elifelehu, Miknea, Obededom, Jeiel, mo Asasia oli plei long ol hap folem tiun blong Seminit,*+ mo oli lidim singsing.
22 Kenania+ we i lida blong ol Livaet, hem nao i lukaot long wok ya blong karem Bokis, from we hem i savegud wok ya,
23 mo Berekia wetem Elkana tufala nao i gad long Bokis ya.
24 Sebania, Josafat, Netanel, Amasae, Sekaraea, Benaea, mo Eliesa we oli ol pris, olgeta oli go fastaem long Bokis blong tru God mo oli blo strong long ol trampet,+ mo Obededom wetem Jehia tufala tu i gad long Bokis.
25 Nao Deved wetem ol elda blong Isrel mo ol lida blong taosen man, olgeta tu oli wokbaot wetem olgeta, we oli glad tumas.+ Oli go blong tekemaot bokis blong kontrak blong Jehova long haos blong Obededom,+ mo tekem i go antap.
26 Mo from we tru God i givhan long ol Livaet we oli karem bokis blong kontrak blong Jehova, olgeta oli kilim seven yang bul mo seven man sipsip, blong mekem sakrefaes.+
27 Ol Livaet we oli karem Bokis, mo ol man blong singsing, mo Kenania we i lida blong olgeta we oli karem Bokis mo blong ol man blong singsing, oli werem wan kot we i no gat han blong hem we oli wokem long gudfala kaliko, mo Deved tu i werem wan kot olsem. Mo tu, Deved i werem wan efod we oli wokem long linen.+
28 Olgeta man Isrel oli tekem bokis blong kontrak blong Jehova i kam antap. Oli glad tumas nao oli stap singsingaot+ mo oli blo long hon mo ol trampet,+ mo oli plei long ol simbol, mo oli stap mekem bigfala noes wetem ol instramen we oli gat string mo ol hap.+
29 Be taem oli tekem bokis blong kontrak blong Jehova i kam insaed long Taon Blong Deved,+ Mikal we i gel blong Sol+ i lukluk i godaon tru long windo mo i luk we King Deved i stap jamjam olbaot mo i stap mekem lafet, nao long hat blong hem, hem i no moa tinghevi long Deved.+
