Fas Buk Blong Kronikel 13:1-14
13 Nao Deved i toktok wetem ol lida blong taosen man, ol lida blong handred man mo wetem evri narafala lida.+
2 Biaen hem i talem long ful kongregesen blong Isrel se: “Sipos i oraet long yufala mo i stret long lukluk blong Jehova we i God blong yumi, i gud yumi sanem tok i go long ol narafala brata blong yumi we oli stap long olgeta rijen blong Isrel, mo long ol pris tu wetem ol Livaet we oli stap long ol taon blong olgeta+ we i gat ples blong putum ol animol long hem. Yumi singaot olgeta blong oli kam mo joenem yumi.
3 Mo i gud yumi go tekem Bokis+ blong God blong yumi i kambak long ples ya.” Hemia from we long taem blong Sol, olgeta oli no lukluk long Bokis ya.+
4 Nao ful kongregesen i agri blong mekem olsem, from we olgeta man oli luk se hemia i stret.
5 Ale Deved i singaot ful Isrel i kam wanples, stat long reva* blong Ijip i go kasem Lebohamat,*+ blong oli go tekembak Bokis blong tru God long Kiriatsearim.+
6 Nao Deved wetem olgeta man Isrel oli go antap long Bahala,+ long Kiriatsearim, ples blong ol man Juda. Oli go antap ya blong tekem Bokis blong trufala God Jehova, we i sidaon long jea blong king, antap long* ol jerubim,+ ples ya we ol man oli stap singaot long nem blong God.
7 Be oli putum Bokis ya blong tru God long wan niufala kat we buluk i pulum,+ nao oli aot long haos blong Abinadab oli tekem i kam. Usaha wetem Ahio, tufala nao i stap lidim kat ya.+
8 Nao long fes blong tru God, Deved wetem ful Isrel oli stap singsing mo oli stap danis long olgeta paoa blong olgeta, mo oli stap plei long ol hap, ol narafala instramen we oli gat string, ol tamborin,+ ol simbol,+ mo ol trampet.+
9 Be taem oli kam long ples blong klinim wit blong Kidon, buluk we i stap pulum kat i mekem se klosap Bokis i foldaon, nao Usaha i pusum han blong hem mo i holemtaet Bokis ya.
10 Ale Jehova i kros tumas long Usaha nao i kilim hem i ded, from we hem i pusum han blong hem i go long Bokis ya.+ Nao Usaha i ded long ples ya long fored blong God.+
11 Be Deved i harem nogud* from we Jehova i kros nao i panisim Usaha. Mo stat long taem ya kam kasem tede, oli singaot ples ya se Peresusaha.*
12 Ale long dei ya Deved i fraet long tru God, mo i talem se: “?Olsem wanem bambae mi tekem Bokis blong tru God i kam long mi?”+
13 Nao Deved i no moa tekem Bokis ya i go long ples we hem i stap long hem, hemia long Taon Blong Deved. Be hem i mekem se Bokis ya i go long haos blong Obededom we i blong Gat.
14 Nao Bokis blong tru God i stap wetem olgeta long haos blong Obededom, i stap tri manis long haos blong hem, mo Jehova i gohed blong blesem olgeta we oli stap long haos blong Obededom mo olgeta samting we hem i gat.+
Ol futnot
^ NT: “long Siho.”
^ NT: “long get blong Hamat.”
^ MNT: “bitwin.”
^ NT: “kros.”
^ Hemia i minim “Kros Blong Hem i Kasem Usaha.”
