Fas Buk Blong Ol King 17:1-24
17 Nao Elaejah,*+ wan man Tisbe we i stap long Gilead,+ i talem long Ehab se: “Long nem blong Jehova we i God blong Isrel we i laef i stap, mo we mi mi wok blong hem, mi mi talem long yu se bambae i no gat wota blong naet mo ren blong sam yia, go kasem taem we mi talem se bambae i gat.”+
2 Mo tok blong Jehova i kamtru long hem, se:
3 “Yu aot long ples ya, mo yu tanem i go long is, yu go haed long Krik Ya Kerit,* hemia long is blong Jodan Reva.
4 Bambae yu dring wota long smol reva ya, mo mi bambae mi talem long ol pijin ya reven blong karem kakae i kam long yu.”+
5 Nao kwiktaem nomo hem i mekem olsem we Jehova i talem. Hem i aot mo i go stap klosap long Krik Ya Kerit,* long is blong Jodan Reva.
6 Nao long moning mo long aftenun, ol pijin ya reven oli stap tekem bred mo mit i kam long hem, mo hem i stap dring wota long smol reva ya.+
7 Be sam dei afta, smol reva ya i kam drae,+ from we i no moa gat ren long kantri ya.
8 Nao tok blong Jehova i kamtru long hem se:
9 “Yu girap, mo yu go long taon ya Jarefat we i stap long teritori blong Saedon, mo yu stap long ples ya. !Yu luk! Bambae mi talem long wan wido long ples ya blong i givim kakae long yu.”+
10 Nao Elaejah i girap mo i go long Jarefat. Taem hem i kamtru long get blong taon ya, i gat wan wido i stap pikimap faeawud. Nao hem i talem long wido ya se: “Plis yu givim smol wota long kap blong mi dring.”+
11 Taem wido ya i go blong karem wota, man ya i singaot long hem se: “Plis yu tekem wan pis bred tu i kam.”
12 Nao wido ya i talem se: “Mi mi talem long yu long nem blong Jehova, God blong yu we i laef i stap, se mi mi no gat bred, i gat smol flaoa nomo long bigfala jag mo smol oel long smol jag.+ Mi mi stap pikimap faeawud ya blong bambae mi go mekem smol kakae blong mi mo boe blong mi. Mo afta we mitufala i kakae, bambae mitufala i ded.”
13 Nao Elaejah i talem long hem se: “Yu no fraet. Yu go mekem samting we yu talem. Be fastaem, yu yusum ol samting ya blong wokem wan smol raon bred, mo yu tekem i kam. Biaen yu save mekem wan kakae blong yu wetem boe blong yu.
14 From we hemia samting we Jehova God blong Isrel i talem: ‘Flaoa we i stap long bigfala jag ya bambae i no save finis, mo oel we i stap long smol jag ya tu bambae i no save finis, gogo kasem dei ya we Jehova i sanem ren i kamdaon long graon.’”+
15 Nao wido ya i go mekem olsem we Elaejah i talem, mo hem wetem Elaejah mo famle blong hem oli gat kakae long plante dei.+
16 Nao flaoa long bigfala jag ya i no finis mo oel we i stap long smol jag ya tu i no finis, stret olsem we Jehova i bin talem long Elaejah.
17 Biaen long ol samting ya, boe blong woman blong haos ya i sik, nao sik ya i kam strong tumas gogo hem i no moa pulum win.+
18 Nao woman ya i talem long Elaejah se: “!O man blong tru God! ?Mi mi mekem wanem i nogud long yu? Ating yu yu kam long ples ya blong mekem mi mi tingbaot rong blong mi mo blong mekem boe blong mi i ded.”+
19 Be Elaejah i talem long hem se: “Yu givim boe ya long mi.” Ale hem i tekemaot boe ya long mama blong hem, mo i karem hem i go long rum blong hem antap long ruf, mo i putum boe ya long bed blong hem.+
20 Nao hem i singaot i go long Jehova se: “O God blong mi Jehova,+ ?from wanem yu mekem wido ya we mi stap wetem hem, i kasem trabol ya tu, taem yu letem boe blong hem i ded?”
21 Biaen hem i bendaon antap long pikinini ya tri taem mo i singaot i go long Jehova se: “O God blong mi Jehova, plis, yu givimbak laef* blong hem.”
22 Jehova i lesin long samting we Elaejah i askem,+ mo i givimbak laef* blong pikinini ya, nao hem i laef bakegen.+
23 Nao Elaejah i aot long rum ya antap long ruf mo i tekem boe ya, tufala i godaon mo tufala i go insaed long haos, nao hem i givimbak boe ya long mama blong hem, mo i se: “Yu luk, boe blong yu i laef.”+
24 Nao woman ya i talem long Elaejah se: “Naoia mi mi save se i tru we yu yu man blong God,+ mo tok blong Jehova we yu yu stap talemaot i tru.”
Ol futnot
^ Hemia i minim “God Blong Mi Hem i Jehova.”
^ NT: “Wadi Ya Kerit.”
^ NT: “Wadi Ya Kerit.”
^ NT: “sol.”
^ NT: “sol.”
