?Olsem wanem oli tekem ol pija we i laenap wetem ol toktok long ol buk mo magasin? Blong luk olsem wanem oli mekem samting ya, bambae yumi luk ol step we oli folem blong wokem pija long fored blong Wekap! magasin blong Oktoba-Disemba 2015. a

• Disaen. Dipatmen blong disaenem ol pija, i stap long Watchtower Educational Center, Patterson, Niu Yok. Fastaem, oli ridim atikol ya, “?Mane i Gud No i Nogud?,” mo oli droem sam pija blong i laenap wetem taetel ya. Biaen, oli givim ol pija ya long Raeting Komiti blong Hed Kampani, we olgeta nao oli jusum weswan pija we bambae oli tekem long kamera.

• Ples. Olgeta we oli tekem foto, oli no go long wan bang blong tekem foto, be oli jusum wan rum long Watchtower Educational Center, mo mekem olsem wan bang. b

• Ol man. Olgeta we oli stap long foto ya, oli ol Witnes blong Jehova nomo. Oli jusum olgeta blong mekem oli luk olsem se oli stap long wan bang we i gat plante defren man long hem. Oli raetem nem blong olgeta blong meksua se, oli no yusum sem man oltaem long ol buk mo magasin.

• Ol samting we oli yusum. Dipatmen blong disaenem ol pija i yusum ol mane blong narafala kantri blong soemaot se bang ya i no stap long Yunaeted Stet. Olgeta we oli tekem foto oli traem blong mekem se ples blong tekem foto bambae i klosap sem mak olsem wan bang. Craig, wan we i stap long tim blong tekem foto, i talem se: “Mifala i mekem evri samting blong mekem ples ya i luk olsem wan bang.”

• Klos mo mekap. Ol man long foto, oli yusum prapa klos blong olgeta. Sipos foto ya i blong soem wan samting blong bifo, no wan foto we man i mas werem wan spesel yunifom, Dipatmen blong disaenem ol pija i mas stadi gud long klos mo samting we i stret blong mekem long mekap. Olgeta we oli mekem mekap, oli yusum ol samting we i stret folem taem mo ples long foto ya. Craig i talem se: “Ol pija we ol man oli tekem tede oli klia gud, from samting ya mifala i traehad blong mekem foto i klia gud. Wan smol mastik nomo, i save spolem ful pija.”

• Tekem foto. Olgeta blong tekem foto, oli meksua se i mas gat laet blong mekem man i luk olsem se oli tekem foto long dei. Ol man blong tekem foto oli mas jekem se laet we oli yusum i stret folem ol defdefren taem we oli tekem foto (laet blong san, laet blong mun, no laet blong lektrik). Craig i talem se: “Long wan video, ol samting oli hapen long defren taem, be long wan foto, samting i hapen wan taem nomo. Taswe, laet i wan samting we i impoten, long taem blong tekem foto.”

• Editim. Olgeta we oli editim foto, oli mekem mane we i stap long pija i no klia, hemia blong mekem se man i no lukluk mane nomo, be i luk ful pija. Ol doa mo frem blong windo long pija ya oli red, be olgeta we oli editim foto oli jenisim i kam grin blong mekem i laenap wetem ful pija.

I gat ol narafala branj ofis we oli gat ol man blong tekem foto, we oli tekem foto mo sanem i kam long Patterson, blong yusum long ol buk mo magasin. Long ol branj ofis ya, i gat Ostrelia, Brasil, Kanada, Jemani, Japan, Koria, Malawi, Meksiko, mo Saot Afrika. Evri manis, Dipatmen blong disaenem ol pija long Patterson i putum samwe 2,500 foto i go long ol kompiuta blong olgeta. Plante long olgeta i stap long Wajtaoa mo Wekap!, we long 2015 oli seremaot bitim 115 milian kopi blong ol magasin ya. Blong save moa, yu save visitim ol ofis blong mifala long Patterson, Niu Yok, o eni long ol branj ofis blong mifala long fulwol. Mifala i glad blong welkamem yu.