Cluj-Napoca i wan long ol bigfala taon long Romania, mo plante man oli singaot taon ya se Taon We i Rij. Long 20 kasem 24 Eprel 2016, taem oli mekem wan maket blong ol buk long taon ya Gaudeamus, ol Witnes blong Jehova oli soemaot plante gudfala advaes blong Baebol. Oli wokem wan haos tapolen, mo oli toktok wetem plante taosen man. Ol man ya oli glad tumas blong luk ol video, ol buk we oli tokbaot Baebol, mo ol Baebol tu.

Long taem ya, i gat plante pikinini tu we ol tija blong olgeta oli tekem olgeta oli kam long haos tapolen blong ol Witnes. Ol pikinini oli glad tumas blong wajem ol katun ya Kam Fren Blong Jehova, mo plante long olgeta oli wantem karem Buk Blong Ol Baebol Stori mo buklet ya Yu Tijim Pikinini Blong Yu. Wan woman we i stap lukaot long ol pikinini ya i talem long fren blong hem se: “Yumi mas raetem daon Websaet ya [www.jw.org], blong yumi save soem evri katun ya long ol pikinini.”

Ol yangfala oli laekem tumas video blong ol katun we man i droem olsem, ?Mi Stap Drim No Mi Lavem Hem?, Yu Save Winim Wan Stronghed, mo Yu Mas Waes Taem Yu Gat Ol Fren Long Intenet.

Wan pris blong Otodoks jos mo woman blong hem, tufala i kam visitim ol Witnes plante taem, mo tufala i karem Niu Wol Translesen Baebol mo sam narafala buk. Pris ya i talem se, hem i sapraes bigwan long “Indeks Blong Ol Wod Long Baebol,” mo gudfala risej we ol transleta oli mekem. Hem i givim fon namba blong hem long ol Witnes blong oli save storian moa long saed blong Baebol.

Woman blong pris ya i askem weples long Websaet ya jw.org hem i save faenem ol samting blong ol pikinini, mo wan long ol Witnes ya i lidim hem i go long haf ya “Ol Pikinini.” Biaen, hem i wajem video ya Yu Mas Tok Tru, mo hem i laekem tumas. Afta we pris ya i luk ol samting long Websaet, hem i talem se hemia “presen we God i givim long ol man.”