Naoia oli stap yusum ol bilding long Warwick. Long stat blong Septemba, i gat samwe long 500 brata mo sista oli stap long Warwick. Hemia ol konstraksen volontia, mo samfala we oli bin stap wok fultaem long Brooklyn Betel.

Wan man blong dro i stap jekem ol tael long wol blong go insaed long sorum we nem blong hem, “Ol Man We Oli Karem Nem Blong Jehova.” Oli bin mekem sam spesel samting long ol tael ya, blong mekem oli luk olsem we oli blong bifo. Hemia i laenap gud wetem ol histri we i stap insaed long sorum ya.

Brata Stephen Lett we i wan memba blong hed kampani blong ol Witnes blong Jehova, hem i jeaman blong fas Moning Wosip we oli rikodem long Warwick. Mo hem i ridim wan leta blong talem tangkiu long bitim 27,000 volontia we oli givhan blong bildim niufala hedkwota ya, mo plante narafala tu we oli sapotem wok ya long ol defdefren rod.

Wan kapenta i putum ol leta long saen blong sorum ya, “Ol Man We Oli Karem Nem Blong Jehova,” we i soemaot histri blong ol Witnes blong Jehova, stat long yia 1870 kam kasem naoia. I gat tri defren sorum long hedkwota ya.

Raeting Komiti i mekem miting wetem ol helpa blong hem, mo wetem olgeta long Raeting Dipatmen. Ol bigfala skrin oli soemaot ol pija we oli save yusum long ol buk, mo oli mekem se ol brata mo sista long ol narafala dipatmen oli save toktok i kam long komiti long miting ya. Tebel ya oli kasem olsem presen plante yia finis, mo oli muvumaot long Brooklyn i kam long Warwick.

Wan helpa blong Kodineta Komiti, wetem samfala we oli wok blong dipatmen ya, oli tokbaot ol rod blong givhan long olgeta we oli kasem trabol from bigfala hariken ya Haima (Lawin), we i bin kilim Filipin wan dei bifo. Teknoloji i givhan long ol dipatmen long wol hedkwota blong oli save tekem aksen kwiktaem from ol impoten samting olsem, mo tu oli save toktok i go long ol branj ofis raon long wol.

Wan smol lek i stap long medel blong Bilding Blong Mentenens mo bigfala rod blong kam insaed. Long lek ya mo long sam narafala lek long Warwick, oli yusum sam gudfala rod blong kasem mo klinim ol ren wota. Hemia i sevem 50 pesen blong mane we bambae oli spenem, sipos oli putum ol drenej. Mo tu, ren wota we oli klinim mo i ron i go long ol krik raonabaot, hem i gud long ol plant mo ol animol long ol krik ya.

Wan grup i tekemaot ol bokis we ol trak oli karem i kam. Samwe long 80 wokman oli givhan long olgeta we oli bin laef long hedkwota long Brooklyn, blong oli muv i kam long niufala hom blong olgeta long Warwick.

Ol man blong wokem bred oli kafsaedem wan bigfala besin flaoa we oli miksim finis, i go long tebol. From we hem i hevi bitim 45 kilo, oli yusum wan winis blong mekem i isi mo i sef blong leftemap besin ya. Mo tu, long Warwick i gat wan masin we oli save kontrolem hot blong hem, blong mekem bred i solap kwik o sloem daon wok ya. Masin ya i givhan bigwan long wok blong kukum plante handred bred evri wik.

Ol wokman blong Bilding Sevis oli tekemaot doti long Bilding Blong Mentenens. Bighaf blong ol bilding long Warwick oli joen, mekem se i no nidim plante man mo trak blong tekemaot ol doti. Hemia i defren long Brooklyn Betel bifo.

Wan brata i spre wota long ol klos mo i yusum wan masin blong aeanem olgeta. Londri Dipatmen i wasem bitim 5,000 kilo klos mo bedsit evri wik. Oli putum stika long ol klos ya, blong oli save skanem mo meksua se oli lukaot gud long olgeta, mo putum olgeta oli gobak long ol stret dipatmen o rum.

Wan mekanik i jekem mo fiksimap wan bigfala masin we oli yusum long haos blong ol jenereta blong leftemap ol samting. Wok ya i mekem se ol masin oli stap gud longtaem mo oli sef blong yusum.

Wan man we i save gud teknoloji i jekem wan app long kompiuta, we i soemaot sam haf blong sorum ya “Bilif We i Wok.”

Ol kapenta oli rerem wan baskel we oli bin wokem long 1903, blong putum long sorum ya “Ol Man We Oli Karem Nem Blong Jehova.” Ol wokman long Warwick oli wokem gud bakegen baskel ya we sam brata oli givim, mo oli yusum blong soemaot hadwok mo sakrefaes blong ol Baebol Studen (biaen oli tekem nem ya Ol Witnes Blong Jehova), taem oli stap talemaot ol tok blong Baebol.

Ol kapenta oli putum glas blong blokem sam samting we oli joen wetem “Photo-Drama of Creation,” hemia ol slaed mo ol pija we oli muvmuv. Samwe long 9 milian man oli wajem ol pija ya long yia 1914, taem oli kamaot.

Wan man mo wan woman we tufala i wokem gud bakegen ol olfala samting mo wan woman blong dro, oli rerem Zurich Latin Bible we oli wokem long 1544, blong putum long sorum ya “Baebol Mo Nem Blong God.” Red ara ya we yumi save luk long fas Baebol, i soemaot nem blong God, Jehova. Ol man we oli wokem ol olfala Baebol ya oli lukaot gud blong protektem olgeta. Eksampol: Oli yusum ol pis blong riben blong holem ol pej oli stap long stret ples blong olgeta, oli kontrolem tempraja blong galeri, mo oli meksua se laet i no strong tumas mo i no spolem ol tintin pepa ya.

Ol visita oli save lukluk gud ol bilding long Warwick, taem oli stap antap long taoa ya we i hae olsem 23 meta. Long 3 Eprel 2017, oli statem ol tua blong ol sorum mo ol bilding long Warwick. Olgeta we oli wantem mekem wan tua, oli mas bukum tua long websaet ya long haf ya MIFALA > OFIS MO TUA.

Wan man blong wokem gud bakegen ol olfala samting, i putum wan King James Version blong 1611, i go long wan bokis blong displei long hem. I had blong faenem wan kopi blong ol olfala Baebol olsem. Sam wokman long Warwick oli wokem ol bokis ya i stret long ol Baebol we oli wantem soemaot.

Wan woman blong dro i putum wan hat blong bifo long wan bokis blong displei long hem. Hemia hat blong Joseph F. Rutherford, we hem i lidim ol Witnes blong Jehova long 100 yia bifo. Galeri we i stap blong sorum ya “Ol Man We Oli Karem Nem Blong Jehova,” i soemaot wok blong ol Witnes blong talemaot gud nius blong Kingdom long taem bifo.

Odio tim i rikodem wan brata we ol man oli lesin long hem, taem oli stap lukluk ol samting long sorum ya “Baebol Mo Nem Blong God.” Oli stat blong rikodem ol samting long Warwick, wan wik nomo afta we oli muvum studio mo ol masin blong hem oli aot long Brooklyn oli kam long Warwick. Oli yusum studio ya tu (we i joen wetem men rikoding studio long Wajtaoa Edukesen Senta long Patterson), blong rikodem riding blong Baebol Long Niu Wol Translesen, wetem Wajtaoa mo Wekap! mo sam narafala buk long jw.org.

Wan sista we i givhan long ol kapenta, i pentem en blong ol wud we oli putum ol foto long hem. Ol wud ya oli stap long sorum ya “Ol Man We Oli Karem Nem Blong Jehova,” mo oli soemaot ol foto blong ol Baebol Studen klosap long yia 1900.

Wan woman blong dro i pentem wan pija blong Keleb, we i stap long ol katun ya Kam Fren Blong Jehova. Pija ya bambae i stap long galeri blong ol program mo ol narafala samting we ol Witnes blong Jehova oli wokem blong ol pikinini.

Wan kapenta i katem ol foto mo ol saen blong sorum ya, “Ol Man We Oli Karem Nem Blong Jehova.” Bitim 250 man mo woman oli wok long trifala sorum ya, go kasem we oli finisim olgeta. I gat olgeta we oli wokem ol kabod, ol program blong kompiuta, droem ol plan, lektrik, putum ol tael, rikodem ol video, mo raetem ol stori.