Mi bon long Ciudad Obregón long not blong Meksiko, mo mi namba 5 blong ol 9 pikinini. Mifala i laef long wan ples aotsaed long taon. Long ples ya, papa blong mi i stap lukaot long wan smol fam. I wan gudfala ples, mo famle blong mifala i joengud mo i glad. Sore tumas, taem mi gat 5 yia blong mi, wan hariken i spolem fam blong mifala, ale mifala i muv i go long wan narafala taon.

Papa blong mi i winim plante mane, be long semtaem hem i kam wan man blong dring bitim mak. Samting ya i spolem mared laef blong hem mo mama blong mi, mo mifala tu ol pikinini. Mi mo tufala bigfala brata blong mi i stat blong smokem sigaret we mifala i stilim long papa. Faswan taem we mi drong hemia taem mi gat 6 yia nomo. Smoltaem afta, papa mo mama blong mi i seraot, mo ol fasin blong mi i kam nogud moa.

Mama i tekem mifala i go wetem hem taem hem i go stap wetem wan narafala man. Man ya i no givim mane long hem, mo mane we mama i winim i no naf blong pem ol samting we mifala i nidim. Taswe mi mo ol brata mo sista blong i mekem sam smosmol wok tu, be mane we mifala i kasem i no naf blong pem ol samting we mifala i nidim long laef. Wok blong mi i blong polisim ol sus, salem bred, niuspepa, jingom, mo sam narafala samting olsem. Mi stap wokbaot olbaot long taon blong lukaot kakae long ol rabis pin blong ol man we oli rij.

Taem mi gat 10 yia blong mi, wan man i askem mi blong wok wetem hem blong pikimap ol toti blong taon. Mi agri blong wok wetem hem, ale mi lego skul mo mi aot long haos. Hem i pem mi samwe 100 vatu olsem long wan dei mo i givim kakae long mi we mifala i pikimap long rabis pin. Mi slip long wan smol haos we mi wokem long doti. Ol man we mi laef wetem olgeta oli stap swea mo mekem nogud fasin blong seks. Plante oli man blong tekem drag mo dring bitim mak. Hemia wan rabis taem long laef blong mi, mi krae evri naet, mo mi fraet tumas. From we mi pua mo mi no skul gud, mi sem tumas. Mi laef long ples blong doti blong samwe long 3 yia, kasem taem mi muv i go long wan narafala ples long Meksiko. Long ples ya, mi wok long ples blong pikimap flaoa, koten, sugaken mo ol poteto.

Fo yia afta mi gobak long Ciudad Obregón. Wan sista blong papa blong mi we i wan wij dokta i givim wan rum blong slip long mi. Mi stat blong gat ol rabis drim long naet mo tingting blong mi i foldaon bigwan kasem mak ya we mi gat tingting ya blong kilim ded mi wan. Wan naet mi prea long God se: “Masta, sipos yu laef i stap, mi wantem save yu, mo bambae mi mekem wok blong yu olwe. Sipos i gat wan trufala skul, plis yu soem long mi.”

Oltaem mi laekem blong lanem sam samting long saed blong God. Taem mi smol, mi go long plante defren jos, be mi no glad long olgeta evriwan. I no gat wan long olgeta we i tokbaot Baebol o i halpem mi blong harem gud long saed blong spirit. Samfala oli tokbaot moa mane, mo sam narafala oli ol man we oli stap mekem nogud fasin blong seks.

Taem mi gat 19 yia, hasban blong seken bon sista blong mi i talem long mi se, ol Witnes blong Jehova oli soem long hem samting we Baebol i talem long saed blong ol pija we oli skul oli stap yusum blong mekem wosip. Hem i ridim Eksodas 20:4, 5 long mi. Vas ya i tokbaot se yumi no mas mekem pija blong ol samting blong wol ya mo heven. Vas 5 i talem se: “Bambae yufala i no mas bodaon long aedol olsem blong mekem wosip long hem, from we mi mi [Jehova], mi God blong yufala, mo yufala i man blong mi, nao mi mi no save letem yufala i mekem wosip long narafala god bakegen.” Nao hem i askem long mi se, “Sipos God i letem yumi yusum ol pija blong mekem ol merikel o sipos hem i wantem yumi yusum long wosip, ?from wanem hem i blokem yumi blong yusum ol pija ya?” Samting ya i mekem mi wantem save moa. Afta long hemia, mifala i tokbaot plante narafala topik blong Baebol tu. Mi glad tumas long ol samting we mi lanem nao mi no moa luk se taem we mitufala i spenem blong storian i stap pas kwik.

Biaen, hem i tekem mi go long wan miting blong ol Witnes blong Jehova. Mi mi glad mo sapraes tumas long samting we mi luk mo harem. !Mi luk se ol pikinini tu oli joen long program, oli mekem ol gudfala tok long platfom! !Mi stap tingting se, ‘ol man ya oli stap lanem plante samting ya!’ Nating se hea blong mi i longfala mo mi no klin tumas, be oli welkamem gud mi. !Wan famle i invaetem mi tu blong go kakae wetem olgeta afta long miting!

Taem mi stadi Baebol wetem ol Witnes blong Jehova, mi lanem se Jehova God i wan Papa we i kea long eni man nomata sipos man ya i gat mane o no, i kamaot long wanem laen o kalja, o i skul gud o nogat. I tru nomo se hem i mekem i stret long olgeta man. (Ol Wok 10:34, 35) Naoia mi harem gud long saed blong spirit. Mi no moa harem se mi no glad mo mi mestem wan samting long laef.

!Laef blong i kamgud kwiktaem nomo! Mi stop blong smok, mi lego alkol, mo mi stop blong swea. Ol nogud filing we mi gat taem mi smol oli lus, mo mi no moa stap luk ol rabis drim long naet. Mo tu, mi winim nogud tingting ya se mi nogud from ol samting we oli hapen long laef blong mi taem mi smol mo from mi no skul gud.

Mi gat wan gudfala waef we i lavem Jehova mo i sapotem mi bigwan. Naoia mi mekem wok olsem wan long ol eria elda blong ol Witnes blong Jehova. Mi stap visitim ol kongregesen blong leftemap tingting mo tijim ol brata mo sista blong mi. Tangkiu tumas long God from Baebol mo gudfala tijing we hem i givim long yumi we i mekem se mi no moa harem se mi sem.