Pa mulandu ne fyo Inte sha kwa Yehova batemwa Lesa e lyo na bantu bambi, balabombesha ukwebako abantu bonse pa fyo Baibo ilanda, ukubikako fye na bonse abashalefwaya ukukutika ku numa. (Mateo 22:37-39) Ukutemwa Lesa kulalenga tuleumfwila ifunde lya mwana wakwe ilya “kulabila sana ubunte.” (Imilimo 10:42; 1 Yohane 5:3) Pa kuti tucite ifi, tulabila imbila nsuma pa miku iingi, nga filya fine fye na ba kasesema ba kwa Lesa abaliko ku nshita ya ku numa balecita. (Yeremia 25:4) Pa mulandu wa kuti twalitemwa abantu banensu, tulabombesha ukubila “mbila nsuma ya Bufumu” ku bantu bonse, ukubikako fye na kuli balya bene abashalefwaya ukukutika ku numa.—Mateo 24:14.

 Ilingi tulasanga abantu abafwaya ukukutika nga ca kuti twabwelela ku bantu abashalefwaya ukukutika ku numa. Tontonkanyeni pali ishi inshila shitatu ishingalenga mwasanga abalefwaya ukumfwa:

•   Abantu balakuuka.

•   Abantu bambi pali iyo ng’anda kuti bafwaya ukukutika ku mbila nsuma.

•   Abantu balaaluka. Ificitika mu calo nelyo ifintu ificitikila umuntu umo umo kuti fyalenga ‘aishiba ukuti alakabila ifya kwa Lesa,’ ne ci kuti calenga alafwaisha ukukutika ku fyo Baibo ilanda. (Mateo 5:3) Na balya bene abakaanya kuti baaluka nga filya fine cali na ku mutumwa Paulo.—1 Timote 1:13.

 Icishinka ca kuti, tatupatikisha umuntu uuli onse ukukutika ku mbila iyo tubila. (1 Petro 3:15) Twalishiba ukuti umuntu onse alingile ukuisalilapo umwine pa fintu ifikumine imipepele.—Amalango 30:19, 20.