UKULANSHANYA ILYASHI LYA MU BAIBOLO
Cinshi Lesa Asuminishisha Ukucula?
Ifi e fyo Inte sha kwa Yehova balanshanya na bantu. Natwelenganye ukuti ba Michelle baya pa ng’anda ya ba Sophia mu kubashimikila.
BUSHE LESA OMFWA SHANI NGA TULECULA?
Michelle: Muli shani ba Sophia? Natemwa ukumusanga.
Sophia: Cawama, na ine natemwa ukuti mwaisa.
Michelle: Umuku wafumineko, twalanshenye pa fyo Lesa omfwa nga tulecula. * Mwanjebele ukuti tamwashininkisha nga ca kuti Lesa alomfwa ububi nga tulecula, sana sana ukutula palya banyinenwe babelele mu busanso bwa pa musebo. Bushe bali shani?
Sophia: Kwena limo balomfwako bwino e lyo limo balomfwa ububi. Lelo lyena nababuukako bwino.
Michelle: Cawama nga baleumfwako bwino. Ukutensha mwandini mulimo uukalamba.
Sophia: Ca cine sana. Limo ndatontonkanyapo ukuti bushe bakulacula fye ifi fine.
Michelle: Ca cine e fyo abengi bomfwa, nalimo muleibukisha umuku wafumineko ukuti twalandile ukutila tukesalanshanya pa mulandu Lesa asuminishisha ukucula nangu ca kuti alikwata amaka ya ku kufumyapo.
Sophia: Ee, ndeibukisha.
Michelle: Ilyo tushilabelenga ifyo Baibolo ya-asuka ici cipusho, lekeni tulande pa fishinka fimo fimo ifyo twalanshenye.
Sophia: Cili fye bwino.
Michelle: Twasambilile ukuti umubomfi wa kwa Lesa umo uwa kale na o taishibe ico Lesa asuminishisha ukucula. Na lyo line, Lesa tamukalipile nelyo ukumweba ukuti takwete icitetekelo.
Sophia: Nshaishibe ukuti kwali na bambi abashaishibe ico Lesa asuminishisha ukucula.
Michelle: Twasambilile no kuti Yehova Lesa tomfwa bwino nga tulecula. Ku ca kumwenako, Baibolo itila ilyo abantu bakwe balecula, “na o alecula.” * Bushe tatusansamuka ukwishiba ukuti Lesa tomfwa bwino nga tulecula?
Sophia: Ee, tulasansamuka.
Michelle: Twalanshenye no kuti amaka Kabumba wesu akwata, yalenga twashininkisha ukutila pa nshita ili yonse kuti afumyapo ukucula.
Sophia: Ifi fine e fyo mfilwa ukumfwikisha. Mulandu nshi Lesa uwakwata amaka engalekela ifyabipa ukulacitika?
NI NANI UWA CISHINKA?
Michelle: Pa kwasuka ici cipusho, natubale tubelenge ibuuku lya Ukutendeka. Bushe mwalishiba ilyashi lilanda pali Adamu na Efa e lyo ne cisabo ico babakenye ukulya?
Sophia: Ee balitusambilishepo ku Sunday school. Lesa alibakenye ukulya icisabo ca ku muti umo ifi, lelo tabamumfwilile.
Michelle: Ca cine. Nomba natulande pa fyalengele Adamu na Efa ukubembuka. Ifyacitike e fyalatwafwa ukwishiba icilenga tulecula. Bushe kuti mwabelenga Ukutendeka icipandwa 3, icikomo 1 ukufika ku 5?
Sophia: Mukwai paleti: “Kabili pa nama shonse isha mu mpanga isho Yehova Lesa abumbile, insoka e yali iyacenjela sana. Kabili insoka yaipwishe umwanakashi aiti: ‘Bushe ca cine Lesa amwebele ukuti mwilalyako ku muti onse uwa mwi bala?’ Na o umwanakashi ayaswike insoka ukuti: ‘Ku fisabo fya miti yonse iya mwi bala kuti twalyako. Lelo ifisabo fya ku muti uwaba pa kati ke bala, Lesa atila, “Mwilalyako iyo, kabili mwilakumyako epali mwafwa.”’ Na yo insoka e pa kweba umwanakashi aiti: ‘Ukufwa tamwakafwe. Pantu Lesa alishiba ukuti mu bushiku mukalyako e mo amenso yenu yakashibulwa kabili mukaba nga Lesa, mukeshiba ubusuma no bubi.’”
Michelle: Natasha pa kubelenga. Twamona muli ili ilembo ukuti insoka yalandile na Efa. Ibuuku lya mu Baibolo limbi lilanda ukuti Satana Kaseebanya e walandiile mu cisoka. * Satana aipwishe Efa pe funde Lesa abapeele pa cimuti icali mu Edeni. Bushe batini Lesa atile cinshi cali no kucitikila Adamu na Efa nga baliliile kuli cilya cisabo?
Sophia: Bali no kufwa.
Michelle: Cishinka. Lelo fimbi ifyo Satana alandile filanga ukuti alibepeshe Lesa ubufi ubwafiita fititi. Atile: “Ukufwa tamwakafwe.”
Sophia: Ifi mwalanda nshafyumfwapo.
Michelle: Kabili ilyo Satana abepeshe Lesa ubufi, aliletele umulandu uwali no kupwa pa numa ya nshita iitali. Bushe mwamona ico Lesa tafumishapo ukucula ukufika na pali ino nshita?
Sophia: Kwena nshishibe.
Michelle: Nalimo lekeni imupeele ica kumwenako. Tutile namweba ukuti nalikwata amaka ukumucila. Bushe kuti mwacita shani pa kunshinina?
Sophia: Kuti namweba ukuti tucite fimo ifyalalanga uukwetepo amaka.
Michelle: Cishinka. Nalimo kuti twasenda icintu icafina sana pa kuti tumone uwingakwanisha ukucimya. Ukucita ifi kuti kwalenga twaishiba uwakwata amaka.
Sophia: Naumfwa ifyo mwalanda.
Michelle: Nomba mu nshita ya kumweba ukuti nalikwata amaka ukumucila, namweba ati ndi wa cishinka, imwe tamwaba na cishinka, bushe kuti mwashininkisha shani? Kuti cayafya te fyo?
Sophia: Ee kuti cayafya.
Michelle: Kuti cayafya pantu ifyo wingeshibilako umuntu wa cishinka fyapusana ne fyo wingeshibilako uwa maka.
Sophia: Ni fyo fine.
Michelle: Pa kuti abantu bamone uwa cishinka, bafwile ukulamona ifyo tulecita pa nshita ntali.
Sophia: Ifyo mwalanda fya cine.
Michelle: Nomba lekeni tulande na kabili pali ili lyashi lya mu Ukutendeka. Bushe Satana alandile ukuti alikwete sana amaka ukucila Lesa?
Sophia: Awe.
Michelle: Ifi nga e fyo cali, nga tacayafishe Lesa ukulanga Satana ukuti alimucila amaka. Lelo Satana alemona kwati Lesa taba ne cishinka. Cali kwati aebele Efa ukuti, ‘Lesa alimubepa ubufi, lelo ine ifyo ndemweba e fya cine.’
Sophia: Mwalanda bwino sana.
Michelle: Lesa alimwene ukuti nga papita inshita e lyo cali no kwishibikwa uwa cishinka pali ena na Satana.
UMULANDU UUKALAMBA
Sophia: Lelo bushe ilyo Efa afwile, tacaishibikwe ukuti Lesa e wa cishinka?
Michelle: Ee calishibikwe. Na lyo line, kwali na fimbi ifyo Satana asuushishe. Belengeni na kabili icikomo 5. Finshi fimbi ifyo Satana aebele Efa?
Sophia: Amwebele ati nga alya ku cisabo, amenso yakwe yali no kushibulwa.
Michelle: Kabili amwebele no kuti mukaba “nga Lesa, mukeshiba ubusuma no bubi.” Kanshi Satana aletila fye Lesa alitanine abantunse icintu icisuma.
Sophia: Mukwai naumfwa.
Michelle: Nomba ifi abebele, bufi ubwafiita fititi.
Sophia: Mwalosha mwi?
Michelle: Ifi Satana alandile, aloseshe mu kuti Efa e lyo na bantunse fye bonse kuti baikala bwino ukwabula Lesa ukubateka. Ici e calengele Yehova amone ukuti palekabila papita inshita pa kuti Satana alange nga ca kuti ifyo alandile fyali fya cine. E mulandu wine Lesa asuminishisha Satana ukuti aleteka. Kanshi apo Satana e uteka cino calo, e calenga ukucula konse uko tumona muno calo. * Nangu cibe ifi, kwaliba ifintu ifingatusansamusha.
Sophia: Fintu nshi ifyo fine?
Michelle: Baibolo ilalanda pa fintu fibili ifyacindama. Ica kubalilapo, Yehova alamona nga tulecula. Ku ca kumwenako, moneni ifyo Imfumu Davidi, yalandile pa Amalumbo 31:7. Davidi alipitile mu mafya ayengi, lelo umfweni ifyo alandile mwi pepo kuli Lesa. Bushe kuti mwatemwa ukubelenga ili ilembo?
Sophia: Mukwai paletila: “Nkaanga no kusekelela mu cikuuku cenu, pantu namumona ukucula kwandi; Namwishiba amacushi ya mweo wandi.”
Michelle: Kanshi nangu ca kuti Davidi alipitile mu mafya, alisansamushiwe ilyo aishibe ukuti Yehova alemona amafya yonse alepitamo. Bushe tamutemenwe ukwishiba ukuti Yehova aleshiba amafya yonse tupitamo e lyo na masakamika ayo nalimo abantunse banensu bashingomfwikisha?
Sophia: Ala mukwai natemwa ukumfwa ifi!
Michelle: Ica bubili ca kuti Lesa takaleke tukatwalilile ukulacula. Baibolo itweba ukuti nomba line akafumyapo ukuteka kwa kwa Satana. Kabili akafumyapo ne fintu fyonse ifyabipa e lyo na macushi ayo imwe na bafyashi benu mulepitamo. Bushe nkabwele uyu mulungu uleisa pa kuti tukalanshanye umulandu twingacetekelela ukuti nomba line Lesa akafumyapo ukucula konse? *
Sophia: Kuti natemwa sana.
Bushe kwalibako ilyashi lya mu Baibolo ilyo mwingatemwa ukwishiba? Bushe mulafwaya ukwishiba fimo pa Nte sha kwa Yehova e lyo ne fyo basuminamo? Nga mulafwaya, kuti cawama mwaipusha Nte uuli onse. Akatemwa sana ukulanshanya na imwe.
^ par. 7 Belengeni pa mutwe uleti “Ukulanshanya Ilyashi lya mu Baibolo—Bushe Lesa Alasakamana Nga Tulecula?” muli magazini ya July 1, 2013. Kuti mwaisanga na pa www.jw.org.
^ par. 17 Belengeni Esaya 63:9.
^ par. 26 Belengeni Ukusokolola 12:9.
^ par. 55 Belengeni Yohane 12:31; 1 Yohane 5:19.
^ par. 61 Nga mulefwaya ukwishibilapo na fimbi, belengeni icipandwa 9 mu citabo citila Bushe Cinshi Baibolo Isambilisha? icalembwa ne Nte sha kwa Yehova. Kuti mwacisanga na pa www.jw.org.
