Ifyalengele Ukuti Yesu abe ne Nsansa

BUSHE cine cine Yesu ali ne nsansa? Yesu afwile akuliile ku ncende ukwali abapiina kabili imyaka yonse aikele pe sonde takwete ifintu ifingi. Yesu “takwete apa kusaisha umutwe.” (Luka 9:57, 58) Na kabili balimupatile, balemubepesha ubufi e lyo abalwani bakwe basukile bamwipaya no kumwipaya.

Nga mwamona ifyo imikalile ya kwa Yesu yali, nalimo kuti mwatila, ‘Imikalile ya musango uyu te ingalenga umuntu ukuba ne nsansa.’ Lelo kwaliba ifintu na fimbi ifyo tufwile ukwishiba pali Yesu. Natulande pa fintu fine ifyamulengele ukuba ne nsansa.

1. YESU ALITEMENWE UKUCITA UKUFWAYA KWA LESA.

“Ica kulya candi kucita ukufwaya kwa wantumine.”—Yohane 4:34.

Ifyo alelanda no kucita, filanga fye ukuti Yesu alefwaisha ukucita ukufwaya kwa kwa Wishi, Yehova. * Yesu alitemenwe sana ukucita ukufwaya kwa kwa Lesa. Nga fintu ilembo lyambwilwe lilelanda, Yesu apashenye ukucita ukufwaya kwa kwa Lesa ku ca kulya. Natulande pa fyalecitika ilyo Yesu alandile aya mashiwi.

Yesu alandile aya mashiwi ninshi akasuba kali pa kati. (Yohane 4:6) Apo alyendele ulucelo lonse mu Samaria umwaba sana impili, afwile alyumfwile insala. Na kuba, abasambi bakwe balemupaapata abati: “Rabi, lyeni.” (Yohane 4:31) Ifyo Yesu abaswike filanga fye ukuti ukucita ukufwaya kwa kwa Lesa kwalimukoseshe kabili kwalimusansamwishe. Bushe ifi tafilelanga fye ukuti Yesu ali ne nsansa?

2. YESU ALITEMENWE SANA WISHI.

“Nalitemwa Tata.”—Yohane 14:31.

Ilyo Yesu ali ku muulu, aleumfwana sana na Wishi. Ifyo Yesu atemenwe sana Lesa fyalengele ukuti aleshimikilako bambi pali Wishi, ishina lyakwe, ifyo afwaya, e lyo ne mibele yakwe. Ifyo Yesu alelanda, imibele yakwe e lyo ne micitile yakwe filanga ukuti alepashanya sana Wishi, ica kuti nga twabelenga pa fyo aali, ciba kwati tulemona Wishi. E mulandu wine ilyo Filipi aipwishe Yesu ukuti: “Tulangeni Shinwe,” Yesu amwasukile ati: “Uwamona ine, ninshi amona na Tata.”—Yohane 14:8, 9.

Yesu alitemenwe sana Wishi ica kuti ali ne cumfwila ukufika fye na ku mfwa. (Abena Filipi 2:7, 8; 1 Yohane 5:3) Ukutemwa kwa musango yu e kwalengele Yesu ukuba ne nsansa.

 3. YESU ALITEMENWE ABANTU.

“Takuli uwaba no kutemwa ukwacila pali uku, ukwa kuti umuntu atuulile abanankwe umweo wakwe.”—Yohane 15:13.

Apo tuli babembu, twalilufya isubilo lya kuti ifintu ku ntanshi fikawama. Baibolo itila: “Filya ulubembu lwaingilile mu muntu umo [Adamu] pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.” (Abena Roma 5:12) Kanshi te kuti tuipusushe ku mfwa, pantu tuli babembu.—Abena Roma 6:23.

Icawama ca kuti Yehova alitupeela icingatupususha ku lubembu ne mfwa. Alekele Umwana wakwe uwapwililika Yesu, ukucula no kufwa pa kuti engapeela icilubula icalekabilwa pa kupususha abantunse ku lubembu ne mfwa. Pa mulandu wa fyo atemenwe Wishi na bantunse, Yesu alisumiine ukufwa no kupeela ubumi bwakwe ubwapwililika pa kuti atulubule. (Abena Roma 5:6-8) Ukutemwa kwa musango yu ukwa cine cine kwalengele Yesu ukuba ne nsansa. *

4. YESU ALISHIBE UKUTI WISHI ALIMUTEMENWE KABILI ALESEKELA MULI ENA.

“Uyu e Mwana wandi, uwatemwikwa, uo nsekelamo.”—Mateo 3:17.

Yehova alandile aya amashiwi ilyo Yesu alebatishiwa. Pa kulanda aya amashiwi, Yehova alangile apabuuta tuutu ukuti alitemenwe Umwana wakwe Yesu, no kuti alesekela muli ena. E co Yesu alandiile ukuti: ‘Tata alintemwa’! (Yohane 10:17) Ukwishiba ukuti Wishi alimutemenwe kabili alesekela muli ena, kwalengele Yesu ukushipa ilyo balemucusha no kumupumya. Na kabili ifi fyalengele ukuti ashipikishe ilyo bali mupepi no kumwipaya. (Yohane 10:18) Yesu ali ne nsansa pantu alishibe ukuti Wishi alimutemenwe kabili alesekela muli ena.

Ukwabula no kutwishika Yesu ali ne nsansa. Kanshi kuti twasambililako ifingi kuli ena ifingalenga twaba ne nsansa. Mu cipande cikonkelepo tukalanda pali fimo fimo ifyo Yesu aebele abasambi bakwe ifingalenga twaba ne nsansa.

[Amafutunoti]