Mose Ali Uwaicefya

BUSHE ISHIWI LYA KUTI UKUICEFYA LYALOLA MWI? Ukuicefya kukanaba ne cilumba. Umuntu uwaicefya taimona kwati alicindama ukucila bambi. Lyonse alebukisha ukuti mubembu, kabili aleshiba no kuti kwaliba fimo ifyo ashingacita.

BUSHE MOSE ALANGILE SHANI UKUTI ALI UWAICEFYA? Mose taali uwa cilumba ilyo ali intungulushi. Ilingi umuntu nga aba intungulushi e lyo mwingamona nga ca kuti aliicefya nelyo nga wa cilumba. Kalemba Robert G. Ingersoll uwaliko muli ba 1800, atile: “Inshila isuma iya kwishibilamo nga ca kuti umuntu aliicefya, kumona ifyo atungulula abantu, ifyo atungulula abantu e fingalanga nampo ali-icefya nelyo iyo.” Mose ena ali uwaicefya icine cine. Mulandu nshi twasosela ifi?

Yehova alipeele Mose icifulo icikalamba ica kutungulula abena Israele. Lelo ici tacalengele Mose ukuba uwa cilumba. Ku ca kumwenako, moneni ifyo acitile ilyo bamwipwishe icipusho cakosa sana pa lwa bupyani. (Impendwa 27:1-11) Cilya cipusho cali icayafya pantu ifyo Mose ali no kupingula e fyo bonse bali no kulakonka ku ntanshi.

Bushe Mose acitile shani? Bushe atile apo e wali intungulushi ya bena Israele, ninshi e waishibe bwino ifya kupingula? Bushe pa kupingula ashintilile pa mano yakwe, pa mushinku wakwe nelyo apingwile ukulingana ne fyo Yehova alefwaya?

Umuntu wa cilumba kuti apingula ukulingana ne fyo alefwaya. Lelo Mose ena te fyo acitile. Baibolo itila: “Awe Mose atuulile umulandu wabo kuli Yehova.” (Impendwa 27:5) Nangu fye ni lintu atungulwile abena Israele pa myaka 40, Mose tashintilile pa mano yakwe lelo ashintilile pali Yehova. Cine cine ali uwaicefya!

Mose taleimona ukuti e wingaba fye intungulushi. Alitemenwe sana ilyo Yehova asuminishe ukuti abena Israele bambi babe bakasesema. (Impendwa 11:24-29) Ilyo shifyala amwebele ukusala abaume bamo aba kumwafwako imilimo imo, Mose aliicefeshe no kucita ifyo bamwebele. (Ukufuma 18:13-24) Na lintu Mose ali mupepi no kufwa kabili acili na maka, alombele Yehova ukusala uwa kumupyana. Ilyo Yehova asalile Yoshua ukuba intungulushi, Mose alimutungilile no mutima wakwe onse, kabili aebele abantu ukulaumfwila Yoshua ilyo alebatungulula ukwingila mu Calo Calaiwe. (Impendwa 27:15-18; Amalango 31:3-6; 34:7) Ukwabula no kutwishika, Mose amwene ukuti ukutungulula abena Israele mu fya mapepo, lyali lishuko nga nshi. Lelo alicindike sana abantu ukucila ifyo acindamike ubutungulushi bwakwe.

FINSHI TWINGASAMBILILAKO? Tatufwile ukuba aba cilumba pantu fye natukwata icifulo ca pa mulu, nelyo pa mulandu wa fyo twaishiba. Tuleibukisha ukuti pa kubombela Yehova bwino, tatufwile ukushintilila pa mano yesu, lelo tufwile ukuba abaicefya. (1 Samwele 15:17) Nga tuli abaicefya, twakulaesha na maka ukukonka ukufunda kwa mano ukwa mu Baibolo ukutila: “Tetekela Yehova no mutima obe onse kabili wishintilila pa mano yobe we mwine.”—Amapinda 3:5, 6.

Kuli Mose tulasambililako ukuti tatufwile ukuimona ukuti twalicindama sana pa mulandu wa cifulo twakwata.

Bushe tulanonkelamo nga twapashanya Mose filya ali uwaicefya? Ee, tulanonkelamo! Nga twali-icefya, abengi bakatutemwa kabili bakulafwaya ukuba pamo na ifwe. Ne cacindama sana ca kuti Yehova Lesa uwaicefya akatutemwa. (Amalumbo 18:35) Baibolo itila: “Pantu Lesa acincintila aba matutumuko, lelo apeela icikuuku cakwe ku baicefya.” (1 Petro 5:5) Aya amashiwi yafwile ukutulenga ukuba abaicefya nga Mose!