Yotamu Atwalilile fye Ukuba uwa Cishinka na Lintu mu Lupwa Lwakwe Mwali Amafya
Fundeni Abana Benu
Yotamu Atwalilile fye Ukuba uwa Cishinka na Lintu mu Lupwa Lwakwe Mwali Amafya
UMUFYASHI nga aleka ukuba cibusa wa kwa Lesa wa cine Yehova, umwana alakwata amafya. Natulande pali Yotamu. Twalalanda pa mafya ulupwa lwakwe lwakwete ilyo alekula.
Wishi wa kwa Yotamu Usia, ali ni mfumu ya Yuda. Aali uwa maka sana mu calo conse. Pa myaka iingi Usia ali imfumu iisuma na lintu fye umwana wakwe Yotamu talafyalwa. Lelo ilyo Yotamu ali fye umwaice, Usia abele ne cilumba kabili alitobele Ifunde lya kwa Lesa. Ici e calengele ukuti Lesa amukande ku bulwele bwa fibashi. Bushe nawishiba ifyo Yotamu acitile?— *
Yotamu atwalilile fye ukubombela Yehova. Nalimo banyina ba Yerusha e balemwafwa. Na lyo line, cifwile calyafishe sana kuli Yotamu ukutwalilila uwa cishinka kuli Yehova ilyo ba wishi, ba Usia, babatamfishe mu ng’anda ya kwa Yehova.
Kuti wacita shani nga ca kuti bawiso nelyo banoko baleka ukupepa Yehova? Ici kuti ca kukalifya sana bushe te ifyo?— Lelo tacabipa ukutontonkanya ifyo wingacita nga abafyashi baleka ukupepa Yehova. Ukubelenga ifyo Davidi alembele mu Baibolo kwalatwafwa ukwishiba ukuti tacabipa ukutontonkanya pali ifi.
Wishi wa kwa Davidi, Yese ali umuntu umusuma. Alibombeele Yehova kabili ukwabula no kutwishika Davidi alitemenwe ba wishi. Lelo Davidi alitemenwe sana Yehova ukucila ne fyo atemenwe Yese wishi. Natumone ico twalandila ifi.
Belenga Baibolo pa Amalumbo 27:10. Davidi alembele ati: “Nga tata na mayo bansha, Yehova kuti ambuula.” Bushe nawishiba ifyo Baibolo ilelandapo? Ico ilelandapo ni ci, nga ca kuti wishi wa kwa Davidi Yese, nelyo nyina alilekele ukubombela Yehova, Davidi ali no kutwaliila fye ukumubombela.
Nga iwe kuti wacita shani? Bushe kuti watwalilila ukubombela Yehova nangu ca kuti bawiso nelyo banoko baleka ukumubombela?—Ici, cipusho icisuma ico ulingile ukuipusha. Ico ulingile ukuipushisha ici cipusho ni pa mulandu we funde ilyacindama sana ilyaba mu Baibolo. Ili funde litila: “Uletemwa Yehova Lesa obe no mutima obe onse, no mweo obe onse, no kutontonkanya kobe konse.”
Ili ifunde lipilibula ukuti tulingile ukuba aba cishinka kuli Yehova na lintu ifintu fyafishe. Ni nani uletontonkanya ukuti e ufwaya ukuti tuleke ukubombela Yehova?—Mulwani wa kwa Lesa Satana Kasebanya. Yesu amwitile ati, “kateka wa pano calo.” Na kabili Baibolo imwita ati, “lesa wa bwikashi buno.” Bushe tulingile ukulatiina Satana?—
Awe tatulingile ukumutiina. Lelo tufwile ukwishiba ukuti Yehova alikwatisha amaka ukucila Satana. Yehova akatucingilila nga twamucetekela. Belenga mu Baibolo yobe ifyo Yehova acingilile Davidi kuli Galyati uwali ipaka lya kutiinya. Na iwe Yehova kuti akucingilila nga watwalilila ukuba uwa cishinka kuli ena.
Belenga muli Baibolo yobe
Yohane 12:31; 2 Abena Korinti 4:4
[Futunoti]
^ para. 4 Nga ca kuti mulebelengela capamo na bana, apo mulesanga bashilile fye ninshi mufwile mwalolelako pa kuti abana balandepo.
