“Lyonse Ilyo Mulepepa, Muletila, ‘Mwe Shifwe’”

Nga mwaumfwa ishiwi lya kuti “Tata,” cinshi mutontonkanyapo? Bushe mutontonkanya pa mwaume uwaba no kutemwa kabili uubika amano ku lupwa lwakwe? Nelyo bushe mutontonkanya pa mwaume uushabika amano ku lupwa lwakwe kabili umunkalwe? Ifyo mutontonkanya fyashintilila pa fyo bashinwe baali.

YESU alebomfya sana ishiwi lya kuti “Tata” nelyo “Shifwe” ilyo alelanda kuli Lesa na lintu aleshimikila abantu. * Ilyo Yesu alesambilisha abasambi bakwe ifya kupepa, abebele ati: “Lyonse ilyo mulepepa, muletila, Mwe Shifwe.” (Luka 11:2) Lelo bushe Yehova ni Shifwe wa musango nshi? Icasuko kuli ici cipusho calicindama nga nshi. Mulandu nshi cacindamina? Pantu nga twaishiba bwino bwino ifyo Shifwe Yehova aba, e lyo twingapalama kuli ena kabili e lyo twingamutemwa sana.

Yesu fye e wafikapo ukutusambilisha pali Shifwe wa ku muulu pantu e wali cibusa wakwe uwapalamisha. Atile: “Takwaba uwaishiba bwino Umwana kano Wishi, kabili takwaba nangu umo  uwaishiba bwino Wishi kano Umwana, e lyo na onse uo Umwana afwaya ukumusokolwela.” (Mateo 11:27) Kanshi, inshila isuma iyo twingeshibilamo Shifwe kupitila mu Mwana wakwe.

Finshi twingasambilila kuli Yesu pali Shifwe wa ku muulu? Umfweni amashiwi Yesu alandile. Atile: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yohane 3:16) Aya mashiwi Yesu alandile yasokolola imibele iikalamba iyo Shifwe wa ku muulu akwata, iya kutemwa. (1 Yohane 4:8) Yehova alanga ukuti alitutemwa mu nshila ishingi; alasekelela mu fyo tucita, alatumfwila uluse, alatucingilila, alatusalapula, kabili alatupeela ne fyo tukabila.

Yesu Alilangile Ukuti Shifwe Alasekelela mu fyo Tucita

Abana balakoseleshiwa nga ca kutila abafyashi balebalanga ukuti balasekelela mu fyo bacita. Elenganyeni ifyo Yesu aumfwile bwino ilyo Wishi atile: “Uyu e Mwana wandi, uwatemwikwa, uo nsekelamo.” (Mateo 3:17) Yesu na o alatulanga ukuti Wishi alitutemwa kabili alasekelela mu fyo tucita. Atile: “Uwantemwa, Tata akamutemwa.” (Yohane 14:21) Ala mwandini aya mashiwi yalatusansamusha! Na lyo line, kwaliba umo uushifwaya ukuti mulesansamuka.

Satana afwaya tuletontonkanya ukuti Shifwe wa ku muulu tasekelela mu fyo tucita. Afwaya tulemona kwati ifyo tucita te kuti filenge Yehova ukusekelela. Ilingi acite fi nga ca kuti twakota, twalwala, nelyo tuleumfwa ububi pa mulandu wa kuti twafilwa ukucita ifintu fimo, nangu ifintu tafyendele ukulingana ne fyo twaletontonkanya. Tontonkanyeni icacitikile ba Lucas, abaletontonkanya ukuti Lesa tabatemwa. Ilyo bali abalumendo, abafyashi babo balilekele ukukonka imibele iisuma iyo basambilishe ba Lucas. Napamo ici e calengele ukuti ba Lucas cibakosele ukuba na bucibusa na Shibo wa ku muulu. Na kabili, apo bali aba cipyu, ilingi balekwata amafya, maka maka aya kukanaumfwana na bantu banabo. Lelo mu kuya kwa nshita, abena mwabo, abali abafuuka kabili abalebakoselesha sana, balibafwile ukulalama icipyu bakwete. Ba Lucas balondolola abakashi babo ukuti “bupe ubwafuma kuli Lesa kabili ipaalo ilyaibela.” Ba Lucas baishileiluka ukuti “Kristu Yesu aishile muli ici calo ku kupususha ababembu.” (1 Timote 1:15) Batile, ukutontonkanya pa kutemwa kwa kwa Lesa no kwishiba ukuti alasekelela mu bantu kwalibalenga ukuba ne nsansa icine cine.

Nga ca kuti limo mulatwishika nampo nga Yehova alimutemwa nelyo alasekelela mu fyo mucita, ukubelenga no kutontonkanya pa mashiwi yaba pa Abena Roma 8:31-39 kuti kwamukoselesha. Pali ili lembo, umutumwa Paulo alilandile bwino bwino ukuti takuli nangu cimo ‘icingatupaatulako ku kutemwa kwa kwa Lesa ukwaba muli Kristu Yesu Shikulwifwe.’ *

Shifwe Uwaba no Luse

Shifwe wa ku muulu alishiba ifyo tucula. Ni Lesa “wa luse.” (Luka 1:78) Ifyo Yesu alecita fyalelanga ifyo Wishi aba no luse ku bantunse abashapwililika. (Marko 1:40-42; 6:30-34) Abena Kristu ba cine nabo balesha ukupashanya uluse Shifwe wa ku muulu akwata. Balomfwila ukufunda kwa mu Baibolo ukwa kuti: “Mubelane icikuuku, mube aba mitima ya nkumbu.”—Abena Efese 4:32.

Tontonkanyeni pa cacitikile ba Felipe. Bushiku bumo ilyo baleya ku ncito, baumfwile ubukali mu numa kwati nalimo kuli icabalasa. Bababutushishe ku cipatala. Pa numa ya kubaceeceeta pa ma-awala 8, badokota baishilesanga ukuti umushipa uukalamba uusenda umulopa ku mutima walilepwike. Badokota batile, nangu babatwale ku opareshoni tabali na kupola, pantu kwashele fye amamineti 25 ukuti bafwe.

Bamo abapepa na ba Felipe e po baali ilyo ifi fyalecitika, kabili balyumfwile uluse ica kuti  balicitilepo cimo. Bwangu bwangu bapekenye ukuti babatwale ku citapala cimbi uko bailebacita opareshoni, kabili baikele nabo mpaka bapwisha ukubabombela. Icaweme ca kuti ba Felipe balipuswike. Ba Felipe nga baibukisha icacitike, balatasha pa fyo abo bapepa nabo babalangile icikuuku. Lelo ba Felipe balishininkisha ukuti Shifwe wa ku muulu e walengele ukuti balya bantu babe ne cikuuku kuli bena. Batile: “Cali kwati Lesa ali mupepi na ine ku kunkoselesha, nga filya umufyashi uwaba no kutemwa acita.” Ca cine, ilingi Yehova alatulanga inkumbu ilyo alenga ababomfi bakwe pe sonde ukuba ne yi mibele.

Shifwe Alatucingilila

Umwana nga aumfwa umwenso, alabutukila kuli bawishi pa kuti bamucingilile. Nga ca kuti bawishi bamukumbatila, aleshiba ukuti nacingililwa. Yesu alicetekele sana Yehova ukuti e wingamucingilila. (Mateo 26:53; Yohane 17:15) Na ifwe bene, Shifwe wa ku muulu kuti atucingilila. Muno nshiku, Yehova atucingilila sana ku fingonaula bucibusa bwesu na ena. Mu mashiwi yambi kuti twatila, alatupeela ifyo tukabila pa kuti tutaluke ku fingonaula bucibusa bwesu na ena. Inshila imo iyo atucingililamo, kupitila mu fyo atufunda mu Cebo cakwe. Nga twaumfwila ukufunda kwaba mu Cebo cakwe, ciba kwati Yehova ali pa numa yesu, aletweba ati: “Iyi e nshila. E mo mwende.”—Esaya 30:21.

Umfweni ifyo cali kuli ba Tiago na bamunyinabo babili ba Fernando na ba Rafael. Bonse bali mu kabungwe ka balelisha ifilimba. Balitemenwe nga nshi ilyo babasalile ukuyalisha ifilimba mu cikuulwa cimo icalumbuka nga nshi mu São Paulo, ku Brazil. Bamwene ukuti ifintu nomba fyali no kubawamina. Lelo, Umwina Kristu munabo alibasokele pa bubi bwaba mu kwangala na bantu ba misango yabipa abashikonka amafunde ya kwa Lesa. (Amapinda 13:20) Pa kuti bomfwikishe uku kufunda kwa mu Baibolo, abashimikile icacitike kuli ndume nankwe uwaishileba ne mibele yabipa pa mulandu wa kwangala na bantu babipa. Ba Tiago na bamunyinabo babili bapingwilepo ukuleka ukulisha ifilimba. Ino nshita, bonse batatu balabomba umulimo wa nshita yonse uwa kushimikila imbila nsuma. Balisumina ukuti ukumfwila ukufunda kwa mu Cebo ca kwa Lesa kwalibacingilila ku konaula bucibusa bwabo na Lesa.

Shifwe wa ku Muulu Alatusalapula

Umufyashi uwaba no kutemwa alasalapula abana bakwe pantu afwaya ukuti bakakule bwino. (Abena Efese 6:4) Umufyashi wa musango yu alalungika umwana nga alufyanya, lelo pa kumusalapula alaba ne cikuuku. Ifi fine e fyo na Shifwe wa ku muulu aba, limo alamona ukuti nacilinga ukutusalapula. Lelo lyonse pa kutusalapula alaba no kutemwa, taba ne  culukusu nakalya. Yesu alepashanya Wishi, tali uwa culukusu ilyo alelungika abasambi bakwe nangu ca kutila tabalebombela bwangu pa fyo alebalungika.—Mateo 20:20-28; Luka 22:24-30.

Umfweni icalengele ba Ricardo beshibe ukuti Yehova alebasalapwila mu kutemwa. Ilyo bali fye ne myeshi 7, bawishi balibabutwike. Ilyo ba Ricardo baishileba abalumendo, baleumfwa sana ububi pa mulandu wa kukanakwata shibo. Baipoosele mu mibele yabipa, kabili kampingu yabo yatendeke ukubacusha. Ilyo bailwike ukuti ifyo balecita fyalipusene ne fyo Abena Kristu balingile ukuba, bapingwilepo ukuyalanda na baeluda mu cilonganino. Baeluda balibasalapwile mu kutemwa ukubomfya Baibolo. Ba Ricardo balyumfwile ifyo babebele kabili balitendeke ukufikonka. Lelo nangu cali ifi, kampingu yatwalilile fye ukubacusha pa fyo balecita kale ica kuti limo tabalelaala no tulo, balelila fye no kumfwa sana ubulanda. Mu kuya kwa nshita, baishileiluka ukuti filya babasalapwile calolele mu kuti Yehova acili alibatemwa. Ba Ricardo baibukishe amashiwi yaba pa AbaHebere 12:6 ayatila: “Uo Yehova atemwa alamusalapula.”

Tulingile ukwishiba ukuti ukusalapula takupelela fye pa kukanda nangu ukukalipila uulufyenye. Baibolo ilanga no kuti mu kusalapula mwaba no kusambilisha. Kanshi limo Shifwe wa ku muulu uwatutemwa kuti atusalapula pa kusuminisha ukuti tucule pa nshita iinono pa mulandu wa cilubo twacitile. Lelo Baibolo ilanga ukuti Yehova nga atusalapula ninshi aletusambilisha no kutwafwa ukuba mu nshila iisuma. (AbaHebere 12:7, 11) Ala cine cine, Shifwe alitupoosako sana amano kabili alatulungika pa kuti ifintu fileba bwino kuli ifwe.

Shifwe Alatupeela Ifyo Tukabila

Umufyashi uwaba no kutemwa alasakamana ulupwa mu fyo lukabila. Yehova na o e fyo aba. Yesu atile: “Shinwe wa mu muulu alishiba ukuti mulakabila ifi fyonse.” (Mateo 6:25-34) Yehova atulaya ukuti: “Nshakakushe nakalya nangu ukukulekelesha nakalya.”—AbaHebere 13:5.

Umwanakashi umo ishina lyakwe Nice aishileshininkisha ukuti aya mashiwi ya cine ilyo abalume babafumishe incito. Tapakokwele apo ba Nice balekeele incito pa kuti balepoosa inshita iikalamba na bana babo babili abanakashi no kulabomba imilimo ya kwa Lesa. Nomba ifi abena mwabo nabo incito yapwile, bali no kulaikala shani? Ba Nice balipepele kuli Yehova. Ubushiku bwakonkelepo abena mwabo baile ku ncito mu kusenda utupe twabo utwasheleko. Balipapile nga nshi ilyo umukalamba wa pa ncito abebele ukuti kuli incito imbi iimoneke palya pene pa kampani, kabili balibengishe iyo ncito! Kanshi, incito yapwile nga lelo, ubushiku bwakonkelepo basanga imbi. Ba Nice na bena mwabo balitashishe Shibo wa ku muulu pa kusanga incito. Ici cacitike, citwibukisha ukuti Yehova, uutupeela ifyo tukabila talaba ababomfi bakwe aba cishinka.

Ifyo Twingalanga Ukuti Tulatasha pa fyo Shifwe Atutemwa

Ukulanda fye icishinka, na mashiwi kuti yabula aya kulondolwelamo ifyo Shifwe wa ku muulu atutemwa! Nga twatontonkanya pa nshila shalekanalekana isho atulangilamo ukutemwa, pamo nga ukusekelela mu fyo tucita, ukutumfwila uluse, ukutucingilila, ukutusalapula, no kutupeela ifyo tukabila, te kuti tutwishike no kutwishika ukuti takwaba uwingaba nga ena!

Kuti twalanga shani ukuti tulatasha pa kutemwa uko Shifwe wa ku muulu atulanga? Tufwile ukuibikilishako ukusambilila na fimbi pali Shifwe na pa kufwaya kwakwe. (Yohane 17:3) Tulingile ukulacita ifyo afwaya no kwenda mu nshila shakwe. (1 Yohane 5:3) Tufwile ukutemwa abanensu nga filya fine atutemwa. (1 Yohane 4:11) Nga tulecita ifi fyonse, ninshi tulelanga ukuti Yehova e Shifwe kabili lishuko nga nshi ukuba abana bakwe.

[Amafutunoti]

[Amashiwi pe bula 19]

Nga twaishiba bwino bwino ifyo Shifwe Yehova aba, e lyo twingapalama kuli ena kabili e lyo twingamutemwa sana

[Amashiwi pe bula 22]

Tulelanga ukuti Yehova e Shifwe kabili lishuko nga nshi ukuba abana bakwe

[Akabokoshi ne Fikope pe bula 21]

YEHOVA ALANGA UKUTEMWA MU NSHILA SHALEKANALEKANA KWATI MUFYASHI

ALASEKELELA MU FYO TUCITA

ALATUMFWILA ULUSE

ALATUCINGILILA

ALATUSALAPULA

ALATUPEELA IFYO TUKABILA