Yehova Alinshibula Amenso

Abashimika ili lyashi ni ba Patrice Oyeka

Bushiku bumo icungulo kasuba, nalyumfwile sana ububi nga filya fine naleumfwa lyonse kabili nalefwaya ukuipaya. Pa mulandu wa kuti nalipofwile, naletalalilwa sana kabili nalewisha akasuba ndekutika fye ku cilimba. Nabikile sumu muli kapu no kuibika pa tebulo. Nomba natalile naya mu kusamba pantu nalefwaya ukuti ilyo nshilanwa iyi sumu nsambe, mfwale ne fya kufwala ifisuma. Mulandu nshi nalefwaila ukuipaya? Kabili cinshi cacitike pa kuti na ino nshita mbe umutuntulu no kushimika ili lyashi?

NAFYELWE pa 2 February, mu 1958. Nafyalilwe mu citungu ca Kasaï Oriental, ku Democratic Republic of Congo. Batata bafwile ninshi ndi ne myaka 9, kabili abakalamba bandi abaume e bankushishe.

Ilyo napwishishe isukulu, natendeke ukubomba pa kampani apo balelimba imiti ya kupangilako imipila, amataela, na fimbi. Bushiku bumo, mu 1989, ninshi ndi mu ofeshi ndelemba lipoti, naishilekwata akafiifi pa menso. Pa kubala, natontonkenye ukuti amalaiti e yaile. Lelo naleumfwa mashini ya malaiti ilelila e lyo kabili lwali lucelo! Nalitiinine nga nshi pantu tapali nangu cimo ico nalemona!

Ilyo line, naitile umwaume umo pa baume naleangalila no kumweba ukuti antwale ku mukalamba wa pa kiliniki ya pa ncito. Umukalamba wa pa kiliniki na o anjebele ukuti bantwale fye kuli dokota uwali mu musumba, uwaishibe sana ifya kundapa. Uyu dokota ailesanga ukuti amenso yandi yalyonaike sana kabili anjebele ukuti mfwile ukuyamona badokota bambi mu musumba ukalamba uwa Kinshasa.

Ifyo Cali Ilyo Naile ku Kinshasa

Ilyo naile ku Kinshasa, nailemonana na badokota abengi abacenjele mu kundapa amenso, lelo tapali nangu umo uwangafwile. Pa numa ya kwikala mu cipatala inshiku 43, badokota banjebele ukuti nalipofula, nshakatale mona! Balupwa lwandi bantwele ku ba mapepo abapusanapusana pa kuti bayempepelela, lelo bonse balifililwe ukumposha.

Nasukile nalabako fye ukuti calilaala calipwa, nalipofula. Nalishileba sana no bulanda. Nalilekele ukumona, balintamfishe incito, umukashi wandi na o alimbutwike kabili alisendele ne fipe fyonse ifyo twakwete. Naleikala fye mu ng’anda pantu naleumfwa insoni ukufumina pa nse nelyo ukuba pamo na bantu. Naleimona uwa cabecabe.

Imiku ibili nalyeseshe ukuipaya. Umuku walenga bubili e ulya nandilepo pa ntendekelo. Umwana umunono uwa mu lupwa e wampuswishe. Ilyo nalesamba aishilebuula kapu nabikilemo sumu no kuyaitila pa nse ukwabula ukwishiba ne fyalimo. Icaweme ca kutila tanwenemo. Ilyo nafumine mu kusamba, naishilesanga apo nashiile kapu tapali. Nalyebele balupwa lwandi ico nalefwaila iyi kapu ne pange nakwete.

Ndatasha Lesa na balupwa lwandi pa fyo bansakamana. Balingafwa ukuleka ukutontonkanya pa kuipaya.

 Ifyo Naishileba ne Nsansa na Kabili

Bushiku bumo pa Mulungu, mu 1992, ilyo ba Nte babili baleshimikila, balishile pa ng’anda ninshi ninjikala ndepeepa na fwaka. Ilyo bamwene ukuti ndi mpofu, bambelengele Esaya 35:5, iitila: “Pali iyo nshita amenso ya mpofu yakamona, na matwi ya bankomamatwi yakakomonwa.” Ala nalitemenwe nga nshi ilyo naumfwile aya mashiwi! Ifyo ba Nte banjebele fyalipusene ne fyo aba mu macalici balenjeba, pantu ba Nte bena tabanjebelepo ukutila kuti bamposha mu cisungusho. Lelo balondolwele ukuti amenso yandi yakashibulwa mu calo cipya ico Lesa alaya, cikulu fye naishiba Lesa. (Yohane 17:3) Ilyo line fye, nalitendeke ukusambilila Baibolo ne Nte sha kwa Yehova mu citabo citila, Kuti Waikala Kuli Pe na pe muli Paradise Pe Sonde. Nalitendeke no kusangwa ku kulongana konse ukwa Nte sha kwa Yehova ukwalebela pa Ng’anda ya Bufumu. Kabili nalyalwike, nalilekele no kupeepa fwaka.

Lelo pa mulandu wa kuti nshalemona, calingafishe ukuya pa ntanshi mu fya kwa Lesa. E ico naile ku sukulu uko basambilisha ukulemba no kubelenga ifilembo fya mpofu. Ici calengele ukuti nembeshe mwi sukulu iliba pa Ng’anda ya Bufumu, umo basambilisha ifya kushimikila. Tapakokwele, natendeke ukushimikila ku bena mupalamano. Naishileba ne nsansa na kabili. Nalitwalilile ukuya pa ntanshi mu fya kwa Lesa, nali-ipeele kuli Yehova kabili pa 7 May, 1994, nalibatishiwe.

Ilyo ukutemwa natemenwe Yehova na bantu banandi kwakulile, natendeke ukutontonkanya pa kulapoosa inshita iikalamba mu kushimikila abantu imbila nsuma. E ico, pa 1 December, 1995, nalitendeke bupainiya bwa nshita yonse, e kutila ukulapoosa inshita iikalamba mu kushimikila. Na ino nshita ncili painiya. Kabili ukufuma mu February 2004, balinsonta ukuba eluda mu cilonganino. Limo limo aba mu filonganino fimbi ifyabela mu ncende njikala balanjita mu kulanda amalyashi ya Baibolo. Aya mapaalo yonse ayo nakwata yalanenga ukuba ne nsansa sana kabili yalenga naishiba ukutila umuntu kuti abombela Yehova Lesa nangu ca kuti alilemana.

Yehova Alimpeela “Amenso”

Nga filya nacilanda, umukashi wandi alimbutwike ilyo napofwile. Lelo Yehova alimpaala mu nshila iyaibela. Caba kwati alimpeela amenso. Anny Mavambu, uwasumine ukuupwa kuli ine nangu ca kutila nshimona, e waba amenso yandi. Apo na o ni painiya, lyonse fye tulaya nankwe mu kushimikila. Na kabili nga ndi ne lyashi alambelengelako impapulo umufumine ifyebo pa kuti mfilembe mu filembo fya mpofu. Yehova alimpaala sana pa kumpeela Anny. Pa mulandu ne fyo Anny aba, nalishininkisha ukuti amashiwi yaba pa Amapinda 19:14 ya cine, yatila: “Ubupyani bwa ng’anda ne fyuma fifuma kuli bashibo, lelo umukashi wa mano apeelwa na Yehova.”

Na kabili, Yehova alitupaala pa kutupeela abana babili, umwaume no mwanakashi. Ndafwaisha ukwisamona ifyo abana bandi bamoneka ilyo Lesa akaleta Paradaise! Ipaalo na limbi lya kuti abakalamba bandi abatupeela incende apo twikala nabo balisambilila Baibolo kabili balibatishiwa! Bonse tulongana mu cilonganino cimo.

Nangu ca kutila nalilemana, ico mfwaisha kutwalilila ukubombela Lesa pantu alimpaala nga nshi. (Malaki 3:10) Cila bushiku ndapepa ukuti Ubufumu bwakwe bwise no kufumyapo ukucula konse pa calo. Ukutula apo naishibila Yehova, nalishininkisha ukuti: “Ipaalo lya kwa Yehova lilacindamika, kabili talundako ukucululuka.”—Amapinda 10:22.

[Ifikope pe bula 13]

Ndelanda ilyashi lya Baibolo; ndi no mukashi wandi, abana, na ndume nandi