Bushe Abena Kristu Muno Nshiku Balingile Ukuitumpa mu Fikansa fya Calo?

ABENA KRISTU ba cine muno nshiku tabaitumpa mu fikansa fya calo. Mulandu nshi? Pantu bapashanya Yesu, uwatile: “Nshili wa muli ici calo.” Kabili alandile pa basambi bakwe ukuti: “Tamuli ba muli ici calo.” (Yohane 15:19; 17:14) Natulande pa milandu imo iyo Abena Kristu bashilingile ukuitumpila mu fikansa fya calo.

1. Abantunse tabakwata amaka ya kuiteka. Baibolo ilanda ukuti abantunse tabakwata amaka nelyo insambu sha kuiteka abene. Kasesema Yeremia alembele ukuti: “Umuntu te kuti ayendele umwine. Takwata amaka ya kutungulula intampulo shakwe.”—Yeremia 10:23.

Filya fine Lesa ashapangile abantu ukuti balepupuka, e fyo bashapangilwe no kuti baleiteka abene. Kalemba wa lyashi lya kale David Fromkin, alandile pa mitekele ya bantu ukuti: “Abapanga ubuteko bantunse; kanshi balalufyanya kabili tabeshiba ne fikabacitikila ku ntanshi. Balikwatako amaka yamo, lelo yanono.” (The Question of Government) E mulandu wine Baibolo itusokela ukukanatetekela umuntunse!—Amalumbo 146:3.

2. Ino nshita imipashi ibifi e iteka icalo. Ilyo Satana apeele Yesu amabufumu ya pali cino calo, Yesu takeene ukuti Satana alikwete amaka ya kumupeela aya amabufumu. Na kuba, inshita imbi, Yesu aitile Satana ukuti “kateka wa ici calo.” Ilyo papitile imyaka, umutumwa Paulo alondolwele Satana ukuti “lesa wa bwikashi buno.” (Yohane 14:30; 2 Abena Korinti 4:4) Paulo alembeele Abena Kristu banankwe ukuti: “Ukushomboka kwesu . . . kwa kushomboka . . . na bakateka ba calo cino icaba mu mfifi, ne mipashi ibifi iyaba mu muulu.” (Abena Efese 6:12) Kanshi, nangu ca kuti abantu abengi tabaishiba, imipashi ibifi e iteka cino calo. Bushe ukwishiba ici cishinka kulingile ukukuma shani ifyo tumona ifikansa fya calo?

Tontonkanyeni pali ici: Nga filya fine amato ayanono yasendwa ku mukuku uukalamba uwa  muli bemba, e fyo ne mitekele ya bantunse yaba, itungululwa ne mipashi ibifi iyakwatisha amaka. Kabili nga filya fine abensha amato bashingacitapo icili conse ku kulesha umukuku wa muli bemba, e fyo na bapolitishani bashingacitapo icili conse ku kwalula ifyo imipashi iyakwatisha amaka ifwaya. Iyi mipashi ibifi yaiminina pa kulenga abantu ukubipa icine cine no kulenga ifintu ukulabipilako fye. (Ukusokolola 12:12) Kanshi uwingawamya fye ifintu pa calo, ni Yehova Lesa, pantu alikwatisha amaka ukucila Satana ne fibanda fyakwe.—Amalumbo 83:18; Yeremia 10:7, 10.

3. Abena Kristu ba cine batungilila fye Ubufumu bwa kwa Lesa. Yesu na basambi bakwe balishibe ukuti pa nshita yakwe umwine, Lesa akabikako ubuteko mu muulu ubukateka isonde lyonse. Baibolo ita ubu buteko ukuti Ubufumu bwa kwa Lesa kabili ilanda no kuti Yesu Kristu e o Lesa asala ukuba Imfumu ya ubu Bufumu. (Ukusokolola 11:15) Apo ubu Bufumu bwalikuma abantunse bonse, e mulandu wine ilyo Yesu alesambilisha, alelandila sana pa “mbila nsuma iyi iya bufumu bwa kwa Lesa.” (Luka 4:43) Na kabili asambilishe abasambi bakwe ukulapepa ukuti: “Ubufumu bwenu bwise.” Mulandu nshi abasambilishishe ifi? Pantu ilyo ubu Bufumu bukalateka, nangu cibe shani ukufwaya kwa kwa Lesa kukacitika mu muulu na pano isonde.—Mateo 6:9, 10.

Nomba cinshi cikacitika ku mabuteko ya bantunse? Baibolo itila amabuteko ‘ya pano isonde ponse’ yakonaulwa. (Ukusokolola 16:14; 19:19-21) Nga ca kutila umo alicetekela ukuti Ubufumu bwa kwa Lesa bukafumyapo amabuteko ya bantunse, te kuti aleyatungilila no kuyatungilila. Pantu nga ca kuti aleyatungilila, ninshi alelwisha Lesa.

Bushe ifi Abena Kristu ba cine tabaibimba mu fikansa fya calo, calola mu kuti tabafwaya no kucitako ifingawamyako imikalile ku ncende bekala? Umfweni icasuko mu cipande cikonkelepo.

[Amashiwi pe bula 7]

Ba Nte babika sana amano ku kutungilila Ubufumu bwa kwa Lesa, te fikansa fya calo