Bushe Kuti Mwa-asuka Ifi Fipusho?

Bushe ifunde lya kutoolelesha mwi bala lyali shani, kabili ni bani balemwenamo?

▪ Ifunde lya kwa Mose talyasuminishe abalimi ukulobolola ifilyo fyonse mu mabala yabo. Abalelobolola tabalingile ukulobolola ifilyo fyali mu mbali ya mabala fyonse. Abalelonganika imyangashi tabalingile ukutoola iyalepona pa nshi nelyo ukubwelela mu kusombola iyalelekelesha ukupya. Kabili abalekunta imiolife ku miti balingile ukusha ifisabo ifyalekaana ukupona. (Ubwina Lebi 19:9, 10; Amalango 24:19-21) Abapiina, inshiwa, bamukamfwilwa, na balebeshi e baletoolelesha ifilyo ifyaleshala umo balobolola.

Abena Israele bonse balemwenamo muli ili ifunde lya kutoolelesha. Ili funde lyalekoselesha abene ba mabala ukuba bakapekape, ukukanaitemwa, no kushintilila pali Lesa ukuti akabapaala. E lyo lyalengele abaletoolelesha ukulabombesha pantu ukutoolelesha kwali mulimo wakosa. (Ruti 2:2-17) Ukutoolelesha kwalengele abapiina belacula ku nsala nelyo ukuba ifisendo ku bena Israele banabo. Na kabili kwalibacingilile ku museebanya waba mu kulombelesha nelyo mu kushintilila pa fya bupe.

Mulandu nshi Solomone afumishe imbao sha kukuulila itempele lya mu Yerusalemu ku Lebanone ukushailepela?

▪ Ilyashi lyalembwa muli 1 Ishamfumu 5:1-10 lilanda pa cipangano Solomone apangene na Hiramu, imfumu ya ku Turi. Bapangene ukuti bali no kubika imbao sha mukedari no mukupri pali bemba pa kuti shikaye shile-elela mpaka shikafike ku Israele, kabili bali no kushibomfya ukukuulila itempele.

Kale, ukushitisha imbao sha mukupri kwali bukwebo ubukalamba mu Middle East. Mu Egupti na mu Mesopotamia, ishi mbao ilingi baleshibomfya nge myalo no kuyemfeshako amatempele na masano. Ifyalembwa fya shamfumu, ifyalembwa fimbi, ne fipapaatu ifyo bashula filanga ukuti abaleikala ku kapinda ka ku kulyo aka Mesopotamia balefumya imbao sha mukupri ku Lebanone, limo balepokolola abo bacimfya e lyo limo balebapeela fye. Aba mu Egupti bena balepangilako na mato ya shamfumu ne mbokoshi.

Imikedari ya ku Lebanone yali iyakosa, iisuma, yalenunkila, kabili tayalepeswa. Kanshi Solomone abomfeshe imbao ishisuma nga nshi pa kukuula itempele. Pali ino nshita, mu Lebanone mwashala fye incende ishinono umusangwa imikedari iyakupile impili sha mu Lebanone kale.

[Icikope pe bula 15]

Baletuma imikedari ya ku Lebanone, ubupe ubwafumine kuli Sarigone imfumu ya bena Asiria

[Abatusuminishe]

Erich Lessing/Art Resource, NY