Ababelenga Ino Magazini Balepusha Ukuti . . .

Bushe Inte sha kwa Yehova Balasumina Ukubondapa ku Cipatala?

▪ Yesu atile “abatuntulu tabakabila kondapa, kano abalwele.” (Mateo 9:12) Apilibwile ukuti Baibolo tayakaanya ukuya ku cipatala mu kundapwa. Kanshi Inte sha kwa Yehova tabakaana umuti kabili balasumina no kubondapa. Balafwaya ukuba no bumi ubusuma no kubutantalishako. Na kuba, ba Nte bamo ni badokota, nga filya fyali Luka, Umwina Kristu uwaliko mu nshita ya batumwa.—Abena Kolose 4:14.

Lelo, Inte sha kwa Yehova tabasumina inshila sha kundapilamo ishapusana na mafunde ya mu Baibolo. Ku ca kumwenako, tabasumina ukubabikamo umulopa pantu Baibolo yalikaanya abantu ukubomfya umulopa pa kuti fye bapusushe ubumi bwabo. (Ukutendeka 9:4; Ubwina Lebi 17:1-14; Imilimo 15:28, 29) Na kabili Baibolo yalikaanya inshila sha kundapilamo isho babomfyamo “ifinjelengwe,” nelyo ukupupa imipashi.—Esaya 1:13; Abena Galatia 5:19-21.

Badokota abengi balishiba ukundapa abantu ukwabula ukubomfya inshila ishapusana ne fyo Baibolo yalanda. Ilingi line inshila sha kundapilamo isha musango yu, isho Inte sha kwa Yehova basalapo, shisuma sana ukucila shilya ishapusana ne fyo Baibolo yalanda.

Kwena, kwaliba inshila sha kundapilwamo ishalekanalekana. Inshila ya kundapilamo iyo bengabomfya kuli umo nalimo te kuti iwame kuli umbi. Kanshi, abalefwaya ukundapwa bwino kuti baipushako badokota na bambi pa kuti bomfwe ifyo na bo bengabeba.—Amapinda 14:15.

Inshila ya kundapilwamo iyo Nte umo engasala kuti yapusana ne yo Nte umbi engasala. Baibolo ileka Abena Kristu ukubomfya kampingu yabo ilyo balepingula pa fintu ifishilepula mu mafunde ya kwa Lesa. (Abena Roma 14:2-4) Kanshi, Nte umo umo afwile ukushininkisha ukuti inshila ya kundapilwamo iyo asala tailepusana na kampingu yakwe iitungululwa na mafunde ya mu Baibolo.—Abena Galatia 6:5; AbaHebere 5:14.

Ilyo Nte alepingulapo ica kucita, akacita nga filya namutekenya acita nga afika apakumanina imisebo. Nga ca kutila akonkelesha banamutekenya abali pa ntanshi yakwe, no kupita fye ukwabula ukunashako, kuti alenga kwaba ubusanso. Namutekenya uwa mano akanashako ilyo ashilapita no kumona nga kuli imyotoka ishileisa. E fyo ne Nte sha kwa Yehova bacita, tabasuswa ukusala inshila balefwaya ukundapilwamo kabili tabakonkelesha icinabwingi. Lelo balatala batontonkanya pa nshila sha kundapilwamo no kumona ifyo Baibolo yalandapo ilyo bashilasala ifyo bengatemwa ukubondapa.

Inte sha kwa Yehova balatasha nga nshi pa fyo badokota babombesha ne fyo baipeelesha. Kabili balatasha sana pa fyo bondapa bwino abalwele.