Kalata Ukufuma ku Grenada

Icacitike Bushiku Bumo mu Lulamba lwa Bemba

NGA balimutumine ku calo cimbi ku kubomba umulimo wa bumishonari, kuti mwatemwa nga nshi. Nga filya fine ciba ku mwaice nga alefwaya ukwishiba ifintu fimo, na imwe kuti mwafwaya ukwishiba ifyo abantu ba ku calo bamutumine baba, ifyo icalo cimoneka, ne fyo umulimo wa kushimikila ukalaenda.

Ilyo batutumine ku Grenada, ine no mwina mwandi twaletontonkanya pa fyo ici calo cimoneka. Ici calo cakwata incende ishisuma 45 ishaba mu lulamba lwa bemba. Mu nshiku fye ishinono, twali no kuyafika ku ncende imo pali ishi ncende ishisuma. Nomba ico twali no kuipakisha sana, te kutamba fye iyi ncende yayemba lelo kumona uko abantu bamo balecita icintu icacindama nga nshi.

Awe e fyo twaile na ku Grenada. Ukufuma pa mwesu ukuya ku Grand Anse Beach, paba fye intamfu iinono. Lelo iyi mpanga isuma nga nshi! Umusebo walishokana, kabili ici calengele ukuti tulemona bwino ifyo iyi mpanga yawama nga nshi. Mu mbali ya mpili ishinono mwalitabililwa ifimenwa. Kanshi ilyo twalepita muli uyu musebo washokana twaleipaikisha ukutamba impili ishikalamba, umutengo, ifipooma e lyo na cibemba. E mulandu wine abantu ukufuma ku fyalo fyalekanalekana beshila mu kutandalila kuli iyi ncende! Impanga ilamoneka bwino sana ica kuti uuleensha motoka afwile ukubikako sana amano pa kuti eba ne cimpwena. Imisebo yaba kuli iyi ncende yalishokana icine cine, kabili limo umusebo ulacepa ica kutila imyotoka shibili nga shakumana kuti walanguluka nga kuti shapusana fye bwino ukwabula ubusanso.

Twasukile twafika apa kulonganina, pa Trade Center, iyabela fye mu mbali ya musebo mupepi na Grand Anse Beach. Tapakokwele, Inte sha kwa Yehova abali nalimo 600, balilongene kabili balitemenwe nga nshi pantu ubu bwali bushiku bwa nsansa kabili ubwa kusambilila amashiwi ya kwa Lesa ayaba mu Baibolo. Ubu bushiku bwaliweme sana maka maka kuli ba Lesley na bena mwabo ba Daphne, abali ne myaka ukucila pali 70. Ba Lesley balebatishiwa. Pa myaka iingi, ba Daphne balelolela sana ubu bushiku, balefwaisha ukuti abena mwabo babatishiwe pantu bena babatishiwe no kuba Inte ya kwa Yehova mu 1958.

Ulubatisho lwa Nte sha kwa Yehova, ulwa kwibisha umuntu onse mu menshi, lwalicindama nga nshi. Umuntu abatishiwa nga ca kuti aishiba bwino bwino ifyo Baibolo isambilisha, atendeka no kulafikonka mu bumi bwakwe. Ukubatishiwa, ni nshila ya kulangilamo pa cintubwingi ukuti umuntu ali-ipeela ukulabombela Yehova Lesa.

Nine baebele ukusambilisha abalongene pa fyo Baibolo yalanda pa lubatisho. Pa mpela ya lyashi, ba Lesley na bambi  babili abalebatishiwa baliminine. Ba Lesley balifwele bwino sana, bafwele ishati lyabuuta na tai kabili bali fye aba nsansa. Naipwishe bonse abalebatishiwa ukuti: “Bushe namulapila ku membu shenu no kuipeela ku kucita ukufwaya kwa kwa Yehova?” Ba Lesley na bambi babili abalebatishiwa ba-aswike ati “Ee!” Kabili ifyo ba-aswike no mweo onse fyalilangile ukuti cine cine bali-ipeele kuli Lesa.

Ilyo banshimikile icalengele ba Lesley ukuba Inte ya kwa Yehova, nalyumfwile bwino. Pa myaka iingi tabalefwaya ukusambilila Baibolo. Lyena inshita imo bailetandalila icishi cimbi na bena mwabo. Ilyo ubushiku bwa mapepo bwafikile ilyo bali kuli cilya cishi, bonse baile uko balepepa. Ba Lesley baebele ba Daphne ati: “Nalaya ku calici uko mpepa, na iwe walaya uko upepa.”

Ba Lesley bailesha ba Daphne pa Ng’anda ya Bufumu e lyo bena baile ku calici lya Anglican uko balepepa. Ilyo bapwile amapepo, babwelele ku Ng’anda ya Bufumu mu kusenda abena mwabo. Ilyo bafikile pa ng’anda ya Bufumu, balibapokelele bwino kuli ba Nte abengi nangu ca kutila tababeshibe. Ifyo babapokelele fyalibafikile sana pa mutima. Ku calici ku mwabo, takwali nangu umo uwabasoseshemo. Ba Lesley baebele ba Daphne ukuti: “Nshakabale mpepa kuli lilya icalici na kabili. Takwaciba nangu umo uwacimpoosako amano, nangu fye ni shimapepo. Takwaciba uwacinsosha ilyo nacifika mpaka nafumako.” Ilyo ba Lesley bafumine ku calici, tabatalile ababwelelako na kabili.

Awe e fyo ba Lesley batampile ukusambilila Icebo ca kwa Lesa no mukoosha. Kabili apa nomba nabaipekanya ukubatishiwa. Abalebatishiwa baile kuli bemba, kabili twalibakonkele. Ifi twali mupepi na bemba, tatwalekabila ukupanga icishiba ca kubatishamo nge fyo ciba ilingi pa kulongana kukalamba ukwa Nte sha kwa Yehova. Twacilwike fye umusebo twafika na kuli bemba.

Ku lulamba lwa Grand Anse Beach kulamoneka bwino sana, kwaba umucanga uwabuuta kabili inshita yonse iya mwaka amenshi yaba fye ayakaba bwino. Ulu lulamba lwalepa amakilomita yatatu. Abatandashi bali ku lulamba balipapile ilyo bamwene twafika natufwala amashati na ma tai, e lyo abanakashi nabo ninshi nabafwala indeleshi. Ba Lesley balicinjishe ifya kufwala, bafwele skipa na kaputula. Elenganyeni ifyo ba Daphne batemenwe ukumona abena mwabo babatishiwa, ninshi palipita ne myaka 50 ukutula apo bena babatishiwilwe! Akasuba kalibalike bwino, kabili ba Daphne bali fye aba nsansa. Ilyo aba batatu balebatishiwa, abatandashi bali kuli iyi ncende nabo baletootako.

Ulu lulamba lulapeela ubukata kuli Kabumba pa fyo lumoneka bwino. Lelo, lwacililemo ukupeela Lesa ubukata lintu abantu batatu babatishiwe mu menshi. Ubu bushiku bwaliweme nga nshi kabili twalitemenwe ukumona ababatishiwe. Nga ni kuli ba Lesley na ba Daphne, ubu e bushiku bwaweme sana mu bumi bwabo.