Bushe Kuti Mwa-asuka Ifi Fipusho?

Bushe Ponti Pilato aletiina Kaisare?

Pa kupatikisha Ponti Pilato Umulashi wa Buteko bwa bena Roma, ukutila epaye Yesu, intungulushi sha baYuda shatile: “Nga mwakakula uyu muntu, ninshi tamuli cibusa wa kwa Kaisare.” (Yohane 19:12) Uyu “Kaisare” balumbula apa ali ni Tiberi, Kateka Mukalamba uwa bena Roma. Bushe nalimo kwali icalengele ukuti Pilato aletiina Kaisare?

Bushe Tiberi Kaisare ali shani? Icitabo ca The New Encyclopædia Britannica cilanda ukuti imyaka iingi ilyo na Yesu talapingulwa, Tiberi ninshi alitampa ukulacita ifintu ifyalemusekesha fye, kabili “alecita ifyabipa pa kuti fye ifyo alefwaya ficitike.” Umutunganya walengele ukuti alecusha abantu icabipisha no kulaipaya bonse abo alemona kwati kuti bamupondokela. Icitabo cimo cine citila: “Ifyo abantu baliko ilya ine nshita Tiberi ali pano calo balembele, filanga ukuti Tiberi atemenwe sana ifyangalo fya lukaakala no bulalelale. Limo nangu ifintu fili fye bwino, mu bunkalwe aleipaya uo alefwaya pa nshita fye iili yonse iyo umwine aletemwa.”

Kanshi, imibele ya kwa Tiberi nalimo e yalengele ukuti Pilato omfwile ifyo intungulushi sha baYuda shalandile ica kuti asukile asuminisha ukuti bepaye Yesu.—Yohane 19:13-16.

Mulandu nshi Yesu asambiile amakasa ya basambi bakwe?

Mu shiku sha bena Israele, abantu abengi balebomba imilimo yalekanalekana ukwabula no kufwalako fimo ku makasa. Bamo abalefwalako fimo, ilingi line balefwala indyato, isho balepangila ne mpapa yatikama no kubikako intambo isho balekakila mu nkolokoso na ku kuulu. Apo imisebo, na mabala balepitanamo mwaleba sana ulukungu nelyo amatipa, amakasa ya bantu yalelamba nangu bacite shani.

E co kwabelele no lutambi lwa kufulako indyato ilyo umuntu talaingila mu ng’anda. Kanshi pa kulanga umuntu ukuti nabamupokelela bwino, balemusamba amakasa. Uwalebomba uyu mulimo wa kusamba abeni amakasa aleba mwine wa ng’anda nangu umubomfi wakwe. Baibolo yalilandapo imiku iingi pali ulu lutambi ulwaseekele. Ku ca kumwenako, Abrahamu aebele abeni baishile kwi tenti lyakwe ukutila: “Mukwai lekeni bamuletele utumenshi twa kusamba ku makasa. E lyo mutuushe mwi samba lya muti. Na ine nalamuletela umukate, uwalamutekako umutima.”—Ukutendeka 18:4, 5; 24:32; 1 Samwele 25:41; Luka 7:37, 38, 44.

Ili lyashi lilenga twaishiba icalengele Yesu ukusamba amakasa ya basambi bakwe ilya nshita ali no kusefya nabo umutebeto wa ca Kucilila umuku wa kulekelesha. Ilya nshita, tapali umwine wa ng’anda nelyo umubomfi wakwe uwali no kubomba uyu mulimo, kabili na pa basambi bakwe bene tapali nangu umo uwaipeeleshe ukusamba amakasa ya banankwe. Kanshi filya Yesu abuulile akabeseni ka menshi, abuula ne taulo lya kubasambilako amakasa no kubakumwinako amenshi, Yesu asambilishe balya baume ukuti bafwile ukulatemwana no kuba abaiceefya.—Yohane 13:5-17.