ILYO nali ne myaka 9, nalitushile. Pali ino nshita ndi ne myaka 43, lelo na lyo line nshalepelako, nalepa fye mita imo. Ilyo abafyashi bandi bamwene ukuti nintusa, bankoseleshe ukulabombesha pa kuti nindatontonkanyapo sana. Pa kuti ndebombesha, napangile ka standi pa ng’anda natendeka no kulashitishapo ifinsabwansabwa ifyalekanalekana. Nalewamya sana apo naleshitishisha, calengele abantu abengi baleisa mu kushitapo sana.

Nangu ca kuti nalebombesha, amafya yandi yamo yena tayapwile. Nali ncili umwipi, kabili ne fintu fye ifyayanguka fyalenjafya. Ku ca kumwenako, nga naya mu matuuka calenjafya ukubula ifintu nga fili apatali. Fyonse fyalemoneka kwati bapangila fye abatali. Naleumfwa sana ububi. Lelo ilyo nali ne myaka 14, ifintu fyalyalwike.

Bushiku bumo, abanakashi babili, Inte sha kwa Yehova, balishishitileko ifisabo ifyo naleshitisha kabili banjipwishe nga kuti natemwa ukulasambilila Baibolo. Nalisumine, kabili tapapitile na nshita nasangile ukuti icacindama sana kubika amano ku kwishiba Yehova no bufwayo bwakwe ukucila ukulasakamana fye pa ciimo candi. Ici calingafwile nga nshi. Na kuba, nalitemenwe sana amashiwi ayaba pa Amalumbo 73:28. Amashiwi ya kubalilapo pali ili lembo yatiila: “Ukupalama kuli Lesa kusuma kuli ine.”

Twalifumine mu calo ca Burkina Faso, no kukuukila ku Côte d’Ivoire. Ukukuuka kwalengele ifintu ifingi fyaluke mu bumi bwandi. Uko twafumine abantu balibelele ukuumona ndeshitisha pali ka standi kandi. Lelo uku twakuukile kwena, naileba umweni kabili abantu balepapa ifyo nalemoneka. Ala abantu balendolekesha ica kuti nalilekele ukufuma pa nse pa milungu iingi. Lyena nalibukishe ukuti ilyo nalepalama kuli Yehova naleba ne nsansa. E ico nalembeele iofeshi lya Nte sha kwa Yehova ukuti bantumineko abakunsambilisha Baibolo, iofeshi lyatumine ba Nani abalebomba bumishonari ukulaisa mu kunsambilisha Baibolo. Ala ba Nani bali bwino nga nshi. Pa kwisa baleisa pali ka honda.

Uko twaleikalila imisebo yali sana iya mucanga kabili iyatelela e lyo mu mainsa mwaleba amatipa. Ba Nani baliwilepo imiku iingi na ka honda kabo pa kwisa mu kunsambilisha, lelo tabalekele ukwisa. Bushiku bumo banjebele ukuti tuye nabo mu kulongana. Nalishibe ukuti pa kuya abantu bakulandolekesha sana, e lyo kabili ba Nani baali no kukwata sana incito pa kwensha ka honda, pantu nomba kali no kufininako. Na lyo line, ilyo naibukishe amashiwi ayaba pe lembo ilyo natemenwe sana aya kuti: “Muli Shikulu Mulopwe  Yehova e mo nauba,” nalisumine ukuya mu kulongana.

Limo pa kuya mu kulongana, twalewa mu matipa na ba Nani, lelo tatwalesakamana pantu twalitemenwe ukulongana. Abantu abo nalesanga ku Ng’anda ya Bufumu bali bwino sana, tabalendolekesha nga filya abantu bambi balendolekesha! Papitile fye imyeshi 9 nalibatishiwe.

Amashiwi ya kulekelesha pe lembo ilyo natemwa yatila “ku kubila imilimo yenu yonse.” Nalishibe ukuti tacali no kunyangukila ukulaya mu mulimo. Ncili ndebukisha ifyacitike ilyo naile mu mulimo wa kubila imbila nsuma umuku wa kubalilapo. Abaice na bakalamba balendolekesha sana, kabili balenkonka pa numa baleseka ifyo ndeenda. Ala nalyumfwile sana ububi. Lelo ilyo naibukishe ukuti nabo bene balingile ukwisaikala mu Paradaise nga ine, calingafwile ukukanaleka ukubila imbila nsuma.

Pa kuti cilenyangukilako ukwenda, nashitile incinga ya kwensesha ku minwe iya mawilo yatatu. Nga twafika apali umulundu, uo tulebomba nankwe alensunka, e lyo nga twatampa ukutentemuka aletolokelapo. Nangu ca kuti pa kutampa caleyafya ukulaya mu mulimo, nalitemenwe sana umulimo wa kubila imbila nsuma ica kuti mu 1998 nalitendeke bupainiya bwa nshita yonse.

Nalesambilisha abantu abengi Baibolo, pa bo nalesambilisha 4 balibatishiwe. Na nkashi yandi nao alisambilile icine! Nalekoseleshiwa sana nga namona abo nalesambilisha Baibolo balelunduluka. Bushiku bumo ilyo nali pa ng’anda ninshi nindwala impepo, nalipokelele kalata ukufuma ku Côte d’Ivoire. Iyi kalata yafumine ku muntu umo mu Burkina Faso uwalesambilila pa university uo nalangile ifyo tusambilisha abantu Baibolo ninshi twiminine fye pa mwinshi, pa numa naebele munyina umbi ukuti alemusambilisha. Lyena, uyu mulumendo akuukile ku Côte d’Ivoire. Anembeele ukuti nomba ni kasabankanya uushabatishiwa. Alanalitemenwe icine cine!

Bushe ncita shani pa kuti ndekwata umwakulila? Akabungwe kamo akafwilisha abalemana kalinsambilisheko ukubila ifya kufwala. Ilyo kafundisha umo uwaletufunda amwene ifyo nalebomba atile, “Tufwile ukukusambilisha ifya kupanga isopo,” e fyo bansambilishe ukupanga isopo. Pali ino nshita ndapanga isopo lya kucapila ne lya kusambila. Abantu balitemwa sana isopo ilyo mpanga kabili balebako na bambi ukulaisa mu kushita. Nga kuli abalefwaya, ndatwala ne mwine pali ka honda aka mawilo yatatu.

Ku ca bulanda mu 2004, nalilekele bupainiya pa mulandu wa kuti inuma yatampile ukulakalipa sana. Lelo ncili ndaya mu mulimo lyonse.