1, 2. Bushe umwana wa mwanakashi alekabila ukumucingilila kuli finshi, kabili mulandu nshi?

UKUSESEMA kwa kubalilapo mu Baibolo kwalicindama sana pantu kulanda pa kufikilisha ubufwayo bwa kwa Yehova. Ilyo Lesa alandile pa bulayo bwa mu Edeni asosele no kuti: “Kabili ndebika no bulwani pali iwe [Satana] no mwanakashi, na pa mwana obe no mwana wakwe.” Bushe ubu ubulwani bwali no kuba shani? Yehova atile: “Ena [ubufyashi bwa mwanakashi] akakufwanta [Satana] ku mutwe nobe ukamusuma ku citende.” (Ukute. 3:15.) Ubulwani pa nsoka no mwanakashi bwali no kubipa sana ica kuti Satana aali no kwesha na maka ukonaula umwana wa mwanakashi.

² E mulandu wine uwaimbile amalumbo ilyo alepepa alandiile pa bantu ba kwa Lesa ukuti: “Moneni! abalwani benu bali mu cimfulumfulu; kabili abamupata icine cine bainuna imitwe yabo. Basosela abantu benu ilyashi lya nkama mu bucenjeshi; kabili bapandanina amano pa bantu mwacingilila. Batila: ‘Iseni uleke tubalofye pa kuti beba uluko na kabili.’” (Amalu. 83:2-4) Ulupwa umo umwana wa mwanakashi aali no kufyalilwa,  lwalekabila ukucingililwa pa kuti talulobele nelyo ukukowela. Yehova pa kuti acingilile umwana, alibikileko amafunde ayali no kulenga afishepo ubufwayo bwakwe.

3, 4. (a) Ni lilali icipangano ce Funde catendeke ukubomba, kabili cinshi abena Israele basumine ukuti e fyo baali no kulacita? (b) Mulandu nshi uo icipangano ce Funde cabeleleko?

³ Ilyo abana ba kwa Abrahamu, Isaki, na Yakobo bafulile sana, Yehova abapangile uluko lwa bena Israele. Abomfeshe Mose ukupangana nabo icipangano icaibela ilyo abapeele amafunde, kabili uluko lwalisumine kulacita fyonse ifyali muli cilya cipangano. Baibolo itila: “[Mose] abuulile ibuuku lya cipangano no kubelengela abantu. Na bo batile: ‘Fyonse ifyo Yehova asosele natuitemenwa ukuficita no kumfwila.’ Awe Mose abuulile umulopa no ku-usansa pa bantu no kutila: ‘Uyu e mulopa wa cipangano ico Yehova apangene na imwe ukulingana na mashiwi yonse aya.’”—Ukufu. 24:3-8.

⁴ Icipangano ce Funde catendeke ukubomba mu 1513 B.C.E., pa Lupili lwa Sinai. Ici cipangano, calengele abena Israele ukuba abantu abaibela abasalwa na Lesa. Kabili Yehova aishileba e ‘Mupingushi wabo, e walebapeela amafunde, kabili aali Imfumu yabo.’ (Esa. 33:22) Ilyashi ililanda pa bena Israele lilondolola ifyalecitika nga ca kuti bakonka nelyo basuula ifipope fya kwa Lesa ifyalungama. Apo Amafunde yalileseshe abena Israele ukulaupana na bantu aba mu nko abashalepepa Lesa wa cine e lyo no kulacitako ifyali mu mipepele ya bufi, kanshi amafunde yalecingilila ulupwa lwa kwa Abrahamu ukukanakowela.—Ukufu. 20:4-6; 34:12-16.

5. (a) Bushe icipangano ce Funde calengele ukuti abena Israele bakwate ishuko nshi? (b) Mulandu nshi Lesa akaanine abena Israele?

⁵ Na kabili icipangano ce Funde calengele ukuti kube na bashimapepo abali cilangililo ca fyali no kucitika ku ntanshi. (Heb. 7:11; 10:1) Na kuba, ici cipangano calengele abena Israele ukukwata ishuko lya kuba ‘ubufumu bwa ba shimapepo,’ nga ca kuti baleumfwila amafunde ayo Yehova abapeele. (Belengeni Ukufuma 19:5, 6.) Lelo abena Israele balifililwe ukukonka ifyo Yehova abebele. Mu nshita ya kucindika Mesia, uwali umwana umukalamba uwa kwa Abrahamu, balimukeene. Ici calengele ukuti Lesa abakaane.

6. Mulandu nshi kwabelele Amafunde?

⁶ Filya abena Israele bafililwe ukutwalilila aba cishinka kuli Yehova no kufilwa ukuba ubufumu bwa bashimapepo, tacalolele mu kuti Amafunde yalilekele ukubomba. Amafunde yali no kucingilila umwana no kulenga abantu ukwishiba Mesia. Ilyo Kristu aishile, na bantu bamwishiba, icipangano ce Funde califikilishiwe. Baibolo itila: “Kristu e mpela ya Mafunde.” (Rom. 10:4) Nomba ni bani,  bali no kuba ubufumu bwa bashimapepo? Yehova Lesa alipangene icipangano na cimbi icalengele ukuti kube uluko ulupya.

7. Finshi Yehova alandiile muli Yeremia pa cipangano cipya?

⁷ Kale ilyo icipangano ce Funde tacilaleka ukubomba, Yehova ukupitila muli kasesema Yeremia asosele ku bena Israele ukuti aali no kupangana nabo “icipangano cipya.” (Belengeni Yeremia 31:31-34.) Icipangano cipya cali no kupusanako ne cipangano ca kale pantu muli ici cipangano abantu tabalekabila ukulapeela amalambo ya nama pa kuti bale-elelwa imembu. Bushe bali no kulaelelwa shani?

8, 9. (a) Cinshi ico umulopa wa kwa Yesu wacita? (b) Bushe icipangano cipya calenga ababamo ukukwata ishuko nshi? (Moneni icikope icili pa ntendekelo ya cino cipande.)

⁸ Ilyo papitile imyaka iingi, Yesu atendeke ukusefya Umulaalilo wa kwa Shikulu pa Nisani 14, mu 33 C.E. Pa kulanda pali kapu umwali umwangashi, Yesu aebele abatumwa bakwe aba cishinka 11 ukuti: “Iyi kapu umuli umwangashi e cipangano cipya ica pa mulopa wandi, uuli no kusuumina pa mulandu wenu.” (Luka 22:20) Mateo alembele ifyo Yesu alandile pa mwangashi, atile: “Uyu mwangashi cimpashanya ca ‘mulopa wandi uwa cipangano,’ uulesuumina pa mulandu wa bengi pa kuti bakabelelwe uluse pa membu.”—Mat. 26:27, 28.

⁹ Umulopa wa kwa Yesu e wakoseshe icipangano cipya. Na kabili umulopa wa kwa Yesu e walenga no kuti imembu shesu shile-elelwa. Yesu tabamo mu cipangano cipya. Apo te mubembu, takabila ukumweleela imembu. Lelo Lesa abomfeshe ilambo lya kwa Yesu ilyacindama ku kulubula abana ba kwa Adamu. Kabili alabomfya no mupashi wakwe uwa mushilo pa bantu aba cishinka kuli ena pa kubasala ukuba “abana” bakwe. (Belengeni Abena Roma 8:14-17.) Apo Lesa abamona ukuti te babembu, baba kwati ni Yesu Umwana wa kwa Lesa uwapwililika. Aba Abena Kristu abasubwa baba “impyani shinankwe isha kwa Kristu” kabili balikwata ishuko lya kuba “ubufumu ubwa ba shimapepo.” Ili e shuko abena Israele bakwete abali mu cipangano ce Funde. Umutumwa Petro ilyo alelanda pa “mpyani shinankwe isha kwa Kristu” atile: “Imwe muli ‘mushobo uwasalwa, bashimapepo kabili ishamfumu, uluko lwa mushilo, abantu bakwe abaibela, pa kuti mubile konse konse ubucindami’ bwa wamwitile ukuti mufume mu mfifi mwingile mu lubuuto lwakwe ulwapesha amano.” (1 Pet. 2:9) Icipangano cipya calicindama icine cine, pantu calilenga abasambi ba kwa Yesu nabo ukuba abana na bambi aba kwa Abrahamu.

10. Ni lilali icipangano cipya catendeke ukubomba, kabili mulandu nshi papitile inshita yalepa ifi?

¹⁰ Ni lilali icipangano cipya catendeke ukubomba? Tacatendeke ukubomba lilya Yesu alandilepo pa bushiku bwa kulekeleshako ukuba pe sonde. Pa kuti citendeke ukubomba, Yesu ali no kufwa no kubuushiwa no kuya ku muulu ku kupeela Yehova umutengo we lambo lyakwe ilyacindama. Kabili umupashi wa mushilo walekabilwa ukupongolwelwa pa bali no kuba “impyani shinankwe isha kwa Kristu.” Kanshi icipangano cipya catendeke ukubomba pa Pentekoste mu 33 C.E. ilyo abasambi ba cishinka aba kwa Yesu basubilwe no mupashi wa mushilo.

11. Bushe icipangano cipya calengele shani abaYuda na bena Fyalo ukuba Israele wa kwa Lesa, kabili ni banga ababa mu cipangano cipya?

¹¹ Nangu ca kuti calishibikwe ukuti  icipangano ce Funde cali no kuleka ukubomba ilyo Yehova alandiile muli Yeremia ukuti ali no kupangana na bena Israele icipangano cipya, icipangano ce Funde calitwalilile mpaka ilyo icipangano cipya catendeke ukubomba. (Heb. 8:13) Ilyo icipangano cipya catendeke ukubomba, Lesa atampile ukumona abaYuda na bena Fyalo abashasembululwa ukuti bali fye cimo cine pantu ‘ukusembululwa kwabo ni kulya ukwa mu mutima ku mupashi, te kwa mafunde yalembwa iyo.’ (Rom. 2:29) Ilyo Lesa apangene na bo icipangano, ali no kubika amafunde yakwe ‘mu matontonkanyo yabo, no kuyalemba mu mitima yabo.’ (Heb. 8:10) Bonse ababa mu cipangano cipya baba 144,000, kabili balipanga uluko ulupya, “Israele wa kwa Lesa.”—Gal. 6:16; Ukus. 14:1, 4.

12. Bupusano nshi bwaba pa cipangano ce Funde ne cipangano cipya?

¹² Bupusano nshi ubwaba pa cipangano ce Funde ne cipangano cipya? Mu cipangano ce Funde mwali Yehova no luko lwa bena Israele; mu cipangano cipya mwaba Yehova na Israele wa kwa Lesa. Mose aali kawikishanya mu cipangano ce Funde; Yesu na o ni kawikishanya mu cipangano cipya. Icakoseshe icipangano ce Funde, mulopa wa nama; umulopa wa kwa Yesu e wakosesha icipangano cipya. Kabili mu cipangano ce Funde, Mose e waletungulula uluko lwa bena Israele lelo mu cipangano cipya; Yesu umutwe wa cilonganino e utungulula.—Efes. 1:22.

13, 14. (a) Bushe icipangano cipya cayampana shani no Bufumu? (b) Cinshi cifwaikwa pa kuti ababa muli Israele wa kwa Lesa bakateke na Kristu mu muulu?

¹³ Icipangano cipya calyampana no Bufumu pantu cikalenga uluko lwa mushilo lukabe ne shuko lya kuba ishamfumu na bashimapepo mu Bufumu bwa ku muulu. Abapanga ulu luko, bana na bambi aba kwa Abrahamu. (Gal. 3:29) Kanshi icipangano cipya e cakoseshe icipangano Lesa apangene na Abrahamu.

¹⁴ Kuli icintu cimo icacindama icifwile ukucitika icakuma Ubufumu. Icipangano cipya e calenga ukuti kube Israele wa kwa Lesa kabili calenga no kuti abasubwa babe “impyani shinankwe isha kwa Kristu.” Lelo kuli icipangano na cimbi icilekabilwa pa kuti ababa muli Israele wa kwa Lesa bakabe ishamfumu na bashimapepo pamo na Yesu mu Bufumu.

15. Bushe cipangano nshi ico Yesu umwine apangene na batumwa bakwe aba cishinka?

¹⁵ Ilyo Yesu atendeke Umulaalilo wa kwa Shikulu, alipangene icipangano na basambi bakwe aba cishinka, icitwa ukuti icipangano ca Bufumu. (Belengeni Luka 22:28-30.) Ici cipangano calipusanako ku fipangano fyonse pantu muli ici cipangano Yehova tabamo, mwaba fye Yesu na basambi bakwe abasubwa. Ilyo Yesu atile, “ifyo na Tata apangana na ine icipangano,” alelosha ku cipangano ico Yehova apangene nankwe ica kuba “shimapepo umuyayaya nga filya fine Melkisedeke ali.”—Heb. 5:5, 6.

16. Bushe icipangano ca Bufumu calenga Abena Kristu basubwa ukukwatako ishuko lya kucita cinshi?

¹⁶ Abatumwa aba cishinka 11 ‘balitwalilile ukuba na Yesu mu fya kwesha.’ Icipangano ca Bufumu calengele bashininkishe ukuti bakaba na Yesu ku muulu uko bakaba ishamfumu na bashimapepo. Lelo te aba fye 11 abakakwata ili ishuko. Yesu amoneke kuli Yohane mu cimonwa no kumweba ati: “Uwacimfya nkamusuminisha ukwikala pamo na ine pa cipuna candi ica bufumu, ifyo na ine nacimfishe no kwikala pamo na Tata pa cipuna cakwe ica bufumu.” (Ukus. 3:21) Kanshi ababa mu cipangano ca Bufumu baba 144,000, Abena Kristu basubwa. (Ukus.  5:9, 10; 7:4) Ici cipangano e calenga ukuti bakateke pamo na Yesu ku muulu. Aba baba kwati ni nabwinga uwafuma ku lupwa ulukaankala uwaupwa ku mfumu kabili na o akwatako amaka ya kuteka ayo umulume wakwe akwata. Na kuba Amalembo yalanda pali aba Bena Kristu basubwa ukuti ni “nabwinga” wa kwa Kristu, “nacisungu uwasanguluka” uo balaya ukuupwa kuli Kristu.—Ukus. 19:7, 8; 21:9; 2 Kor. 11:2.

17, 18. (a) Landeni pa fipangano 6 ifyo twasambililapo ifyayampana no Bufumu. (b) Mulandu nshi tufwile ukutetekela sana Ubufumu?

¹⁷ Ifipangano fyonse ifyo twalandapo muli ifi fipande fibili, filanda fye pa cintu nelyo ifintu ifyacindama ifyakuma Ubufumu. (Moneni charti iileti: “Ifyo Lesa Akafikilisha Ubufwayo Bwakwe.”) Kanshi twamona ukuti ifi fipangano bushininkisho bwa kuti Ubufumu bwa kwa Lesa bukabako. E ico, tufwile ukucetekela sana Ubufumu bwa kwa Mesia, ubo Lesa abomfya pa kufikilisha ubufwayo bwakwe kwi sonde na ku bantunse.—Ukus. 11:15.

¹⁸ Tatufwile ukulatwishika ukuti Ubufumu bwa kwa Lesa e bo Yehova akabomfya ukupwisha amafya yonse ayo abantunse bakwata. Twalicetekela icine cine ukuti ubu Bufumu e bukalenga abantu ukupaalwa umuyayaya. Natutwalilile ukulashimikila abantu icine pa Bufumu!—Mat. 24:14.