Baibolo tayalandapo ukuti calibipa ukoca umuntu nga afwa.

Muli Baibolo mwaliba amalyashi yamo ayalanda ukuti imibili nelyo mafupa ya bantu bamo abafwile baliyocele. (Yosh. 7:25; 2 Imila. 34:4, 5) Ici nalimo calelanga ukuti bamo aba musango yu tabalingile ukubashiika mu mucinshi. Lelo te lyonse calepilibula ukuti uo baoca ninshi talingile ukushikwa mu mucinshi.

Ubushininkisho bumo ubo twingalandapo ni mfwa ya Mfumu Shauli na bana bakwe abaume batatu. Bonse babepeye ilyo balelwa inkondo na baPelishiti. Umwana wa kwa Shauli umo ali ni Yonatani, uwali cibusa wa cishinka uwa kwa Davidi. Ilyo abaume ba maka abena Israele abaleikala mu Yabeshe-gileadi baumfwile ukuti Shauli na bana bakwe nabafwa, bailesenda fitumbi fyabo no kufyoca, e lyo bashikako amafupa. Pa numa, Davidi atashishe aba baume pa fyo bacitile.—1 Sam. 31:2, 8-13; 2 Sam. 2:4-6.

Baibolo ilanda ukuti abafwa bakabuuka, e kutila, Lesa akalenga abantu abafwa ukuba aba mweo na kabili. Amaka ya kwa Yehova yakalamba, kanshi nampo umuntu ilyo afwile balyocele umubili wakwe nelyo iyo, kuti amupanga cipya cipya. AbaHebere batatu abali ne cishinka kuli Lesa tabaletiina ukuti Imfumu Nebukadnesari nga yaboca mu mulimo ninshi calaala capwa, balicetekele ukuti Lesa ali na maka ya kubabuusha ku bafwa. (Dan. 3:16-18) Ifi fine e fyo na babomfi ba kwa Yehova aba cishinka abo baocele mu fifungo fya baNazi bacetekele. Abantu ba kwa Lesa abengi balifwa ku mulilo nelyo mu mfwa shimbi ica kutila takwali ne cili conse icasheleko. Lelo aba bonse bakabuuka nangu cikabe shani.—Ukus. 20:13.

Ilyo Yehova akalabuusha abantu, takalekabila ukutontonkanya pa fyo umubili wa uyo muntu walemoneka ilyo talafwa. Icilangililo icisuma twingapeela fintu acita ku Bena Kristu abasubwa abo abuushisha ku muulu. Nga filya cali kuli Yesu uwabuushiwe “no mubili wa ku muulu,” Abena Kristu basubwa nabo nga bafwa, ni balya bene babuushiwa, lelo baba fye mu mubili ya bumupashi. Imibili yabo iya buntunse tabaya nayo.—1 Pet. 3:18; 1 Kor. 15:42-53; 1 Yoh. 3:2.

Icalenga ukuti tutetekele ukuti abafwa bakabuuka, ni co twalicetekela ukuti Lesa alikwatisha amaka kabili alafwaisha ukufikilisha ifyo atulaya, kanshi nampo umuntu balimocele ilyo afwile nelyo iyo, Lesa kuti amubuusha. (Imil. 24:15) Kwena te kuti twishibe bwino ifyo Lesa acitile pa kubuusha abantu bamo abafwile, nelyo ifyo akacita ku ntanshi pa kubuusha abafwa. Lelo twalicetekela ukuti Yehova akababuusha. Alitupeela “ubushininkisho” ilyo abuushishe Yesu ku bafwa.—Imil. 17:31; Luka 24:2, 3.

Abena Kristu balakonka ifyo abantu bacita ku ncende bekala, ifyo bamona ifintu, e lyo ne fyo ifunde lya mu calo cabo lilanda pa fya kucita umuntu nga afwa. (2 Kor. 6:3, 4) Kanshi umuntu umwine kuti apingulapo nga alefwaya ukuti bakoce umubili wakwe nga afwa nelyo iyo, nangu balupwa e bengapingulapo.