Amafya kuti yalenga twaumfwa ububi sana. Kuti twalatontonkanya fye pa mafya tukwete ica kuti twafilwa ukulaba ne nsansa. Davidi, Imfumu ya bena Israele alipitile mu macushi ayengi. Bushe acitile shani? Mwi lumbo Davidi aimbile ilifika pa mutima, atile: “Nakuutile kuli Yehova kwi shiwi lyandi, ukuti angafwe; kwi shiwi lyandi, naliliile kuli Yehova ukuti ampaale. Ku cinso cakwe e ko nalepongolwela amasakamika yandi; Nalelondolola ukucula kwandi ku cinso cakwe, ilyo tamwali amaka muli ine. Imwe mwaishiba inshila yandi. Mu nshila umo nyenda.” Davidi ali-icefeshe no kupepa ukuti Lesa amwafwe.—Amalu. 142:1-3.

Mwi lumbo na limbi, Davidi aimbile ati: “Kuli Yehova nalombako fye cimo—ico cine e co ndefwaya, ukuti ndeikala mu ng’anda ya kwa Yehova inshiku shonse isha mweo wandi, pa kutila ndemona ubusuma bwa kwa Yehova no kulatamba itempele lyakwe.” (Amalu. 27:4) Davidi tali mwina Lebi, lelo elenganyeni ifyo aumfwile ilyo aiminine ku nse ya lubansa lwa mushilo mupepi ne tempele. Davidi alitashishe sana ica kuti alefwaya ukulaikala fye mulya mwine pa kuti ‘alemona ubusuma bwa kwa Yehova.’

Ishiwi lya kuti “ubusuma” lilosha ku cintu icilemoneka bwino, nelyo ico umuntu atemenwe icalenga omfwe bwino. Davidi lyonse aletasha sana pa kumona ubusuma bwa fyo Lesa ateyanya bwino inshila ya kumupepelamo. Tufwile ukuyipusha ukuti, ‘Bushe na ine ng’umfwa nga filya fine Davidi aumfwile?’

Muno nshiku, inshila Yehova abikako iya kuti tulelanda nankwe, te tempele ilyapangwa na bantu. Lelo litempele lya kwa Lesa ilikalamba ilya mampalanya, e kutila ukupepa kwa cine. * Nga tuletasha pali ifi Lesa acita, na ifwe ‘tukamona ubusuma bwa kwa Yehova.’

Tontonkanyeni pa ciipailo ico bapangiile no mukuba icali pa mwinshi wa cikuulwa ca mushilo. (Ukufu. 38:1, 2; 40:6) Iciipailo caleimininako ifyo Lesa ali no kupokelela ilambo lya kwa Yesu. (Heb. 10:5-10) Tontonkanyeni ifyo ico cilepilibula kuli ifwe! Umutumwa Paulo atile: “Twabwelele kuli Lesa mu mfwa ya Mwana wakwe ilyo twali abalwani.” (Rom. 5:10) Nga twacetekela ilambo lya kwa Yesu, tukapaalwa kabili Lesa akatucetekela. Ne ci cikalenga ‘Yehova akabe cibusa wesu.’—Amalu. 25:14.

Apo ‘imembu shesu shilafuutwa, Yehova alatupuupuutula.’ (Imil. 3:19) Twaba kwati mufungwa uo bapingwila ukufwa. Lelo pa mulandu wa kuti aleumfwa ububi pa fyabipa ifyo alecita kale, ayalula imibele yakwe kabili ilyo ubushiku bwa kumwipaya tabulafika kapingula uwaba no mulinganya amona ifyo alwike, kabili afuuta umulandu wakwe ukuti takepaiwe. Ala uyu mufungwa kuti atemwa icine cine! Yehova aba nga uyu kapingula, alafuuta imembu sha bantu abalapila.

Pe tempele palecitika ifintu ifingi ifyo Davidi aletamba, pamo nga, amabumba ya bena Israele ayengi, ukubelenga Amafunde pa cintubwingi no kuyalondolola, ukoca ifyanunkila, e lyo na bashimapepo na bena Lebi abalebombela Yehova pe tempele. (Ukufu. 30:34-38; Impe. 3:5-8; Amala. 31 : 9-12) Ifyalecitika mu kupepa kwa cine mu Israele fyalipalana ne fyo caba muno nshiku.

Nga filya cali kale, na muno nshiku mwine, “ukwikala pamo mu cumfwano ukwa ba bwananyina kwaliwama kabili kulaleta insansa icine cine!” (Amalu. 133:1) Mwi sonde lyonse, “aba bwananyina” balaya balefulilako. (1 Pet. 2:17) Mu kulongana kulaba ukubelenga Icebo ca kwa Lesa no kucilondolola. Mu cilonganino cakwe, Yehova alibikako programu ya kusambilisha. Kabili twalikwata ifya kulya fya ku mupashi ifingi ifyo bapulinta ifyo twingabomfya ilyo tuleisambilisha na pa mapepo ya lupwa. Munyinefwe umo uwa mwi Bumba Litungulula atile: “Ukulatontonkanya pa Cebo ca kwa Yehova, ukwishiba umo ifyo ndebelenga filolele, no kusapikilapo ifyebo na fimbi kwalingafwa ukwishiba ifingi kabili naliba ne nsansa.” Ca cine, ‘amano nga yaingila mu mitima yesu tukatemwa ukwishiba.’—Amapi. 2:10.

Muno nshiku, ababomfi ba kwa Lesa balapepa cila bushiku amapepo ayo Yehova akutikako. Yehova amona amapepo ya musango yu nge fyanunkila. (Amalu. 141:2) Tulomfwa bwino ukwishiba ukuti Yehova Lesa alatemwa sana nga tulelanda nankwe mwi pepo!

Mose apepele ati: “Ubusuma bwa kwa Yehova Lesa wesu bube pali ifwe, paaleni ne milimo ya minwe yesu.” (Amalu. 90:17) Nga tuli abacincila ukushimikila, Yehova alatupaala. (Amapi. 10:22) Nalimo twalyafwapo bamo ukusambilila icine. E lyo limbi twalitwalilila ukushimikila pa myaka iingi nangu ca kuti abantu tabakutika ku mbila nsuma, tulalwalilila, twalisakamikwa, nelyo balatucusha. (1 Tes. 2:2) Na lyo line, twalimona “ubusuma bwa kwa Yehova” kabili twalishiba no kuti Shifwe wa ku muulu alatasha sana ifyo tumubombela.

Davidi atile: “Yehova e cakaniko candi kabili e lukombo lwandi. Ni mwe mwansungila ico bampendwila. Intambo sha kupiminako shamponena umwawama.” (Amalu. 16:5, 6) Davidi aletasha pa “cakaniko” cakwe, e kutila ukuba na bucibusa na Yehova e lyo ne shuko lya kumubombela. Nga filya fine cali kuli Davidi, na ifwe kuti twakwata amafya, na lyo line Lesa alatupaala nga nshi! E ico natutwalilile ukulatemwa ukupepa kwa cine no kulatasha Yehova pa kutupeela itempele lyakwe ilya mampalanya.