Mulecita Ifyo Yesu Alandilepo Mwi Pepo

“Tata, . . . cindamikeni umwana wenu, ukuti umwana na o amucindamike.”—YOH. 17:1.

KUTI MWAYASUKA SHANI?

Bushe ‘ukwishiba’ Lesa kwalola mwi?

Mu nshita ya batumwa, bushe Yehova ayaswike shani ipepo Yesu apepele ilyalembwa muli Yohane icipandwa 17?

Muno nshiku, kuti twacita shani ukulingana ne pepo Yesu apepele?

1, 2. Londololeni ifyo Yesu acitile ilyo ali na batumwa bakwe aba cishinka pa numa ya kusefya Ica Kucilila mu 33 C.E.

ICUNGULO bushiku pa Nisani 14, mu 33 C.E., Yesu na banankwe balisefeshe Ica Kucilila. Ukusefya Ica Kucilila kwalebacinkulako ifyo Lesa alubwile ifikolwe fyabo mu busha mu Egupti. Lelo abasambi ba kwa Yesu aba cishinka bali no ‘kulubulwa umuyayaya.’ Ubushiku bwakonkelepo, Yesu, Intungulushi yabo iyabula ulubembu, ali no kwipaiwa ku balwani. Lelo imfwa ya kwa Yesu yali no kuleta ifisuma. Umulopa wakwe wali no kulenga abantu ukuba ne subilo lya kulubuka ku lubembu ne mfwa.—Heb. 9:12-14.

² Pa kuti tatulabile kuli ubu bupe ubusuma ubo Lesa atupeele, Yesu atendeke ukusefya kumbi ukubako cila mwaka, ukwapyene pa Ca Kucilila. Abuulile umukate uushatutumuka, aliumokawile, kabili apeele abatumwa bakwe 11 aba cishinka no kubeba ati: “Uyu mukate cimpashanya ca mubili wandi uulepeelwa pa mulandu wenu. Mulecita ici ku kunjibukisha.” Acitile cimo cine na kuli kapu, abebele ati: “Iyi kapu umuli umwangashi e cipangano cipya ica pa mulopa wandi, uuli no kusuumina pa mulandu wenu.”—Luka 22:19, 20.

3. (a) Ilyo Yesu afwile, kwaluka nshi ukukalamba ukwacitike? (b) Fipusho nshi twingaipusha pe pepo Yesu apepele ilyaba muli Yohane icipandwa 17?

³ Icipangano ca Mafunde ico Lesa apangene na bena Israele cali mupepi no kupwa. Yehova ali no kupangana icipangano cipya na basambi basubwa aba kwa Yesu. Yesu talefwaya ulu luko ulupya ukuba ngo luko lwa bena Israele. Abena Israele tabaikatene mu fyo balepepa Lesa kabili ici calengele ishina lya kwa Lesa  ukukanacindikwa. (Yoh. 7:45-49; Imil. 23:6-9) Yesu alefwaya abasambi bakwe ukuba abaikatana pa kuti balebombela Lesa pamo no kulenga ishina lyakwe ukuba ilya mushilo. E ico, finshi acitile? Apepele ipepo ilisuma nga nshi ilyo umuntu fye onse engatemwa ukubelenga. (Yoh. 17:1-26; moneni icikope cili pa ntendekelo ya cino cipande.) Ilyo tulesambilila pali ili pepo, tuletontonkanya pali aya mepusho, “Bushe Lesa alyasuka ipepo Yesu apepele? Bushe ndecita nga filya fine Yesu apepele?”

IFYO YESU ACINDAMIKE SANA

4, 5. (a) Finshi twingasambilila ku mashiwi ya kubalilapo ayo Yesu alandile ilyo alepepa? (b) Bushe Yehova ayaswike shani ipepo Yesu apepele pa fyo alefwaya?

⁴ Pali ubu bushiku, Yesu asambilishe abasambi bakwe ifintu ifisuma ifingi mpaka fye ubushiku. Lyena aloleshe mu muulu no kupepa ukuti: “Tata, inshita yafika; cindamikeni umwana wenu, ukuti umwana na o amucindamike, pantu mwamupeela amaka pa bantunse bonse, ukuti bonse abo mwamupeela, abapeele umweo wa muyayaya. . . . Ine nalimucindamika pano isonde, pantu nimpwisha umulimo uo mwampeele ukubomba. E ico nomba, mwe Tata, ncindamikeni, lekeni mbe pamo na imwe pa kuti nkwate ubukata ubo nakwete lintu nali pamo na imwe ilyo icalo cishilabako.”—Yoh. 17:1-5.

⁵ Moneni ifyo Yesu acindamike sana mu mashiwi ya kubalilapo ayo alandile mwi pepo. Ico Yesu abikileko sana amano kucindika ishina lya kwa Wishi wa ku muulu kabili ifi e fyo alandile na mwi pepo lya cilangililo, atile: “Mwe Shifwe, ishina lyenu libe ilya mushilo.” (Luka 11:2) Cimbi ico abikileko amano, fintu abasambi bakwe balekabila, alombele Lesa ukuti “abapeele umweo wa muyayaya.” Lyena, Yesu apepeele ifyo alefwaya, alombele Wishi ukuti: “Tata, ncindamikeni, lekeni mbe pamo na imwe pa kuti nkwate ubukata ubo nakwete lintu nali pamo na imwe ilyo icalo cishilabako.” Yehova alipeela Umwana wakwe uwa cishinka ifingi ukucila na pa fyo alombele, alimupeela “ishina ilyawamisha ukucila” amashina yonse aya bamalaika.—Heb. 1:4.

‘UKWISHIBA LESA WA CINE EKA’

6. Finshi abatumwa balingile ukulacita pa kuba no mweo wa muyayaya, kabili twaishiba shani ukuti e fyo bacitile?

⁶ Na kabili, Yesu apepele pa fyo fwe bantu ababembu tufwile ukucita pa kuti tukapokelele ubupe bwa mweo wa muyayaya. (Belengeni Yohane 17:3.) Atile tufwile ukutwalilila ‘ukulaishiba’ Lesa na Kristu. Ica kubalilapo ico tufwile ukucita, kusambilila pali Yehova no Mwana wakwe. Ica bubili, tufwile ukulacita ifyo tulesambilila. Ifi fine e fyo abatumwa balecita, e co Yesu apepele ati: “Amashiwi ayo mwampeele, nalibapeela, kabili baliyatetekela.” (Yoh. 17:8) Nomba pa kuti bakwate umweo wa muyayaya, balingile ukulatontonkanya pa Cebo ca kwa Lesa no kulacita ifyo balebelenga. Bushe abatumwa ba cishinka balitwalilile ukucita ifi mpaka ne mfwa yabo? Ee, balitwalilile. Twalishiba ukuti e fyo bacitile pantu amashina yabo yalilembwa pa mabwe 12 aya mufula wa Yerusalemu Mupya uwa ku muulu.—Ukus. 21:14.

7. Bushe ukwishiba Lesa kwalola mwi, kabili mulandu nshi ukucitila ifi kwacindamina?

⁷ Ishiwi lya ciGriki ilyo bapilibula ukuti, ‘baleishiba’ kuti lyapilibula no kuti “ukutwalilila ukwishiba.” Kanshi ishiwi lya kuti “baishiba” Lesa lipilibula ukuti tufwile ukutwalilila fye ukusambilila pali Lesa. Lelo ukwishiba Lesa Uwapulamo mu muulu na pano isonde takupelela fye pa kwishiba imibele yakwe no bufwayo bwakwe. Tufwile no kutemwa sana Yehova no  kuba ifibusa fyakwe kabili tufwile ukutemwa na Bena Kristu banensu. Baibolo itila: “Uushakwata ukutemwa taishiba Lesa.” (1 Yoh. 4:8) Kanshi, nga twalishiba Lesa tufwile no kulamumfwila. (Belengeni 1 Yohane 2:3-5.) Lishuko nga nshi ukwishiba Yehova! Lelo nga tatucenjele, kuti twaonaula bucibusa bwesu na Lesa nga filya Yuda Iskariote acitile. E ico, natule-esha na maka pa kuti tutwalilile ukuba ifibusa fyakwe. Nga twatwalilila ukucita ifi, Yehova akatupeela ubupe ubusuma nga nshi ubwa mweo wa muyayaya.—Mat. 24:13.

“PA MULANDU WE SHINA LYENU”

8, 9. Cinshi ico Yesu abikileko sana amano ilyo ali pano calo, kabili cisambilisho nshi ico akeene?

⁸ Nga twabelenga ipepo Yesu apepele ilyalembwa muli Yohane icipandwa 17, tatutwishika nangu panono ukuti Yesu alitemenwe sana abasambi bakwe ukubikako fye na ifwe bene. (Yoh. 17:20) Nomba tufwile ukwishiba ukuti ico Yesu abikako sana amano te pusukilo lyesu. Inshita yonse iyo ali pano calo, abikile sana amano ku kulenga ishina lya kwa Wishi ukuba ilya mushilo. Ku ca kumwenako, ilyo alelanda pa mulimo wakwe mwi sunagoge lya mu Nasarete, Yesu abelengele mwi buuku lya kwa Esaya ukuti: “Umupashi wa kwa Yehova waba pali ine, pantu ansubile ukuti mbile imbila nsuma ku bapiina.” Ukwabula no kutwishika, ilyo Yesu abelengele muli ili buuku, alishimbwile bwino ishina lya kwa Lesa.—Luka 4:16-21.

⁹ Imyaka iingi ilyo Yesu ashilaisa pano calo, bashimapepo abaYuda bale-eba abantu ukuti tabafwile ukulabomfya ishina lya kwa Lesa. Te kuti tutwishike ukuti Yesu alikeene ici cisambilisho icishali ca mu malembo. Aebele intungulushi sha mapepo ukuti: “Naishila mwi shina lya kwa Tata, lelo imwe tamumpokelela; nga umbi aishila mwi shina lyakwe, kuti mwamupokelela.” (Yoh. 5:43) Lyena ilyo kwashele inshiku ishinono ukuti afwe, Yesu alandile ico acindamike sana ilyo apepele ukuti: “Tata, cindikeni ishina lyenu.” (Yoh. 12:28) Nangu fye ni muli ili line ipepo tulesambililapo, ico Yesu abikileko sana amano kulenga  ishina lya kwa Wishi ukuba ilya mushilo.

10, 11. (a) Bushe Yesu alengele shani ishina lya kwa Wishi ukwishibikwa? (b) Mulandu nshi abasambi ba kwa Yesu balengela ishina lya kwa Lesa ukwishibikwa?

¹⁰ Yesu apepele ukuti: “Nalenga ishina lyenu ukwishibikwa ku bantu abo mwampeele ukufuma mu ba muli ici calo. Bali benu, na imwe mwabapeele kuli ine, kabili nabomfwila icebo cenu. Ine nomba nshili muli ici calo, lelo bena bali muli ici calo kabili ine ndeisa kuli imwe. Mwe Tata wa mushilo, bacingilileni pa mulandu we shina lyenu ilyo mwampeela, pa kuti babe umo ifyo na ifwe twaba umo.”—Yoh. 17:6, 11.

¹¹ Pa kulenga ishina lya kwa Wishi ukwishibikwa ku basambi bakwe, Yesu talelilumbula fye. Alibasambilishe ukwishiba umwalola ishina lya kwa Lesa, e kutila ukwishiba imibele yakwe iisuma ne fyo acita kuli ifwe. (Ukufu. 34:5-7) Na lintu aba Imfumu, Yesu alitwalilila ukwafwa abasambi bakwe ukulenga ishina lya kwa Yehova ukwishibikwa mwi sonde lyonse. Mulandu nshi abombela uyu mulimo? Pa kuti abantu abengi beshibe Yehova ilyo cino calo cabipa cishilaonaulwa. Kabili Yehova akalenga ishina lyakwe ukwishibikwa ilyo akapususha inte shakwe isha cishinka!—Esek. 36:23.

“PA KUTI ABA MULI ICI CALO BASUMINE”

12. Fintu nshi fitatu ifyacindama ifyo tufwile ukucita pa kuti tulebomba bwino umulimo wa kupususha abantu?

¹² Ilyo Yesu ali pano calo, alyafwile sana abasambi bakwe ukwaluka umo bashalecita bwino. Calicindeme sana ukuti baaluke pa kuti bapwishishishe umulimo atendeke. Yesu apepele ati: “Ifyo mwantumine muli ici calo, e fyo na ine nabatumine muli ici calo.” Yesu alandile pa fintu fitatu ifyacindama ifyali no kwafwa abasambi bakwe ukubomba bwino uyu mulimo wa kupususha abantu. Ica kubalilapo, apepele ukuti abasambi bakwe tabafwile ukuba ulubali lwa calo ca kwa Satana. Ica bubili, apepele ukuti baleumfwila Icebo ca kwa Lesa pa kuti babe aba mushilo. Ica butatu, Yesu alombele ukuti abasambi bakwe babe umo, nga filya fine ena na Wishi baba umo. Kanshi tufwile ukuipusha ukuti: ‘Bushe ndacita ifintu ukulingana ne ifi Yesu apepeelepo?’ Yesu alicetekele ukuti abasambi bakwe nga bacita ifi fintu, aba muli ici calo bakasumina ukuti Lesa e wamutumine.—Belengeni Yohane 17:15-21.

13. Bushe Yehova ayaswike shani ipepo lya kwa Yesu mu nshita ya batumwa?

¹³ Nga twabelenga ibuuku lya Imilimo, kuti twamona ukuti Lesa alyaswike ipepo Yesu apepele. Mu cilonganino ca mu nshita ya batumwa nga mwali amalekano pantu mwali abaYuda na bena Fyalo, abakankaala na bapiina, abakwete abasha e lyo na basha bene. Lelo, bonse bali abaikatana ica kuti umutumwa Paulo abapashenye ku filundwa fya mubili ifyapusanapusana ifipanga umubili umo, kabili umutwe wabo aali ni Yesu. (Efes. 4:15, 16) Mu calo ca kwa Satana abantu tabaikatana, lelo abali mu cilonganino ca kubalilapo bena bali abaikatana. Yehova e walengele ukuti bekatane ukubomfya umupashi wakwe uwa mushilo uwakwatisha amaka.—1 Kor. 3:5-7.

14. Bushe Lesa ayasuka shani ipepo lya kwa Yesu muno nshiku?

¹⁴ Ica bulanda ca kuti, uku kwikatana takwatwalilile ilyo abatumwa bafwile. Nga filya basobele, mu cilonganino mwaishileba abasangu kabili batendeke ukulasambilisha ifya bufi, ne ci calengele ukuti mube amalekano. (Imil. 20:29, 30) Lelo mu 1919, Yesu alilubwile abasambi bakwe abasubwa  ku fisambilisho fya mipepele ya bufi no kubalonganika mu “cikakilo cafikapo ica kwikatana.” (Kol. 3:14) Finshi fyafuma mu mulimo abasubwa babomba uwa kushimikila abantu mu calo conse? “Impaanga shimbi” ukucila pali 7 milioni abafuma “mu nko shonse ne mitundu na bantu na bantu ne ndimi,” balisa mu kupepa Lesa no kupanga umukuni umo na basubwa aba kwa Lesa. (Yoh. 10:16; Ukus. 7:9) Yehova alyasuka bwino sana ipepo lya kwa Yesu ilyo apepele ukuti, “aba muli ici calo beshibe ukuti ni mwe [Yehova] mwantumine, no kuti mwalibatemwa filya fine mwantemwa”!—Yoh. 17:23.

AMASHIWI YA KULEKELESHA AYASUMA

15. Finshi Yesu apepeeleko abasambi bakwe abasubwa?

¹⁵ Icungulo pa Nisani 14 ilyo bapwile ukulya umulaalilo, Yesu apeele ubukata abatumwa bakwe ilyo apangene nabo icipangano ca kuteka nabo mu Bufumu. (Luka 22:28-30; Yoh. 17:22) Lyena, Yesu apepeele bonse abali no kuba abasambi bakwe abasubwa ukuti: “Mwe Tata, ndefwaya ukuti abo mwampeela tukabe na bo uko nkaba, pa kuti bakamone ubukata ubo mwampeela, pantu mwantemenwe ilyo icalo tacilabako.” (Yoh. 17:24) Impaanga shimbi balasekelela pa cilambu abasubwa bakakwata, tababafimbila iyo. Ubu nabo bushininkisho bwa kuti Abena Kristu ba cine balikatana.

16, 17. (a) Mu mashiwi ya kulekelesha mwi pepo Yesu apepele, finshi alandile ukuti e fyo akatwalilila ukucita? (b) Finshi tufwile ukupampaminapo ukucita?

¹⁶ Abantu abengi muno calo tabasumina ukuti Yehova alikwata abantu abaikatana kabili abamwishiba bwino. Ilingi line icilenga, bufi ubo bashimapepo babasambilisha. E fyo cali na lintu Yesu ali pano calo. E calengele asondwelele ipepo lyakwe na mashiwi ayasuma aya kuti: “Mwe Tata uwalungama, aba muli ci calo tabamwishiba nakalya; lelo ine nalimwishiba, kabili aba nabeshiba ukuti ni mwe mwantumine. Kabili nalenga beshibe ishina lyenu kabili nkalenga likeshibikwe, pa kuti babe no kutemwa uko mwantemenweko, na ine mbe muli bena.”—Yoh. 17:25, 26.

¹⁷ Ukwabula no kutwishika, Yesu alilenga ishina lya kwa Wishi ukwishibikwa. Apo e Mutwe wa cilonganino, alitwalilila ukutwafwa ukwishibisha ishina lya kwa Wishi no bufwayo bwakwe. Kanshi natutwalilile ukulanakila ubutungulushi bwakwe pa kulabomba sana mu mulimo wa kushimikila no kulenga abantu ukuba abasambi. (Mat. 28:19, 20; Imil. 10:42) Kabili natutwalilile ukuba abaikatana. Nga twacita ifi, ninshi tulecita ifintu ukulingana ne pepo Yesu apepele. Ici cikalenga ishina lya kwa Yehova ukuba ilya bukata kabili tukaba ne nsansa umuyayaya.

[Ifipusho]

[Icikope pe bula 26]

[Icikope pe bula 28]

Umupashi wa mushilo walyafwile Abena Kristu mu nshita ya batumwa ukuba abaikatana (Moneni paragrafu 13)

[Icikope pe bula 30]

Abantu ba kwa Yehova mu calo fye conse balikatana (Moneni paragrafu 14)