Baeluda—Bushe Mukasansamusha “Uwapomponteka”?

Angela, * nkashi umushimbe uuli ne myaka nalimo 30, nasakamana. Alelolela baeluda. Bushe finshi balamweba? Ca cine ukuti tasangwa ku kulongana lyonse, alanaka sana nga ainuka ku ncito abomba iya kusakamana abakoloci. Cimbi icimusakamika sana ca kuti banyina balilwala.

Nga ni mwe mwali no kuyatandalila ba Angela, kuti mwakoselesha shani uyu nkashi “uwapomponteka”? (Yer. 31:25) Ica kubalilapo fye, kuti mwaipekanya shani pa kuti mukamusansamushe ilyo mukayamutandalila?

TONTONKANYENI PA FYO BAMUNYINENWE BALEPITAMO

Limo bonse tulanaka pa mulandu wa ncito tubomba nelyo imilimo ya mu cilonganino. Ku ca kumwenako, kasesema Daniele ‘alifunshike’ ilyo amwene icimonwa ico afililwe ukwishiba umo calolele. (Dan. 8:27) Ilyo malaika Gabriele aile kuli Daniele, alimwafwile ukwishiba umwalolele icimonwa. Uyu malaika Lesa atumine alisansamwishe Daniele, amwebele ukuti Yehova alikutike ku mapepo yakwe, no kutila ‘alitemwikwa nga nshi.’ (Dan. 9:21-23) Pa nshita imbi, amashiwi ayasuma ayo malaika umbi amwebele yalikoseshe uyu kasesema uwafunshike.—Dan. 10:19.

E ico, ilyo mushilaya mu kutandalila munyinenwe uwanaka nelyo uwafuupulwa, tontonkanyeni pa fyo alepitamo. Yipusheni amuti: Mafya nshi alepitamo? Bushe amafya akwete yalemulenga shani ukuba uwapomponteka? Mibele nshi iisuma akwata? Munyinefwe Richard uwabomba bueluda pa myaka ukucila pali 20 atile: “Ifyo mbikako sana amano muli  bamunyinane mibele yabo iisuma, kabili ukutontonkanya pa fyo balepitamo ilyo nshilaya mu kubatandalila kulangafwa ukwishiba ifyebo fya kuyalanda nabo ifingabakoselesha.” Nga ca kutila muleya na eluda munenu, kuti cawama mwalanshanishisha limo ifyo munyina muleya ku kutandalila alepitamo!

MULELENGA BAMUNYINENWE CILEBANGUKILA UKULANDA

Nalimo mulesumina ukuti tacanguka ukulanda pa fyo muleumfwa. Katulangilile: Uwa bwananyina kuti camukosela ukweba baeluda ifyo aleumfwa nga bamutandalila. Nomba kuti mwacita shani pa kuti mulenge atendeke ukulanda? Nga mwamwentula kabili mwalandapo no tumashiwi utwa kukoselesha kuti camwangukila ukulanda. Munyinefwe Michael uwabomba bueluda pa myaka ukucila 40 nga aletandalila bakasabankanya, abalilapo ukubeba ukuti: “Namwishiba, ubusuma bumo ubwa kuba eluda bwa kutandalila bamunyinefwe mu mayanda yabo no kubeshiba bwino. E ico nalefwaisha nga nshi ukwisamutandalila buno bushiku.”

Nalimo kuti mwabalilapo ukupepa ipepo lya kufuma pa nshi ya mutima ilyo mushilatendeka ukulanshanya. Ilyo umutumwa Paulo alepepa, alelanda sana pa citetekelo ca ba bwananyina, ukutemwa, ne fyo baleshipikisha. (1 Tes. 1:2, 3) Nga mwalanda pa fyo mwatemwa imibele iisuma iya kwa munyinenwe, ninshi mulepekanya umutima wenu no wakwe pa kuti mulanshanye bwino. Amashiwi mwalanda kuti yalenga uo mutandalile ukumfwa bwino. Ba Ray, baeluda ababomba pa myaka iingi, batile: “Limo bonse tulalaba ifisuma ifyo tucita. Kanshi umo nga alandapo pa fisuma ifyo tucita, tulasansamuka.”

BAPEENI ICA BUPE ICAFUMA KULI LESA

Nga filya Paulo alecita, na imwe kuti mwabapeela ica bupe icafuma kuli Lesa nga mwabelenga nabo amashiwi ya mu Baibolo nelyo icikomo fye cimo. (Rom. 1:11) Ku ca kumwenako, munyinefwe uuli sana no bulanda nalimo kuti aleimona kwati tacindama nga filya uwaimbile amalumbo aleimona kwati aali nge “nyambi iili pa cushi,” iikonkotene. (Amalu.  119:83, 176) Pa numa ya kulandapo panono pali aya mashiwi, nalimo kuti mwaeba munyinenwe ukuti mwalicetekela ukuti ‘talaba’ amafunde ya kwa Lesa.

E fyo ne lyashi ililanda pa ndalama imo iya drakima iyalubile lingafika pa mutima wa kwa nkashi uwaleka ukulongana nelyo uwanaka! (Luka 15:8-10) Ilya ndalama yalubile ifwile yali ku kamunyololo ka kufwala mu mukoshi aka mutengo sana akapangilwe na makobili ya silfere ayengi. Nga mwalanshanya nankwe ici cilangililo, kuti ailuka ukuti na o wine alicindama mu cilonganino ca Bwina Kristu. Pa numa ya kulanshanya nankwe, nalimo kuti mwamweba ukuti Yehova alamusakamana sana nga kana kakwe aka mpaanga.

Ilingi line, bamunyinefwe balatemwa sana ukulanda ifyo baletontonkanya pa malembo mwabelenga nabo. E ico, mwilalanda fye mweka! Pa numa ya kubelenga icikomo icilingene no bwafya munyinefwe akwete, kuti mwasoobolapo ishiwi nelyo amashiwi no kumweba ukuti alandepo. Ku ca kumwenako, pa numa ya kubelenga 2 Abena Korinti 4:16, eluda kuti aipusha ukuti, “Bushe kwalibako ifyamucitikila ifilanga ukuti Yehova alamupeela amaka ya kushipikisha?” Ukulanshanya muli iyi nshila kuti kwalenga ‘mwakoseleshanya’ icine cine.—Rom. 1:12.

Na kabili, kuti mwasansamusha Umwina Kristu munenu nga mwalanshanya nankwe pa muntu uwalembwa mu Baibolo uwapitile mu bwafya alepitamo. Umuntu uusakamikwe kuti asambililako ku bantu pamo nga Hana nelyo Epafroditi, abakwete amafya ayalebasakamika lelo abatwalilile abacindama kuli Lesa. (1 Sam. 1:9-11, 20; Fil. 2:25-30) Kanshi kuti cawama ukulanshanya nankwe ilyashi lya mu Baibolo nga ca kutila kuti caba fye bwino!

TWALILILENI UKUBAKOSELESHA

Kuti mwalanga ukuti mwalibika sana amano kuli bamunyinenwe na bankashi nga mwatwalilila ukubakoselesha pa numa ya kubatandalila. (Imil. 15:36) Ilyo mulesondwelela ukulanshanya, kuti cawama ukupangana nabo ukuti mukabombe bonse mu mulimo wa kushimikila. Munyinefwe Bernard, uwabomba bueluda pa myaka iingi, nga abwelela kuli kasabankanya uo atandalile, mu mucenjelo alamwipusha pa fyo balanshenye ati, “Bushe filya twalanshenye fyalibomba?” Nga mwabika amano kuli munyinenwe mwatandalile, mukeshiba nga ca kutila acili alekabila ukumwafwa.

Ino nshita, e lyo tufwile ukulanga sana ukuti twalibika amano kuli bamunyinefwe, ukuti twalishiba ifyo bapitamo, no kuti twalibatemwa. (1 Tes. 5:11) Kanshi, ilyo mushilaya ku cipempu ca bucemi, tontonkanyeni pa fyo munyinenwe alepitamo. Pepelenipo. Saleni amalembo ayengafwa uo muleya mu kutandalila. Nga mwacita ifi mukalanda amashiwi ayasuma ayakasansamusha “uwapomponteka”!

[Futunoti]

[Icikope pe bula 29]

Ilyo mushilaya mu kutandalila Umwina Kristu munenu, tontonkanyeni pa fyo alepitamo

[Ifikope pe bula 30]

Ilingi line, bamunyinefwe balatemwa sana ukulanda ifyo baletontonkanya pa malembo mwabelenga nabo

[Icikope pe bula 31]

Twalilileni ukubabikako amano