AMEPUSHO UKUFUMA KU BABELENGA

Bushe abena Israele pa kwipaya ifipondo, balefikulikila pa cimuti?

▪ Kale pa kwipaya ifipondo fimo, inko ishingi shalefipoopela pa cimuti nelyo pa mulando. Abena Roma balekakila nelyo ukupoopela mpulamafunde pa cimuti, apo aleikala inshiku ishingi ilyo ashilafwa ku bukali, ku cilaka, ku nsala, na ku fintu fimbi. Abena Roma balemona ukuti ukupoopela umuntu pa cimuti wali museebanya kabili abalingile fye ukukandwa muli uyu musango ni bampulamafunde abasuulwa.

Inga abena Israele bena balecita shani? Bushe pa kwipaya bampulamafunde balebakulikila pa cimuti? Amafunde Lesa apeele Mose yatile: “Ngo muntu acita ulubembu lwa kufwilapo, kabili aipaiwa, kabili mwamukulika pa cimuti, icitumbi cakwe tacifwile ukulaala ubushiku bonse pa cimuti; lelo mukamushiike ubo bwine bushiku.” (Amala. 21:22, 23) E ico, pa nshita balelemba Amalembo ya ciHebere, umuntu nga acita ulubembu lwa kufwilapo, baletala bamwipaya e lyo bamukulikila pa cimuti.

Ilembo lya Ubwina Lebi 20:2 na lyo litila: “Umuntu onse mu bana ba kwa Israele, no mulebeshi onse uwikala mu Israele, uwapeelapo umwana wakwe kuli Moleke, ukwipaiwa akepaiwe. Abantu ba mu calo bakamupoole amabwe.” ‘Abaleumfwana ne mipashi nangu abalebuka’ nabo balingile ukwipaiwa. Bushe balebepaya shani? ‘Balebapoola amabwe.’—Lebi 20:27.

Amalango 22:23, 24 yatila: “Nga kuli umukashana nacisungu uwakobekelwa, no mwaume amusanga mu musumba no kulaala nankwe, bonse mukabafumishe ku mpongolo ya uyo musumba no kubapoola amabwe, mpaka bakafwe, umukashana pa mulandu wa kuti tapundile mu musumba, no mwaume pa mulandu wa kuti acendele umukashi wa munankwe. E fyo mukafumye ububi mu kati kenu.” Kanshi, pa kwipaya abacitile imilandu iyabipisha mu Israele, ilingi balebapoola amabwe. *

Amalango 21:23 yatila “uwakulikwa pa cimuti untu watiipwa kuli Lesa.” Ukwabula no kutwishika, ukukulika pa cimuti icitumbi ca muntu “uwatiipwa kuli Lesa” kwalelenga bambi ukusambililako.

[Futunoti]