‘Ishibeni Bwino Bwino Ifyacilapo Ukucindama’

“Mwishibe bwino bwino ifyacilapo ukucindama.”—FIL. 1:10.

IFISHINKA FYA KUTONTONKANYAPO

Finshi twingasambilila ku fimonwa ifyo Esaya, Esekiele, na Daniele bamwene?

Finshi twingasambilila ku kuteyanya kwa kwa Yehova ukwa pe sonde?

Pa numa ya kusambilila cino cipande, finshi mulefwaisha ukucita?

1, 2. Busesemo nshi pa nshiku sha kulekelesha nalimo ubwapapwishe abasambi ba kwa Yesu, kabili mulandu nshi?

PETRO, Yakobo, Yohane na Andrea balisakamene nga nshi pa mashiwi yalandile Shikulwibo. Yesu abebele ukuti itempele lyali no konaulwa. (Marko 13:1-4) E calengele abasambi bamwipushe ukuti: “Twebeni, Ni lilali ifi fintu fikabako, kabili cinshi tukeshibilako ukuti e po muli no kuti icalo cili ku mpela?” (Mat. 24:1-3) Yesu atendeke ukubeba ifyali no kucitika nelyo ifyo ifintu fyali no kuba, talandile fye ukuti imikalile yali no kwaluka lelo alandile na pa fyali no kucitika ku kulangilila ukuti impela ya calo cabipa ica kwa Satana naipalama. Cimo ico Yesu alandile calipapwishe abasambi bakwe. Pa numa ya kulanda pa fintu ifyabipa ifyali no kulacitika pamo nga inkondo, ukucepelwa kwa fya kulya no kufulisha kwa bubi, Yesu asobele ukuti kukaba icisuma icikalacitika na co icikalanga ukuti tuleikala mu nshiku sha kulekelesha. Atile: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.”—Mat. 24:7-14.

² Abasambi ba kwa Yesu balitemenwe ukushimikila imbila nsuma ya Bufumu pamo na Kristu. (Luka 8:1; 9:1, 2) Bafwile balibukishe ifyo abebele ukuti: “Ukulobolola kukalamba, lelo ababomfi bena nabacepa. E ico lombeni Umwine wa kulobolola ukuti atume ababomfi mu kulobolola kwakwe.” (Luka 10:2) Lelo bali no kushimikila shani “ku bantu bonse aba pe sonde” no kuba “ubunte ku nko shonse”? Bushe ababomfi baali no kufuma kwi? Pali bulya bushiku abasambi abali na Yesu abeshiba ifyo aya mashiwi yali no kufikilishiwa ku ntanshi nga tabasakamene! Nga balipapile fye ukumona ifyo amashiwi yaba pali Mateo 24:14 yafikilishiwa.

3. Bushe amashiwi yaba pali Luka 21:34 yalefikilishiwa shani muno nshiku, kabili finshi tufwile ukuyipusha?

 ³ Tuleikala mu nshita ilyo ifyo Yesu asobele filecitika. Abantu abengi nga nshi baleshimikila imbila nsuma ya Bufumu mwi sonde lyonse. (Esa. 60:22) Lelo Yesu alandile no kuti bamo cikabafya ukubika sana amano ku kushimikila imbila nsuma mu nshiku sha kulekelesha. Bakabika amano ku kucita ifintu fimbi kabili ‘bakafinininwa.’ (Belengeni Luka 21:34.) Tulamona uko aya mashiwi na yo yalefikilishiwa muno nshiku. Ababomfi ba kwa Lesa bamo tababika amano ku fintu ifyacindama. Kuti mwamwena ku fyo bapingula pa fintu pamo nga, incito babomba, amasambililo ya pa muulu, ukuba ne fyuma, e lyo ne nshita bapoosa ku kwangala na ku fya kuleseshamo icitendwe. Bamo nabo balinenuka pa mulandu wa masakamika ya mikalile. Yipusheni amuti: ‘Bushe finshi nabikako sana amano? Bushe ukufwaya kwa kwa Lesa e ko nabika intanshi mu bumi bwandi?’

4. (a) Finshi Paulo apepeeleko Abena Kristu ba ku Filipi, kabili mulandu nshi? (b) Finshi twalasambilila muli cino cipande na mu cikonkelepo, kabili fikatwafwa shani?

⁴ Abena Kristu abaliko mu nshita ya batumwa balingile ukwesha na maka pa kuti balebika umulimo wa kwa Lesa pa ntanshi. E mulandu wine umutumwa Paulo apepeleko abena Filipi ukuti ‘beshibe bwino bwino ifyacilapo ukucindama.’ (Belengeni Abena Filipi 1:9-11.) Nga filya fyali umutumwa Paulo, Abena Kristu abengi ‘balicililepo ukukosa ukulanda icebo ca kwa Lesa ukwabula umwenso.’ (Fil. 1:12-14) Na muno nshiku mwine, fwe bengi tulashimikila Icebo ca kwa Lesa ukwabula umwenso. Na lyo line, bushe ukwishiba ifyo ukuteyanya kwa kwa Yehova kulebomba kuti kwatwafwa ukubika sana amano ku mulimo wacindama uwa kushimikila? Ee, kuti kwatwafwa icine cine! Muli cino cipande, twalalanda pa fyo Yehova alebomfya ukuteyanya kwakwe ku kufikilisha amashiwi yaba pali Mateo 24:14. Finshi ifyo ukuteyanya kwa kwa Yehova kulecita kabili bushe ukwishiba ifi kuti kwatwafwa shani kumo ne ndupwa shesu? Mu cipande cikonkelepo tukasambilila pa fingatwafwa ukushipikisha no kutwalilila ukulaendela pamo no kuteyanya kwa kwa Yehova.

UKUTEYANYA KWA KWA YEHOVA UKWA KU MUULU

5, 6. (a) Mulandu nshi Yehova alangiile ababomfi bakwe ifimonwa fya kuteyanya kwakwe ukwa ku muulu? (b) Finshi Esekiele amwene mu cimonwa?

⁵ Kwaliba ifintu ifingi ifyo Yehova asalilepo ukukanalemba mu Cebo cakwe. Ku ca kumwenako, Yehova tatweba ifyo bongobongo ibomba nelyo ifyo fintu abumba fibomba, nangu ca kuti ukwishiba ifi nga kwaliweme sana! Lelo alitupeela ifyebo ifitwafwa ukwishiba bwino ukufwaya kwakwe ne fingalenga tulemumfwila. (2 Tim. 3:16, 17) Kanshi caliwama ukuti Yehova alitwebako fimo mu Cebo cakwe pa kuteyanya kwakwe ukwa ku muulu! Tulatemwa nga nshi ukubelenga ifyo balondolola ukuteyanya kwa kwa Yehova ukwa ku muulu muli Esaya, Esekiele, Daniele e lyo na mu Ukusokolola. (Esa. 6:1-4; Esek. 1:4-14, 22-24; Dan. 7:9-14; Ukus. 4:1-11) Mulandu nshi Yehova atwebelako fimo ificitika mu muulu?

⁶ Yehova afwaya tuleibukisha ukuti twaliba mu kuteyanya kwakwe ukwaba ku muulu na pano isonde. Ukuteyanya kwa kwa Yehova ukwa ku muulu kulabombesha ukucita ukufwaya kwakwe. Ku ca kumwenako, Esekiele amwene iceleta ilikalamba ilyaleimininako ukuteyanya kwa kwa Yehova ukwa ku muulu. Ili celeta lyalebutukisha kabili lyalealuka fye bwangu bwangu. (Esek. 1:15-21) Esekiele alimwene no Wale-ensha iceleta. Atile:  ‘Namwene cimo icalebeeka nge cela casakanamo silfere na golde, icalemoneka ngo mulilo ukushinguluka mu kati monse Calemoneka kwati bukata bwa kwa Yehova.’ (Esek. 1:25-28) Esekiele afwile alipapile sana ilyo amwene ici cimonwa! Amwene Yehova aletungulula ukuteyanya kwakwe ukubomfya umupashi wakwe uwa mushilo. Ifyo iceleta lyale-enda mu cimonwa Esekiele amwene, filangilila bwino bwino ifyo ukuteyanya kwa ku muulu ukwa kwa Yehova kubomba!

7. Bushe icimonwa Daniele amwene cilenga shani twacetekela Yehova na Yesu?

⁷ Daniele na o alimwene icimonwa icingalenga twacetekela Yehova na Yesu. Amwene Yehova, “Uwa Nshiku ne Nshiku,” naikala pa cipuna cakwe ica bufumu icali ne mingu sha mulilo kabili cali ne mipeto. (Dan. 7:9) Yehova alefwaya Daniele amone ukuti ukuteyanya kwakwe kulabomba ku kufikilisha ubufwayo bwakwe. Na kabili Daniele amwene “uwaba ngo mwana wa muntu,” e kutila Yesu, balemupeela amaka ya kutungulula ukuteyanya kwa kwa Yehova ukwa pe sonde. Kristu takateke abantunse pa myaka fye iinono. Lelo ukuteka kwakwe “kuteka kwa muyayaya ukushakapite, no bufumu bwakwe tabwakonaulwe.” (Dan. 7:13, 14) Ici cimonwa cilenga twacetekela Yehova no kwishiba ifyo alecita ukubomfya ukuteyanya kwakwe. Kabili apo Yehova e wapeele Yesu amaka ya kuteka, cilenga twacetekela na Yesu intungulushi yesu.

8. Bushe ifimonwa fya kuteyanya kwa kwa Yehova ifyo Esekiele na Esaya bamwene fyalengele ukuti bacite finshi, kabili fifwile ukutulenga ukucita finshi?

⁸ Bushe ifi fimonwa fya kuteyanya kwa  kwa Yehova ukwa ku muulu fifwile ukutulenga ukumfwa shani? Tulingile ukutemwa nga nshi nga filya na Esekiele atemenwe pa kumona ifyo Yehova alecita mu kuteyanya kwakwe. (Esek. 1:28) Ukutontonkanya pa kuteyanya kwa kwa Yehova kuti kwatulenga ukucitapo fimo, nga filya na Esaya acitile. Ilyo Yehova alefwaya aba kutuma mu kweba abantu ifyo alecita, Esaya ali-ile ilyo line fye. (Belengeni Esaya 6:5, 8.) Esaya alicetekele ukuti Yehova nga amwafwa kuti ashipikisha amacushi yonse ayo ali no kukwata mu mulimo Lesa amupeele. Na ifwe ici cimonwa ica kuteyanya kwa kwa Yehova ukwa ku muulu cifwile ukutulenga ukucincila mu mulimo wa kwa Lesa no kulabombesha. Ala tulakoseleshiwa ukwishiba ukuti twaba mu kuteyanya ukwabika sana amano ku kucita ukufwaya kwa kwa Yehova!

UKUTEYANYA KWA KWA YEHOVA UKWA PE SONDE

9, 10. Mulandu nshi ukuteyanya kwa kwa Yehova ukwa pe sonde kukabilwa?

⁹ Yehova abomfeshe Umwana wakwe ukupanga ukuteyanya ukwa pe sonde ukubombela pamo no kuteyanya kwakwe ukwa ku muulu. Mulandu nshi ukuteyanya kwa pe sonde kwalekabilwa pa kuti amashiwi yaba pali Mateo 24:14 yafikilishiwe? Natulande pa milandu itatu.

¹⁰ Uwa kubalilapo wa kuti, Yesu atile umulimo wa kushimikila wali no kulenga abasambi bakwe ukufika “ku mpela ya pano isonde.” (Imil. 1:8) Uwa bubili, wa kuti kwalingile ukuba aba kupekanya ifya kulya fya ku mupashi no kulasakamana aba kubomba uyu mulimo. (Yoh. 21:15-17) E lyo uwa butatu, bonse abaleshimikila imbila nsuma balingile ukulalongana pamo mu kupepa Yehova no kusambilishiwa bwino ifyo bengabomba umulimo wa kushimikila. (Heb. 10:24, 25) Pa kuti ifi fyonse fibombwe bwino, abasambi ba kwa Kristu balingile ukuteyanishiwa bwino.

11. Kuti twalanga shani ukuti tulatungilila ukuteyanya kwa kwa Yehova?

¹¹ Kuti twalanga shani ukuti tulatungilila ukuteyanya kwa kwa Yehova? Inshila imo iyacindama ya kuti tufwile ukucetekela abo Yehova na Yesu basonta ukulatungulula umulimo wa kushimikila. Muno calo mwaliba ifintu ifingi ifyo aba baume bengatemwa ukulacita, lelo basalapo ukulabomba umulimo wa kwa Lesa. Nomba, finshi ukuteyanya kwa kwa Yehova ukwa pe sonde kwabikako sana amano?

BIKENI AMANO KU “FYACILAPO UKUCINDAMA”

12, 13. Bushe baeluda babomba shani umulimo wabo, kabili mulandu nshi ici cimukoselesesha?

¹² Baeluda abaishiba ifingi ifya mu Baibolo mu calo fye conse balibapeela umulimo wa kwangalila no kutungulula umulimo wa kushimikila mu fyalo bekala. Pa kuti bale-endela pamo no kuteyanya kwa kwa Yehova ukwaba nge celeta na pa kuti baleishiba ifilekabilwa ku ncende bekala, aba baume ba cishinka kabili abaicefya balakonka ubutungulushi bwa kwa Yehova na Yesu. Ilyo balebomba imilimo yabo, batungululwa ne Cebo ca kwa Lesa icaba nge ‘nyali ku makasa yabo kabili ngo lubuuto mu nshila yabo’ kabili balapepa na kuli Yehova ukuti abatungulule—Amalu. 119:105; Mat. 7:7, 8.

¹³ Nga filya fyali abaletungulula icilonganino mu nshita ya batumwa, na muno nshiku mwine baeluda abatungulula umulimo wa kushimikila balaipeelesha “ku kusambilisha icebo ca kwa Lesa.” (Imil. 6:4) Balasekelela nga nshi pa kumona ifyo umulimo wa kushimikila ule-enda bwino mu calo baba e lyo na mwi sonde fye lyonse. (Imil. 21:19, 20) Tabapangila ababomfi ba kwa Lesa amafunde ayengi. Lelo  balakonka ifyo Amalembo yalanda ne fyo umupashi wa mushilo uwa kwa Lesa ulebatungulula ilyo balepekanya ifilekabilwa pa kuti umulimo wa kushimikila uleya pa ntanshi. (Belengeni Imilimo 15:28.) Ukucita ifi, kulenga baba ifya kumwenako ifisuma ku ba mu cilonganino.—Efes. 4:11, 12.

14, 15. (a) Finshi ifyo batupekanishisha ifitwafwa ukulashimikila mwi sonde lyonse? (b) Bushe mumfwa shani pa fyo mubombako umulimo wa kushimikila imbila nsuma iya Bufumu?

¹⁴ Bamunyinefwe abengi balabombesha cila bushiku ukupekanya impapulo, ukulongana kwa pa cilonganino, no kulongana kukalamba. Bamunyinefwe abengi nga nshi bali-ipeelesha ukupilibula impapulo mu ndimi ukucila pali 600 pa kuti abengi basambilile pa “fikalamba ifya kwa Lesa” mu lulimi lwabo. (Imil. 2:7-11) Bamunyinefwe na bankashi abacaice balabombesha ukupulinta no kupanga ishi mpapulo ukubomfya bamashini. Lyena ishi mpapulo balashituma ku filonganino ifyalekanalekana na filya fine ifyabela ukutali sana.

¹⁵ Imilimo yalekanalekana ilebombwa pa kuti tulebika sana amano ku kushimikila imbila nsuma. Ku ca kumwenako, bamunyinefwe abengi bali-ipeelesha ukukuula Amayanda ya Bufumu ne Fikuulwa fya Kulonganinamo Ukulongana Kukalamba, balafwa abaponenwe na masanso nelyo abali mu fipatala, kabili balasambilisha na mu masukulu ya Bulesa, kabili balabomba ne milimo imbi iingi iyo tushishiba. Mulandu nshi kwabela imilimo yonse iyi? Yabelako pa kuti tulebomba bwino umulimo wa kushimikila imbila nsuma, ukuti tulelunduluka mu fya kwa Lesa, no kuti tuleafwa bambi ukwisa mu kupepa kwa cine. Ukwabula no kutwishika, ukuteyanya kwa kwa Yehova ukwa pe sonde kwalibika sana amano ku fintu ifyacilapo ukucindama!

MULEPASHANYA UKUTEYANYA KWA KWA YEHOVA

16. Finshi mwingasambilila pa mapepo ya lupwa nelyo ilyo muleisambilisha Baibolo?

¹⁶ Bushe mulalubulako inshita iya kutontonkanya pa fyo ukuteyanya kwa kwa Yehova kubomba? Bamo bapingulapo ukuti ilyo bali na mapepo ya lupwa nelyo ilyo baleisambilisha baleshako inshita iya kufwailapo ifyebo na fimbi pa kuteyanya kwa kwa Yehova no kutontonkanya pa fyo basambilila. Ku ca kumwenako, kuti cawama ukusambilila pa fimonwa ifyo Esaya, Esekiele, Daniele na Yohane bamwene. Icitabo ca Jehovah’s Witnesses—Proclaimers of God’s Kingdom ne mpapulo shimbi e lyo na maDVD ayo mwakwata mu lulimi lwenu nayo kuti yamwafwa ukwishiba ifingi pa kuteyanya kwa kwa Yehova.

17, 18. (a) Finshi mwanonkelamo muli ili isambililo? (b) Mepusho nshi mufwile ukuipusha?

¹⁷ Cisuma ukulatontonkanya pa fyo Yehova alecita ukubomfya ukuteyanya kwakwe. Shi natutwalilile ukulabika amano ku fintu ifyacilapo ukucindama ilyo tulebombela pamo no kuteyanya kwa kwa Yehova. Ukucita ifi kukalenga tukaleumfwa nga filya Paulo aleumfwa, uwatile: “Apo twalipeelwa uyu mulimo ukulingana no luse lwakwe kuli ifwe, tatunenuka.” (2 Kor. 4:1) Akoseleshe na Bena Kristu banankwe ukuti: “Twinenuka ukucita icawama, pantu mu nshita yalinga tukalobolola nga tatutompweke.”—Gal. 6:9.

¹⁸ Mu fyo mucita cila bushiku, bushe imwe pa lwenu nelyo ngo lupwa, mulemona ukuti kuli mumo umo mufwile ukwaluka pa kuti mulebika amano ku fintu ifyacilapo ukucindama? Bushe kuti mwayangushako imikalile pa kuti mulebika amano ku mulimo wacindama sana uwa kushimikila? Mu cipande cikonkelepo, tukasambilila pa fintu fisano ifikatwafwa ukulapashanya ukuteyanya kwa kwa Yehova no kuba abacincila mu mulimo wakwe.

[Ifipusho]