Ilyashi Lya Kale

Icintu ico “Bashakalabe” Icaishile pa Nshita Iisuma

ABANTU abengi abatambile ubunkolanya bwa “Creation Drama” baleti bwali cintu ico “bashakalabe!” Ubu bunkolanya babupangile fye pa nshita iisuma kabili bonse abatambileko tabatalile abalaba ifyo batambile. Cine cine “Creation Drama” yalengele imbila nsuma ukufika ku bantu abengi no kulenga Yehova ukulumbanishiwa. Ici cacitike ninshi kushele fye inshita iinono ukuti ubuteko bwa kwa Hitler butendeke ukucusha sana abantu ba kwa Yehova mu Bulaya. Bushe “Creation Drama” yali ni cinshi?

Mu 1914, aba pa maofeshi yakalamba aya bantu ba kwa Yehova mu Brooklyn, mu New York, ku U.S.A. bafumishe ubunkolanya baleita ukuti “Photo-Drama of Creation.” Muli ubu bunkolanya mwali ifikope ifisuma sana ifyo baletambisha cimo cimo ne fyo baletambisha kwati ni filimu kabili mwali na mashiwi. Balelangisha ubu bunkolanya pa ma-awala 8. Abantu abengi sana balitambileko ubu bunkolanya. Kwali ubunkolanya na bumbi ubo baleita ukuti “Eureka Drama” ubwafumine mu 1914, ubu bwena tabwalepele sana. Lelo ilyo imyaka ya ba 1920 yalefika, ifikope, amafilimu na bamashini balebomfya pa kutambisha fyalyonaike. Lelo abantu abengi balefwaisha ukutamba ubunkolanya bwa “Photo-Drama” na kabili. Ku ca kumwenako, abekashi ba mu Ludwigsburg, ku Germany, baleipusha ukuti, “Ni lilali tukatambapo na kabili ‘Photo-Drama’?” Nomba bushe cali no kuba shani?

Apo abantu abengi balefwaya sana ukutamba ubu bunkolanya, muli ba 1920 abeminishi ba pa Bethel mu Magdeburg ku Germany bashitile amafilimu ya kupangila ifikope ku kampani kasabankanya ilyashi mu Paris, ku France. Bashitile na masilaidi ku makampani ya mu Leipzig na mu Dresden. Babomfeshe ifi bashitile na masilaidi ayali muli “Photo-Drama” ayashaonaike pa kupanga ubunkolanya bumbi.

Munyinefwe Erich Frost, uwacenjele sana mu kushika inyimbo alishishe inyimbo isha kubika muli ubu bunkolanya. Fimo ifyo balandile muli ubu bunkolanya fyafumine mu citabo ca kuti Creation. E mulandu wine ubu bunkolanya bafumishe balebwitila ukuti “Creation Drama.”

Ubu bunkolanya ubupya nabo balebutambisha pa ma-awala 8 kabili balebutambisha mu fiputulwa ifyalekanalekana cila cungulo. Muli ubu bunkolanya balondolwelemo bwino bwino ifyo Lesa abumbile ifintu, mwali ilyashi lya kale ilya mu Baibolo na malyashi yambi aya kale, kabili bwalondolwele ne fyo imipepele ya bufi yafilwa ukulenga abantu ukwishiba icine. “Creation Drama” baitambishe mu Austria, Germany, Luxemburg, na mu Switzerland, e lyo na mu ncende shonse umo balelanda iciGerman.

 Ba Erich Frost batile: “Nga tuletambisha ‘Creation Drama,’ nale-eba abanandi, maka maka abalelisha ifilimba ukuti pa nshita ya kutuusha, balepeela bonse abalongene ifitabo e lyo no tutabo ifyo twakwete. Twaleshalika impapulo ishingi ukucila isho twaleshalika nga tuleshimikila ku ng’anda ne ng’anda.” Ba Johannes Rauthe abalepekanya ukutambisha ubunkolanya mu Poland na mu calo beta ino nshita ati Czech Republic, balandile ukuti abantu abengi abaleisa mu kutamba balesha ama-adresi yabo pa kuti tukalanshanye nabo. Twaleya kuli aba bantu kabili twalelanshanya nabo bwino ifya mu Baibolo.

Muli ba 1930, abantu abaletamba “Creation Drama” baleba abengi sana, kabili abantu mu matauni monse balelanda fye pa Nte sha kwa Yehova. Ilyo calefika mu 1933, mupepi na bantu 1 milioni balitambileko ubu bunkolanya ubo iofeshi lya mu Germany lyaletambisha. Ba Käthe Krauss batile: “Pa nshiku shonse shisano isho twaleya mu kutamba ubunkolanya, twale-enda amakilomita 10 ulwendo lumo, twalepita mu mitengo, twaleninika impili no kupita mu mikonko.” Ba Else Billharz batile: “‘Creation Drama’ e yalengele ukuti ntemwe icine.”

Ba Alfred Almendinger batile, ilyo banyinabo batambileko ubu bunkolanya, “balitemenwe sana ica kuti balishitile Baibolo no kutendeka ukufwayamo ishiwi lya kuti ‘umutwala.’” Apo ili shiwi tabalisangile muli Baibolo, balilekele ukuya uko balepepa kabili balibatishiwe. Ba Erich Frost batile: “Abantu abengi balishile mu kupepa kwa cine pa numa ya kutamba ‘Creation Drama.’”—3 Yoh. 1-3.

Pa nshita ilyo abantu abengi balefwaya sana ukutamba “Creation Drama,” e lyo ubuteko bwa ba Nazi nabo bwalumbwike sana kabili bwalecusha abantu mu Bulaya. Ku kutendeka kwa mwaka wa 1933, ubuteko bwalibindile ba Nte mu Germany. Ukutula muli uyu mwaka ukufika lintu Inkondo ya Calo iya Bubili yapwile mu 1945, ababomfi ba kwa Yehova balibacushishe nga nshi mu Bulaya. Ba Erich Frost balibakakile mu cifungo pa myaka 8. Lelo basukile bafuma mu cifungo kabili pa numa batendeke ukubombela pa Bethel mu Wiesbaden, ku Germany. Ala caliweme ukuti “Creation Drama” yapangilwe pa nshita iisuma pantu yalengele Abena Kristu abengi ukuba abashipa sana lintu balepita mu mesho ilyo kwali Inkondo ya Calo iya Bubili!—Ilyashi lya kale ukufuma ku Germany.

[Icikope pe bula 31]

Icipampa apo balesabankanishisha “Creation Drama” mu 1932

[Icikope pe bula 31]

Ku citabo ca kuti Schöpfung (Ububumbo) e ko bafumishe ishina lya bunkolanya ubupya

[Ifikope pe bula 32]

Ba Erich Frost ne nyimbo babomfeshe muli “Creation Drama”