Ifikapula pa fyo Bakakwata Fikalunde pa Finono

MU MWAKA wa 49 C.E. Petro, Yakobo na Yohane, “abaishibikwe ukuti ni nceshi,” bapeele umutumwa Paulo na Barnaba uo balebomba nankwe, umulimo wa kulaibukisha Abena Kristu abapiina ilyo baleshimikila imbila nsuma ku bena fyalo. (Gal. 2:9, 10) Bushe babombele shani uyu mulimo?

Amakalata Paulo alembele yalanga ifyo abikile amano kuli uyu mulimo. Ku ca kumwenako, alembeele Abena Kristu ba mu Korinti ati: “E ico filya naebele aba mu filonganino fya ku Galatia ukupeela umusangulo ku ba mushilo, e fyo na imwe bene mucite. Pa bushiku bonse ubwa ntanshi ubwa mulungu, onse alepaatulapo fimo mu ng’anda mu mwakwe no kusunga ukulingana no mo akwatila, ukuti ilyo nkesa kwikaba ukusangula. Lelo ilyo nkafika, abaume abo mukasuminisha muli bakalata, e bo nkatuma ukutwala ubupe bwenu ubwa kwafwilisha ku Yerusalemu.”—1 Kor. 16:1-3.

Muli kalata ya bubili iyo alembeele abena Korinti, Paulo na kabili alandile ico kwabelele imisangulo. Atile, pa kuti “kube ukulingana, ifyapula pa fyo mukwete filunde pa finono ifikwete bambi.”—2 Kor. 8:12-15.

Ilyo Paulo alembele kalata ku Bena Kristu ba ku Roma nalimo mu 56 C.E., ninshi imisangulo iingi yalilonganikwa. Atile: “Ndi mupepi no kuya ku Yerusalemu ku kutwalilako abantu ba kwa Lesa ifya kubafwilisha. Abena Makedonia na bena Akaya bali-itemenwe ukupeela ifyo bakwete pa kusangwila abapiina pa bantu ba kwa Lesa mu Yerusalemu.” (Rom. 15:25, 26) Tapakokwele, Paulo alibombele umulimo bamupeele, pantu ilyo abwelelemo ku Yerusalemu no kumwikata bamwikata kulya, aebele Kateka umwina Roma Felikisi ukuti: “Naishile ku kuleta ifya bupe ku bantu bandi no mutuulo kuli Lesa.”—Imil. 24:17.

Ifyo Paulo alandile pa bena Makedonia filanga ukuti Abena Kristu ba kubalilapo bali ni bakapekape. Atile, “baletulomba no kutupapaata ukuti bapeele ubupe.” Umutumwa Paulo akoseleshe abena Korinti ukupashanya abena Makedonia. Atile: “Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.” Cinshi calengele Abena Kristu ba kubalilapo ukuba na bukapekape bwa musango uyu? Ico balefwaya te ‘kupeela fye ifingi ku ba mushilo ababulishe lelo kufwaya no kuti abantu abengi baletasha Lesa.’ (2 Kor. 8:4; 9:7, 12) Kanshi na ifwe umulandu tulingile ukubela bakapekape kufwaya ukwafwilisha ababulishe no kulenga abantu ukulatasha Lesa. Ukwabula no kutwishika, Yehova Lesa akatupaala nga tuli bakapekape, kabili ipaalo lyakwe lilacindamika.—Amapi. 10:22.

 [Akabokoshi pe bula 9]

IFYO BAMO BASANGULA IMISANGULO YA MULIMO WA MWI SONDE LYONSE

Nga filya cali mu nshita ya mutumwa Paulo, abengi muno nshiku ‘balapaatulako fimo’ nelyo ukupekanishisha libela indalama sha kubika mu tubokoshi twa misangulo utwalembwapo ati, “Umulimo wa mwi Sonde Lyonse.” (1 Kor. 16:2) Cila mweshi, ifilonganino filatuma ishi ndalama ku maofeshi ya Nte sha kwa Yehova aya mu calo cabo. Na kabili, kuti mwatuma imisangulo yenu ku kabungwe akaba mu calo cenu akabomfiwa ne Nte sha kwa Yehova. Nga mulefwaya ukwishiba ishina lya kabungwe akaba mu calo cenu ako Inte sha kwa Yehova shibomfya, ipusheni ku maofeshi ya Nte sha kwa Yehova ayaba mu calo cenu. Adresi ya maofeshi ya Nte sha kwa Yehova kuti mwaisanga pa Intaneti pa www.jw.org. Imisangulo iyo mwingatuma mu kulungatika ni iyi:

UBUPE BWA MU KULUNGATIKA

• Indalama, ifibeekobeeko, nelyo ifipe fimbi ifya mutengo.

• Mufwile ukulemba na kalata iya kulangilila ukuti indalama nelyo ifintu ifyo mutumine, bupe.

UBUPE UBWABA NGO KUSEEKESHA

• Ubupe ubo bengabwesesha uwapeele nga alefwaya ukuti bamubweseshe.

• Mukwai kuti mwaipusha ku maofeshi ayangalila icalo cenu nga mulefwaya ukwishibilapo na fimbi.

UKUPEKANYA UKUPEELA MU KUITEMENWA

Ukulunda pa kupeela indalama ne fipe fimbi ifya mutengo, kwaliba inshila na shimbi isha kupeelelamo ku kwafwilisha umulimo wa Bufumu uwa mwi sonde lyonse. Ishi nshila e ishi shili pe samba. Te mulandu ne nshila mwingasala ukubomfya pa kupeela ubupe, kuti cawama intanshi mwalanshanya na ba pa maofeshi ababombela icalo cenu pa kuti mwishibe inshila shaba mu calo cenu. Apo amafunde ya kukonka na ya misonko yalapusanapusana, calicindama ukwipusha abaishiba bwino ifya mafunde ne fya misonko ilyo tamulasala inshila ya kubomfya pa kupeela ubupe.

Inshuwalansi: Umuntu kuti alembesha akabungwe ako Inte sha kwa Yehova babomfya ukuti e kakapoka indalama sha cipangano ca inshuwalansi nelyo isha penshoni.

Indalama sha ku Banki: Umuntu kuti alemba icipangano ca kuti nga afwa, indalama sha ku banki, ifipepala ifilanga ukuti umuntu alibikako indalama ku banki nelyo indalama sha penshoni, fikapeelwe ku kabungwe akabomfiwa ne Nte sha kwa Yehova ukulingana na mafunde ye banki abikako indalama.

Nsonsela: Bamo abakwata indalama ishingi mu twampani kuti batila nsonsela wabo aleya ku kabungwe akabomfiwa ne Nte sha kwa Yehova nge ndalama sha bupe. E lyo bambi na bo, kuti baumana akapi no kubika pamo indalama shabo no kushitwala ku banki, e lyo batila nsonsela wabo aleya ku kabungwe akabomfiwa ne Nte sha kwa Yehova nangu kuti batila nga bafwa e ko indalama shikaye.

Impanga ne Fikuulwa: Impanga, ifikuulwa ne ng’anda ifyo bengashitisha kuti bapeela ubupe. Uulepeela ubupe kuti alemba fye icipangano na kabungwe akabomfiwa ne Nte sha kwa Yehova ukuti nga afwa, e bakaba abene ba ng’anda.

Ubupe bwa Kulapeelwako Akanono: Umuntu kuti akuushisha indalama mu kabungwe akabomfiwa ne Nte sha kwa Yehova. Ena nangu umuntu umbi uo alefwaya kuti alepokako akandalama kalinga cila mwaka mpaka akafwe.

Ifya Cishale no Kuseekesha: Umuntu kuti alemba no kusuminishanya na kabungwe akabomfiwa ne Nte sha kwa Yehova ukuti nga afwa ifipe fyakwe nelyo indalama fikabe fyabo, nelyo kuti aseekesha ifipe atemwa indalama kuli aka kene kabungwe. Limo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Nge fyo amashiwi ya kuti “ukupekanya ukupeela mu kuitemenwa” yatulanga, uulesangula ukubomfya ishi nshila twalandapo afwile ukupekanishisha kabela. Nga mulefwaya ukupeela mu kuitemenwa, kuti mwalembela ku maofeshi ya Nte sha kwa Yehova no kwipusha nelyo ukubatumina foni ukubomfya inambala ili pe samba.

TREASURY

Watch Tower Bible and Tract Society of Pennsylvania

Box 33459

Lusaka 10101

Foni: +260 211 272062