Mulebomfya Bwino “Ulupanga lwa Mupashi”
Mulebomfya Bwino “Ulupanga lwa Mupashi”
“Buuleni . . . no lupanga lwa mupashi, e kutila, icebo ca kwa Lesa.”—EFES. 6:17.
1, 2. Bushe tufwile ukucitapo shani pali ifi bakabilisha ba Bufumu balefwaikwa na bambi?
ILYO Yesu amwene amabumba ayalekabila ukwishiba ifya kwa Lesa, aebele abasambi bakwe ati: “Umulimo wa kulobolola ukalamba, lelo ababomfi bena nabacepa. E ico, lombeni Umwine wa mulimo wa kulobolola ukuti atume ababomfi mu mulimo wakwe uwa kulobolola.” Pa numa ya kulanda ayo mashiwi, Yesu alicitilepo na fimo. “Aitile abasambi bakwe 12” no kubatuma ukuya mu kushimikila, nangu ukuyabomba “umulimo wa kulobolola.” (Mat. 9:35-38; 10:1, 5) Pa numa, Yesu “asalile abasambi na bambi 70 no kubatuma babili babili” mu kuyabomba umulimo wa kulobolola.—Luka 10:1, 2.
2 Aba kubilisha Ubufumu na bambi balafwaikwa na lelo line. Abasangilwe ku Cibukisho mwi sonde lyonse mu mwaka wa 2009 bali 18,168,323. Pali aba, pali abantu ukucila pali 10 milioni abashili baNte. Cine cine, ino ni nshita ya kuseepa. (Yoh. 4:34, 35) Kanshi tufwile ukulapepa no kulomba Lesa ukuti atume ababomfi na bambi. Finshi tulingile ukulacita ifingalingana ne fyo tulelomba? Tufwile ukubomba bwino umulimo wa kushimikila pa Bufumu no kulenga abantu ukuba abasambi kabili tufwile no kuba abacincila.—Mat. 28:19, 20; Marko 13:10.
3. Bushe umupashi wa kwa Lesa utwafwa shani ukulabomba bwino umulimo wa kushimikila?
3 Icipande cifumineko calandile ifyo ukutungululwa no mupashi wa kwa Lesa kutwafwa sana ‘ukulalanda icebo ca kwa Lesa no kushipa.’ (Imil. 4:31) Umupashi wine kuti walenga twaishiba bwino ifya kushimikila. Cimo ico twingacita nga tulefwaya ukulabomba bwino umulimo wa kushimikila, kulabomfya bwino icibombelo Yehova Lesa atupeela, ne ci Cebo cakwe, Baibolo iyalembelwe ukupitila mu mupashi wa mushilo. (2 Tim. 3:16) Ifyebo fyabamo fyafuma kuli Lesa. Kanshi nga tulebomfya Baibolo ilyo tuleshimikila, ninshi tuletungululwa no mupashi wa mushilo. Ilyo tatulalanda pali co, natubale tulande pa maka ayo Cebo cakwata.
‘Icebo ca kwa Lesa ca Maka’
4. Bushe ubukombe bwaba muli Baibolo kuti bwayalula shani umuntu?
4 Icebo ca kwa Lesa, nangu ubukombe bwakwe, bwa maka icine cine! (Heb. 4:12) Kuti twatila ubukombe bwaba mu Baibolo bwalitwa ukucila ulupanga ulwapangwa no muntu ululi lonse, pantu bwena ciba kwati bulapulinkanya ica kuti bwalekanya apasuntinkanina amafupa no bufyompo. Icine caba mu Baibolo cilafika mu kati na nkati ka muntu kabili cilengila mu matontonkanyo yakwe na mu nkuntu no kusokolola ifyo aba mu kati. Icine ca mu Baibolo calikwata amaka ya kwalula umuntu bwino bwino. (Belengeni Abena Kolose 3:10.) Cine cine, Icebo ca kwa Lesa cilaalula abantu!
5. Bushe Baibolo kuti yatutungulula muli finshi, kabili finshi fingafumamo?
5 E lyo kabili muli Baibolo mwaba amano ayashingasangwa kumbi. Mwaba ifyebo ifingaafwa umuntu ukwishiba ifya kwikala muli cino calo ca-afya. Icebo ca kwa Lesa cilatusanikila apo tulenyanta e lyo no kubuutusha inshila tuleyamo. (Amalu. 119:105) Cilafwa nga nshi ilyo tuli na mafya nangu ilyo tulefwaya ukwishiba ifya kusala ifibusa fisuma, inyimbo shisuma, ifya kutambatamba, incito, imifwalile, na fimbipo. (Amalu. 37:25; Amapi. 13:20; Yoh. 15:14; 1 Tim. 2:9) Ukukonka ifyaba mu Cebo ca kwa Lesa kulalenga tuleumfwana na bantu banensu. (Mat. 7:12; Fil. 2:3, 4) Apo inshila twendamo yalibuuta, tuleshiba ifingacitika nga twasala ukucita ifintu fimo. (1 Tim. 6:9) Amalembo yalatweba ne fyo Lesa afwaya ukwisacita ku ntanshi, ne co cilatwafwa ukwikala imikalile iilanga ukuti twalicindika ubufwayo bwa kwa Lesa. (Mat. 6:33; 1 Yoh. 2:17, 18) Umuntu nga alekonka ifyaba mu Baibolo, imikalile yakwe kuti yawama nga nshi!
6. Bushe Baibolo yakwata amaka ya kucita cinshi mu bulwi bwesu ubwa ku mupashi?
6 Tontonkanyeni ne fyo Baibolo yaba canso ca maka mu bulwi bwesu ubwa ku mupashi. Paulo aitile icebo ca kwa Lesa ati “ulupanga lwa mupashi.” (Belengeni Abena Efese 6:12, 17.) Nga twalondolwela bwino abantu ubukombe bwaba mu Baibolo, kuti bwabalubula ku busha ubo batekwa kuli Satana. Ulu lupanga lwena talwipaya abantu, lelo lulabapususha. E ico natule-esha na maka ukulubomfya bwino.
Mulelungika pa Kusambilisha Icebo ca kwa Lesa
7. Mulandu nshi cacindamina ukwishiba bwino ifya kubomfya “ulupanga lwa mupashi”?
7 Pa kuti umushilika abomfye bwino ifyanso fyakwe mu bulwi, kano asambilila ukufibomfya bwino e lyo afibelesha no kufibelesha. E fyo cifwile ukuba na lintu tulebomfya “ulupanga lwa mupashi” mu bulwi bwesu ubwa ku mupashi. Paulo alembele ukuti: “Uibikilisheko ukuipeela kuli Lesa ngo muntu uo asuminisha, umubomfi uushingaba ne nsoni pa mulimo wakwe, uulungika pa kusambilisha icebo ca cine.”—2 Tim. 2:15.
8, 9. Cinshi cingatwafwa ukumfwikisha ifyo Baibolo ilanda? Landenipo ica kumwenako.
8 Cinshi cikatwafwa ‘ukulungika pa kusambilisha icebo ca cine’ ilyo tuleshimikila? Ilyo tatulasambilisha bambi ifyaba mu Baibolo, intanshi fwe bene tufwile ukufyumfwikisha. Pa kucita ifi, kano twabika amano ku lyashi lyonse ilili mu cipande ico tulebelenga. Kanshi tufwile ukubelenga ne fyebo ifili mu fikomo fibalilepo e lyo ne fikomo fikonkelepo.
9 Natumone ica kumwenako pa Abena Galatia 5:13. Paulo alembele ukuti: “Ukuba kwena, imwe bamunyinane, mwaitilwe ukuba abantungwa; nomba mwileka ubu buntungwa bumulenge ukulakonkelela ifyo mulefwaya, lelo mu kutemwa e mo mubelane abasha.” Buntungwa nshi Paulo alelandapo pano? Bushe alelanda pa kulubuka ku lubembu ne mfwa, nelyo ku fisambilisho fya bufi, nangu ni pali fimbi alelanda? Amashiwi yabalilapo na yakonka pali ici cikomo yalanga ukuti Paulo alelanda pa ‘kulubulwa ku citiipu ca mafunde.’ (Gal. 3:13, 19-24; 4:1-5) Alelanda pa buntungwa bakwete pa mulandu wa kukonka Kristu. Abalefwaya sana ubo buntungwa balebelana abasha pa mulandu wa kutemwana. Abashatemenwe abanabo, balecita ulwambo e lyo balekansana no kukansana.—Gal. 5:15.
10. Pa kumfwikisha Amalembo, finshi tufwile ukwishiba, kabili ni kwi twingasanga ifyebo fya musango yo?
10 Ukumona amashiwi yabalilepo na yakonkele pa fyebo tulebelenga, kulalenga twaishiba ifyo cali, ifyalecitika ne fyalengele. Pa kumfwikisha bwino umo ilembo lilolele, tufwile ukwishiba ifintu pamo nga uwalembele ilyo ibuuku lya mu Baibolo, inshita lyalembelwe, ne fyo ifintu fyali pali iyo nshita. Cimbi icingatwafwa, kwishiba ico ibuuku lyalembeelwe, e lyo kuti cawama twaishiba ne mibele ya bantu, imikalile yabo, ne mipepele yabo pa nshita lyalembelwe. *
11. Finshi tushifwile ukucita ilyo tulelondolola amalembo?
11 ‘Ukulungika pa kusambilisha icebo ca cine’ te kulondolola fye bwino icine ca mu Malembo. Tulingile ukucenjela, pa kuti tatulebomfya Baibolo ku kutiinishako abantu. Nga filya Yesu acitile ilyo Kaseebanya alemutunka, na ifwe tulabomfya Amalembo ku kulanga abantu ukuti twasumina icine. Nalyo line, tatubomfya Baibolo ngo bwembya bwa kuuminako abantu pa kuti basumine ifyo twacetekela. (Amala. 6:16; 8:3; 10:20; Mat. 4:4, 7, 10) Tufwile ukukonka ukukonkomesha kwa mutumwa Petro ukwa kuti: “Mulecindika Kristu mu mitima yenu ukuti ni Shikulu, kabili lyonse muleba abaiteyanya ukwasuka umuntu onse uwingamwipusha pe subilo lyenu, lelo muleasuka no mutima uwafuuka na katiina.”—1 Pet. 3:15.
12, 13. Fintu nshi “ifyaba nga malinga ayakosa” ifyo icine caba mu Cebo ca kwa Lesa cingawisha? Landenipo ica kumwenako.
12 Nga ca kuti tulebomfya bwino Icebo ca kwa Lesa, finshi icine cabamo cingacita? (Belengeni 2 Abena Korinti 10:4, 5.) Icine ca mu Malembo kuti cawisha “ifyaba nga malinga ayakosa,” e kutila, ukusokolola ifisambilisho fya bufi, imyata yabipa, na mano ya bantunse ababembu. Kuti twabomfya Baibolo ukucimfya amatontonkanyo ‘ayalwisha ukwishiba Lesa.’ Ifyo Baibolo isambilisha kuti twafibomfya ku kwafwa abantu ukwalula amatontonkanyo yabo pa kuti yaumfwana ne cine.
13 Ku ca kumwenako fye, tontonkanyeni pali nakulubantu uwa myaka 93 uwikala ku India. Ukufuma ku bwaice bamusambilishe ukuti umuntu nga afwa alaya mu kufyalilwa mu cintu cimbi. Ilyo atampile ukusambilila Baibolo ukupitila mu kulembeshanya amakalata no mwana wakwe uwaleikala ku calo cimbi, alitetekele ifyo alesambilila pali Yehova na pa malayo yakwe. Lelo, icisambilisho ca kuti umuntu nga afwa alafyalilwa mu cintu cimbi calishikeme sana mu mutima wakwe ica kuti alikeene sana ilyo umwana wakwe amulondolwelele muli kalata ifyo ciba umuntu nga afwa. Atile: “Nafilwa ukumfwa icine caba mu Malembo yobe. Imipepele yonse isambilisha ukuti kwaliba cimo icaba mu muntu icishifwa. Ukufuma fye na kale naishiba ukuti umubili ulafwa lelo kwaliba cimo muli ifwe icishimoneka, ne co cintu ciya fye cilefyalilwa mu mibili imbi ukufika ku miku 8,400,000. Bushe ifi nasumina kuti fyaba shani ifya bufi lelo? Ninshi imipepele iingi isambilisha ifya bufi?” Bushe “ulupanga lwa mupashi” kuti lwawisha icisumino ca musango yu icaba nge linga lyakosa? Pa numa ya kulanshanya na fimbi ifyo Baibolo ilanda pali uyu mulandu, papitile fye imilungu inono uyu nakulubantu alembela no mwana wakwe ati: “Nomba nintendeka ukumfwikisha icine pa bafwa. Cilansansamusha sana ukwishiba ukuti ilyo kukaba ukubuuka, abantu besu abafwa tukabamona na kabili. Shi Ubufumu bwa kwa Lesa nabwise bwangu.”
Bomfyeni Baibolo ku Kunashanasha Abantu
14. Bushe ukunashanasha bakomfwa wesu calola mwi?
14 Ukubomfya bwino Baibolo pa kushimikila te kwambula fye amalembo iyo. Paulo pa kulanda “alenashanasha abantu,” kanshi na ifwe e fyo tufwile ukulacita. (Belengeni Imilimo 19:8, 9; 28:23.) “Ukunashanasha” cipilibula “ukukolopeka” umuntu. Uo banashanasha “alashininwa ica kuti acetekela ne fyo balemweba.” Ilyo tulenashanasha umuntu ukuti asumine ifyo Baibolo isambilisha, ninshi tulemukolopeka ukuti acetekele ifyo fintu. Pa kuti tucite fi, tufwile ukushinina bakomfwa wesu ukuti ifyo tulelanda fya cine. Kuti twacita ifi mu nshila shakonkapo.
15. Ilyo mulefwaya ukubelengela umuntu ilembo, finshi mwingalanda ifingalenga acindika Baibolo?
15Mulelanda pa Cebo ca kwa Lesa mu nshila ya kuti cacindikwa. Ilyo mulelanda pe lembo mwalabelenga, lekeni uo mulelanshanya nankwe amone ukuti calicindama ukwishiba ifyo Lesa amona umulandu mulelanshanyapo. Ilyo mwaipusha icipusho no kumfwa ifyo umwine wa ng’anda ayasuka, nalimo kuti mwatila, ‘Lekeni tumfwe ifyo Lesa amona uyu mulandu.’ Nangu kuti mwaipusha amuti, ‘Bushe Lesa alandapo shani pali uyu mulandu?’ Nga mwalanda pe lembo mwalabelenga muli iyi nshila, ninshi mulemulanga ukuti Baibolo yafuma kuli Lesa kabili ninshi mulemwafwa no kucindika Icebo ca kwa Lesa. Calicindama ukucita ifyo maka maka ilyo tuleshimikila ku muntu wa kuti alisumina muli Lesa lelo taishiba ifyo Baibolo isambilisha.—Amalu. 19:7-10.
16. Cinshi cingamwafwa ukulondolola bwino amalembo?
16Mwilabelenga fye amalembo; yalondololeni. Paulo lyonse ‘alelondolola no kupeela ubushininkisho’ pa fyo alesambilisha. (Imil. 17:3) Ilingi line ilembo lya mu Baibolo lilakwata ifishinka ifingi, kanshi mufwile ukusalamo amashiwi yakumine sana ifyo mulelandapo. Pa kucita ifi nalimo kuti mwabwekeshapo ukubelenga amashiwi yakumine umulandu mulelandapo nangu ukwipusha amepusho ayengafwa umwine wa ng’anda ukwishiba ayo mashiwi. Nga mwacita ifyo, e lyo nomba mwingalondolola amashiwi yali mwi lembo ayakumine ifyo mulelandapo. Lyena, afweni komfwa wenu ukumona ifyo ilyo ilembo limukumine.
17. Kuti mwalanshanya shani Amalembo na bantu pa kuti basumine ifyo yalanda?
17Pa kulanshanya pa Malembo, landeni mu nshila ingalenga abantu bashininwa. Pa ‘kulanshanya na bantu mu Malembo’ no kubashinina, Paulo alebapapaata no mutima onse kabili alepelulushanya nabo. (Imil. 17:2, 4) Pashanyeni Paulo no kwesha ukufika abantu pa mutima. Kuti ‘mwatapa’ nelyo ukwishiba ifyaba mu mutima wa kwa komfwa wenu nga mulemwipusha cikuuku cikuuku amepusho ayalanga ukuti namumubikako amano. (Amapi. 20:5) Te kwesha ukulanda mu nshila iingamukalifya. Londololeni icine bwino bwino pa kuti cumfwike, kabili mulundepo ne fishinka fimbi ifyaumfwika. Ifyo mulelanda fifwile ukushimpwa pa Cebo ca kwa Lesa. Cisuma ukubelenga fye ilembo limo, e lyo mwalilondolola no kubomfya icilangililo pa kuti icishinka mulelandapo cumfwike, ukucila ukubelenga amalembo yabili nangu yatatu lubilo lubilo. Ukulanda na pali fimbi ifiletungilila ico cishinka kuti ‘kwalenga abantu ukukutika.’ (Amapi. 16:23) Inshita shimo, icingafwaikwa kufwailapo ifyebo na fimbi no kulondolwela mwine ng’anda. Nakulubantu wa myaka 93 ulya tulandilepo, alekabila ukwishiba umulandu icisambilisho ca kuti umweo taufwa caseekela sana. Ukwishiba uko ico cisambilisho catuntwike ne fyo caishileingila mu mipepele ya pano calo e calefwaikwa pa kumunashanasha ukuti asumine ifyo Baibolo isambilisha pali uyu mulandu. *
Twalilileni Ukubomfya Bwino Baibolo
18, 19. Mulandu nshi tufwile ukutwalilila ukubomfya bwino “ulupanga lwa mupashi”?
18 Baibolo itila, “ifya pano calo filealuka.” Ababifi baleya balebipilako fye. (1 Kor. 7:31; 2 Tim. 3:13) Kanshi tufwile ukutwalilila ukuwisha “ifyaba nga malinga ayakosa” ukupitila mu kubomfya “ulupanga lwa mupashi, e kutila, icebo ca kwa Lesa.”
19 Twaliba aba nsansa sana pa kukwata Icebo ca kwa Lesa Baibolo, no kubomfya ubukombe bwa maka ubwabamo ku kufika abantu pa mutima e lyo na ku kunukula ifisambilisho fya bufi mu bafwaya icine! Takwaba icintu nangu cimo icakosa ico ubukombe bwa mu Baibolo bwingafilwa ukuwisha. E ico, natule-esha na maka ukubomfya bwino ulu “lupanga lwa mupashi” mu mulimo Lesa atupeela uwa kubila pa Bufumu.
[Amafutunoti]
^ para. 10 Impapulo shingatwafwa sana ukwishiba ifyebo fimo pa mabuuku ya mu Baibolo, fitabo pamo nga “Amalembo Yonse Yantu Yapuutwamo Kuli Lesa, Kabili ya Kunonsha,” Insight on the Scriptures, ne fipande pamo nga cilya icitila “Icebo ca kwa Yehova ca Mweo,” iciba mu Ulupungu lwa kwa Kalinda.
^ para. 17 Moneni broshuwa uwa mutwe wa kuti Cinshi Cicitika Nga Twafwa? pa mabula 5-16.
Finshi Musambilile?
• Maka nshi Icebo ca kwa Lesa cakwata?
• Kuti twacita shani pa kuti ‘tulungike pa kusambilisha icebo ca cine’?
• Bushe ubukombe bwaba mu Baibolo kuti bwacita shani ku fintu “ifyaba nga malinga ayakosa”?
• Kuti mwacita shani pa kuti mulenashanasha abantu abo muleshimikila?
[Amepusho]
[Akabokoshi ne Cikope pe bula 12]
Ifya Kubomfya Icebo ca kwa Lesa ku Kunashanasha
▪ Lengeni abantu bacindike Baibolo
▪ Mulelondolola Amalembo
▪ Pa kulanshanya nabo landeni ifishinka ifingabashinina pa kuti mubafike pa mutima
[Icikope pe bula 11]
Sambilileni ukubomfya bwino “ulupanga lwa mupashi”